lunes, 14 de marzo de 2011

XIV Travesía Picos d'Europa. 13/03/2011

Última prueba de la XI Copa Asturies d'Esquí de Montaña 2011.


Crónica del gaiteru

Despertador a les 5:30!!!!, cagonmimáquina, esto del esquí va acabar con toos nosotros...
Furu, Juan, Iván y yo arrancamos pa Sotres con pocu convencimientu, entre'l madrugón y la previsión de Maldonado (www.eltiempo.es, suel fallar pocu últimamente) tamos un pocu gachos.
Un pocu antes de la salida ponse a llover bastante fuerte, nun fai muchu friu y nun sabemos si poner chubasqueru, si nun lu poner, dícennos que p'arriba nun ta muy gafu y danos la risa, al final salimos de Sotres coles tables na mano pa después de 500m zapateando coles madreñobotes per una pista d'hormigón y col corazón saliendo pela boca, calzar por fin los esquís y empezar a dar unes embarraes vueltes maría pel bosque que sube al colláu La Varera.
Pa baxar de Fuentesoles al camín del Casetón tenemos que dir colos esquís na mano, nun hai más que piedres, paez mentira como marcha la nieve d'un día pa otru. Equí yá se produz un corte importante, delante 7 equipos, con Iván y Juan dándolo tou entre ellos, un cachu después Mejido y Tomás xunto con Furu y conmigo, y un pocu después el restu d'equipos, tamos en mediu del fregáu. Llegamos al Casetón con algo de ventaxa respectu a los castrones de Llaviana, yá que Tomás tien problemas coles pieles y saludamos a Rubén, que como siempre recíbenos efusivamente. Na baxada de Tresmacondiú pásanos otru equipu y llegamos al colláu San Carlos en una posición bastante digna y a relativamente pocu tiempu de la cabeza de carrera. La baxada pela canal de San Carlos a la Mayada de Trulledes yá me pon nel sitiu que me corresponde, Furu va delante guiándome (hai bastante niebla) y yo voi baxando como puedo mientres veo como nun faen más que pasanos como cazas, o mui bien esquíen o mui mal tan de la cabeza, o tou ello...
Cambiu pa poner pieles y p'arriba, traigo les pates enterices d'esta baxada y encima son tou vueltes maría, 2 pasos y vuelta, 2 pasos y vuelta..., en cada vuelta echo más tiempu de la cuenta y otru par d'equipos que nos echen el guante, por fin acábase la comedia de tantos xiros y tenemos que poner los esquís al llombu pa subir La Hendida, primeru una travesía hacia la derecha con un patiu curiosín debaxu los pies y después enfocamos un corredor que nos saca en vertical arriba, ponemos les tables otra vez y a subir al Samelar, esta subidina fízoseme eterna, pero al final llegamos al picu y tou p'abaxu hasta Sotres, con un par de repechos nos que tenemos que quitar los esquís pa subir andando (Tresmacondiú y Fuentesoles).
Llegamos en 4h52', despues de 18km y 2040m+, yo contentu d'acabar en tiempu y de nun mancame, Furu calculo que hasta les narices de tener qu'esperame y de ver como se nos escapaben los xabalinos de Llaviana (Tomás y Mejido) y de Cabrales (Íñigo y Cipriano).
El tiempu al final aguantó, aunque fue una pena nun ver el gran paisaxe d'esta zona a cuenta la niebla, pero había visibilidá suficiente pa poder facer la carrera.

Muches gracies a Furu por tener la paciencia de facer equipu conmigo (esta carrera yera por equipos de 2 0 3 persones) y norabona pa los castrones de Llaviana, pero que se vayan preparando pa la próxima...

Norabona pa Iván y Juan, que se metieron nun más que bon 7º puestu a pesar de dir un pocu reservones, el día que vayan fuerte...

Y quiero aprovechar pa dá-yos les GRACIES públicamente a IVÁN, JUAN y FURU por tener tanta PACIENCIA conmigo, llevame a facer el CASTRÓN esquiando con ellos toa esta temporada y por enseñame tolos truquinos, técniques y conocimientos necesarios pa poder facer esquí de montaña (o de matu jejeje) con seguridá y sentíu común, siempre con bona cara y de manera totalmente desinteresada.

GRACIES.


Visión d'Iván

Después del relatu de Jordi pocu tengo que decir de la ruta, solu me queda dar la mi visión. Al final salí con Juan de pareya, ya facía unos años que non corría ninguna carrera d'esquí y tenía gana. El casu ye que animeme a dir con Juan y casi me saca los güeyos de sitiu jeje, a pesar de non facer lo que me decía (lo peor era que tenía razón jeje), pero la carrera era mui llarga y yo non toi de dir tan rápido y fice lo que me pareció. Vamos, que fui a un ritmo demasiáu conservador hasta el colláu san Carlos, rompiérenme les pieles nel Casetón, otres non pegaban al no tener bien secos los esquís na Mayada de Trulledes y les últimes non me enganchaban alante subiendo a la Hendía, además non comí nada hasta el Samelar después de unes 3 h ya non tenía power, pa variar no-y fice casu a Juan. Vamos que pagué la novatada, pero tuvo mui guapa con descensos de San Carlos y Samelar a cañón con nieve buena, del Casetón a Sotres toco sufrir con nieve mala y poques fuerces.

DESPUÉS FARTUCÁMONOS DE FABES, pa reponer fuerces


Track equí

Clasificación de la carrera

Clasificación final de la XI Copa Asturies d'Esquí de Montaña 2011


Mapa la carrera






Vídeo de Quiñones










2 comentarios:

  1. guapu relatu de la carrera castrones¡¡¡¡¡¡¡¡sois como cabres po los picos jajjaja nos vemos en la proxima¡¡¡¡¡¡¡¡¡

    ResponderEliminar