miércoles, 24 de agosto de 2011

II Trail Valgrande-Payares. 21/08/2011.

22 Km
1550 m+
2h37'45''



Esti añu tocaba acabala sí o sí, l'añu pasáu fice un esguince de tobillu curiosín nesta carrera (nun pude correr la Quebrapates y nel Maratón de Los Lagos mes y picu más tarde tuve que correr col tobillu vendáu y faciendo toles subíes a muerte porque taba en xuegu la Copa d'Asturies y baxando tenía que dir prácticamente caminando) y tuve que retirame, asina que l'oxetivu principal yera llegar y llegar enteru. Amás l'estáu de forma nun pintaba mui bien, tres semanes sin correr a cuenta una rotura fibres, 10 díes en Lorient de comedia, carrera d'asfaltu a tope'l domingu antes (siempre procuro dexar 15 díes entre carrera y carrera, si fago carrera 2 semanes siguíes na segunda nun soi persona...) col consiguiente dolor de xemelos y pa rematar tola semana entrenando como un burrín pa intentar recuperar lo perdíu (sí, yá se que nun se fai asina, pero ye lo de siempre...).
Ye una carrera durina, con muchu sube y baxa rompepiernes y bastante desnivel pal kilometraxe que tien (puede llevar a engañu: "bah, 22 Km, tien que ser llevadera"...) y organízala'l club Avientu con gran ilusión y esmeru, motivos más que suficientes p'apuntala nel calendariu como cita anual obligatoria.
A les 7:00 arrancamos desde Infiestu Susana y yo, llegamos a Payares, visita al "confesionariu" (como siempre colapsáu, entre madrugar y los nervios precarrera...), recoyía de dorsal, acabar d'acicalase pa la ocasión y calentar un pocu y saludar a un montón de conocíos.
La salida dióse d'una manera pocu convencional, un petardu que más bien paecía un barrenu, su güela!!!!, casi morrimos del sustu y eso que tábamos contando col españíu!!!!, vueltina al circuitu d'esquí de fondu y yá veo que nun voi tener el día, ponse Fernando a tirar el primeru y después pásenme Pedro, Santi y Fran y nun soi quien a siguilos.

 Salida en baxada, curva de 180º, esgargachando sobre grava y col corazón nel gorgoberu después del petardazu
¡¡¡Pa matase!!!

Nel circuitu llanu del principiu

Empieza la subida y a caminar/trotar, pásame Rubén y más o menos voi con él pero se que nun voi aguantar muchu tiempu, traigo los xemelos a puntu reventar y a los cuádriceps fálta-yos allegría pa emburriar p'arriba.


 Cara de "¡¡¡sumadre como suben estos desgraciaos!!!"

Susana dándolo tou

Primera baxaduca siguiendo a Rubén hasta que xustu onda taba Fuego (güei d'organizador) resbalo y pego un hostión bastante fotoxénicu, por suerte namás quedó nun sustu. Gárrame Juan Mier y facemos la subida al Celleros xuntos, siguiendo de cerca a Rubén y a Pedro. Otra baxaduca onde yá voi con más calma, se que nun ye'l día y nun merez la pena arriesgar, pa encima la puñetera riñonera que nunca se mueve ta afloxándose sin parar y a cada pocu tengo qu'apretala. Otru repechu pa llegar al Cuitu Negru onda ta l'avituallamientu y yá me saquen Pedro, Rubén y Juan un par de minutos.

Llegando al Cuitu Negru

Nun paro, porque llevo riñonera y l'avituallamientu ta un pocu apartáu, hai que desviase unos metros y prefiero nun perder más tiempu. Nel crestéu hacia'l segundu avituallamientu adelántame David y otru rapaz. Paso'l Km 10 en 1h07'58'' y onde'l segundu avituallamientu paro a beber, equí fue onde retorcí'l pie l'añu pasáu y unu de los que tán ellí tovía s'acuerda. Facemos un flanquéu a media ladera onde algún desaprensivu quitó tolos banderines qu'había pa marcar el camín y encaramos la subida al Trito, con una pendiente elegante de les de verdá, esto tenía que ser lo míu pero nun tamos pa muches comedies, asina que p'arriba como puedo. Gárrame Roberto y facemos tola subida xuntos, pero na parte d'arriba onde la pendiente afloxa un pocu escápase pocu a pocu. Al llegar arriba damos vista al embalse d'Arbás, baxaduca corta onde me pasa Nachón (J.C), repechucu, un tramu llanu mui guapu per onde les Tres Maríes onde me pasa unu del Tierra Trágame, baxaduca y flanquéu pa llegar al avituallamientu d'antes onde m'adelanta l'otru Nachón (Moisés). Agora vien una baxada mui pendiente al principiu y un pocu más abaxu despístome y tiro mui pa la izquierda al dir tan pendiente d'ónde pongo los pies. Óscar Casero que vien detrás pégame un voz y vuelvo al camín, llegamos xuntos al siguiente avituallamientu (Km 15, 1h45'52''), y salimos pitando a pola siguiente subida. Óscar agora va tirando delante, yo voi a lo míu y de repente Amador, que vien pegáu a nosotros pega una voz, esta vez fue él el que se despistó y xiró pa la derecha en vez de siguir de frente. Descuélguenme unos metros pero na siguiente baxada per un bosque de pinos (preciosa) vuelvo a garralos y Amador queda un pocu p'atrás, paez que voi animándome y garrando un pocu de ritmu. 

 Empezando la baxada del bosque coles Tres Maríes detrás, una auténtica pasada!!!

En plenu bosque

Otru avituallamientu y pola última y más llarga subida de la carrera. Va tirando Óscar tol tiempu y veo que per delante la xente empieza a dir xustina, garramos un pasu mui buenu y subimos como tiros, aunque la subida paez que nun acaba nunca y los mios xemelos nun facen más que protestar. Salimos al cantu y nos 400-500 m qu'hai hasta'l Cuitu Negru adelantamos al del Tierra Trágame y recortamos 50'' a Pedro, pero tovía ta a 1'10'',  solo queda baxar los 2 últimos Km peles pistes d'esquí y acaba de dase cuenta que tamos acercándonos, asina que ye mui difícil que lu garremos. Entramos Óscar y yo xuntos nos puestos 12-13 de la clasificación xeneral y 7-8 na categoría Senior. Susana entra nun tiempazu de 3h10' la 2ª d'entre les muyeres y ganando la so categoría, ¡¡NORABONA!!, menuda temporada que lleva!!

 Susana entrando en meta

Oscarín y yo

Susana nel podium femeninu absolutu xunto cola ganadora Beatriz Real y la incombustible y simpática Ana Cristina Aguado



Resumiendo, carrera non mui llarga pero dura pal kilometraxe que tien, mui guapa, variada y mui bien organizada, con espicha y un montón de material tantu na bolsa del corredor como nos premios y nel sortéu, ah, y con cerveza en meta!!! (gran detalle). Personalmente nun tuvi un día mui brillante, pero pasélo bien que ye de lo que se trata, y aunque tampocu fue pa tirar voladores la cosa, fui encontrándome meyor a medida que pasaba la carrera. Noté la falta de Km corriendo y sobre tou caminando nes subides más dures, y acusé (amás bastante) la carrerina del domingu anterior, ye lo qu'hai, que tampocu me va la vida nello...


Perfil


Recorríu

Páxina Web

Clasificación xeneral

Fotos de Rodrigo Vallina

Fotos d'Iván Martínez

(Muches gracies a Iván y a Rodrigo por esi peazu fotos)






Próxima castronada: V Carrera Canón do Sil. 04/09/2011








lunes, 22 de agosto de 2011

Xixón-Cuadonga 21/08/2011

L'otru día atopéme con Ángel y comentóme qu'organizaben los de TANDEM una marcha pa dir de Xixón a Cuadonga. L'asuntu prometía (84 km. y unos 2000 m. +), dempués de facer el GR 105 (Uviéu-Cuadonga) yera la que faltaba pa cerrar el círculu de les peregrinaciones a Cuadonga. La cosa ye qu'al final de Piloña animámonos a dir: Ángel, Chus, Rubén, Jorge (el de Valles), David Ovín, Daniel Samalea, Miguel (el de L'Alpaca) y yo.
Datos
Km: 83,64
Desnivel positivu: 2079 m.
Tiempu empleáu: 7:50
Tiempu rodáu: 5:37
Velocidá media: 14.8 Km/h
Panorámica
Garramos el tren a les 7:22 pa dir a Xixón, que la salida ye a les 9 nel aparcamientu d'El Molinón. D'izquierda a derecha: Samalea, Ovín, Miguel, Chus (solo se ve la calva jejeje), Ángel y Rubén
Dempués del trasbordu n'El Berrón, llegamos a Xixón a les 8:40...
Hai que cruzar Xixón pa dir al Molinón, ponse Samalea de guía turísticu, aunque'l conceptu de los semáforos no lu tenía mui claru, bueno, ni él ni nosotros (lo de ser de pueblu ye lo que tien...)

Ya tamos nel Muro...

Pel carríl bici nel Km llegando al Molinón...
Puntualidá británica les 9:00, gracies al guía...

Vamos reuniéndonos y salimos a les 9:05, 43 chiflaos en bici camín de Cuadonga...
El comienzu ye pela senda que va a Deva, que ye preciosa...
Vimos algo de fauna, un esguil pel cable llegando al transformador y otru más grande nun árbol al llau, pero esti salió borrosu, andar en bici y facer fotos ye lo que tien...
Camín de La Villa, el trayectu ye mui prestosu...aunque moyámonos algo, pero col bochornu que facía prestó y tou...     

Llegando a Amandi...

Camín de Sietes, con tramos perguapos pel bosque,

Fai un calor....
Llegando a Anayo a les 13:45 con bastante fame y secañu...
Anayo
¿¿Quies un pocu chorizu??
Miyares
En La Goleta, Chus como tou lo que fai ye a lo grande, pinchó con una buena punta que non hai sellador que tape jejejeje
Van tener que contratalu d'encofrador, porque viendo lo finu que ye clavando puntes....

Les fotos p'abaxu ye lo que tienen...
El tramu d'Anayo a Cuadonga ye más rodador y faise más rápido, 1:40 a Cangues...

Lo últimu ficímoslo pela senda que ficieren dende l'aparcamientu a la basílica y les primeres rampes ponse pindiu...

Cuadonga
Tiempu rodáu
Velocidá media
Km
Hora de llegada
Al pie de Pelayo d'izquierda a derecha: Jorge, Jose Manuel, Ovín,  Chus, Lavandera, Miguel y Ángel
FIN

jueves, 18 de agosto de 2011

X 10 Milles Intercéltiques de Lorient. 14/08/2011.

Esti branu tocó volver al Festival Intercélticu de Lorient cola Banda de Gaites La Raitana, ye'l festival por excelencia, la meca de cualquier músicu relacionáu cola música tradicional d'influencia atlántica, celta o como lo quieras llamar. Nuna población de 60.000 habitantes, tar nun festival con 5.000 músicos, 1.000 voluntarios, tocar nel estadiu Moustoir les nueches intercéltiques (hai 5 durante tol festival) delantre d'unes 10.000 persones cada día, nel desfile de la Gran Parada de les Naciones Celtes peles cais de Lorient delantre de 100.000 (la retransmisión pela tele tuvo una audiencia de 2.000.000!!!!) o facer un conciertu la banda a les 14:30 (cuando lo que más apetez ye dir a dormir la siesta) delantre 2.000 persones que pagaren entrada, ye dalgo qu'hai que dir y sentilo ellí, nun se puede explicar porque aparte de la brutalidá de les fríes cifres encuéntreste con un públicu maravillosu, respetuosu, agradecíu y entregáu como en ningún otru llau.

La Raitana al completu namás desembarcar en Lorient

Tocando nuna Nueche Intercéltica

Otros años vi qu'había una carrera l'últimu día del festival, les 10 Milles Intercéltiques de Lorient, carrera urbana, per asfaltu y llana. La verdá que la última vez que competí n'asfaltu (y la primera!!!) fue na Milla d'Infiestu nel 2006 y l'asfaltu nun lu puedo nin ver a nun ser p'andar en coche, pero yera una bona manera de rematar el festival d'esti añu. Falé con Stephane, el nuesu intérprete, y mandé-y qu'apuntase tamién a Ricardo.

Ricardo diciendo: "non, nun puede ser, ¿apuntásteme sin dicime nada?, pero, ¿cómo vamos correr con esti arte y encima l'últimu día?"
(Como podéis ver el tema de la hidratación llevámoslu a rajatabla...)

Tuvimos que facer un "reconocimientu médicu" (la médica de guardia del festival auscultónos, mirónos la tensión y díxonos que tábamos como güés) y abonar los 9€ d'inscripción.

El sábadu, pa dir "finos" pa la carrera, fuimos a cenar a una pizzería onde les pizzes nun entraben en platu de lo grandes que yeren. Esi día Stephane fue a pescar percebes pa dir a comelos a la carpa d'Asturies después de cenar, asina que de postre una bona fartura d'ellos...

Stephane cuidando la hidratación a tope...

Pela mañana nun teníamos en qué baxar del colexu onde dormíamos a la salida, pero Stephane ofrecióse a llevanos a pesar de que pa ello tenía que madrugar y eso en plenu festival ye mui h.odíu...

Con Stephane na recoyía de dorsales

Antes de la salida


Según dieren la salida Ricardo sal el primeru igual qu'un avión, veo qu'hai dos o tres que lu miren con gran nerviosismu, al peazu llevanta un pocu'l pie y empieza a dame voces p'animame, el primeru y el segundu empiecen a tirar y aguanto un peazu pero tengo que soltame, el segundu veo que tampocu aguanta'l ritmu del primeru y gárrame y pásame otru grupín de tres que van como motos pero non tantu como los dos primeros.

Al pocu de salir pegáu al segundu


La carrera ye sobre un circuitu al qu'hai que da-y 3 vueltes, al final de la primer vuelta pásenme otros dos pero sigo a lo míu, el primer 5000 pasélu en 17'27'' y a estos ritmos estratosféricos pa mí (3'30''/km) nun veo nada claru que pueda aguantar hasta'l final, pero buenu, si nun ye porque voi mirando'l reló nun me paez que vaya tan rápidu, voi bien de fuelle aunque sé que les piernes nun dan pa dir más fuerte.

Primer vuelta (con bona cara y tou...)


Na parte final de la segunda vuelta engánchenme otru par d'ellos, a estos si que-yos puedo siguir el pasu y aunque van pegándome tirones sin parar unu d'ellos (l'otru fue detrás tol tiempu) nun me suelto, incluso cuando pica un pocu p'arriba meto un pocu de cizaña y consigo descolgalos y ponelos un pocu nerviosos. Beben nos avituallamientos y al ver que yo tiro de llargu y que voi saludando al públicu vuelven a ponese nerviosucos.
Pasamos el Km 10 en 35'41''.

Segunda vuelta col cuchillu entre los dientes...


La tercer vuelta yá ye d'infartu, tironucu a cada pocu, recortando curves pelos bordillos, otru avituallamientu onde tampocu paro y a falta de 500 m y viendo que nadie mueve ficha meto un cambiu de ritmu elegante, descuélgolos un pocu pero a falta de 200 m gárrenme y vuelven a cambiar, yo cambio tamién, esta vez a tope pero ellos tienen un puntín de velocidá más que yo y entren los dos delantre míu, si hai que dar otra vuelta más nun creo qu'hubiesen aguantáu, pero la distancia yera esa y calcularon mui bien. Al final acabo los 16,09 Km el 10º ( y primer músicu!!!jejeje) d'entre unos 400-500 corredores en 57'41'' (a un ritmu mediu de 3'35''/Km), Ricardo entra en 1h05' más o menos (diba col reló de Duardo prestáu y nun supo prender el cronómetru) y na recta de meta pon la faxa, la montera y garra la bandera d'Asturies pa facer una llegada espectacular.

Llegando a meta

Con dellos componentes del Bagad de Lorient


Súper-Richard

Entrega de premios (paez que toi nes Piragües jejeje)


Hidratación y celebaración post-carrera

Playeru desguazáu de Ricardo después de la carrera (cola salida que fizo nun m'extraña...)


Pa recuperar comemos y metémonos nel bus durante 15h pa volver pa casa, acabóse'l festival después de 10 díes y marchamos un pocu tristes, pero pasámoslo como los indios y tamos seguros de que d'una manera o d'otra vamos volver, Lorient y Bretaña en xeneral ye como una segunda casa pa nosotros dende yá va unos cuantos años.









Próxima castronada: II Trail de Valgrande-Payares