martes, 27 de septiembre de 2011

V Maratón Xtreme Lagos de Covadonga. 25/09/2011.

42 Km
2900 m+
2800 m-
4h22'20''

Amaneciendo col Sueve al fondu.


Otru añu más pa esta espectacular carrera na qu'estos 3 ó 4 últimos años cierro la temporada competitiva. Después de mediu añu de carreres (la primera'l 20 de marzu...) hai gana d'afloxar un pocu'l pistón y de salir al monte a caminar, correr, andar en bici, esquiar o lo que sea pero con más tranquilidá, lo que nun quita pa meter l'últimu emburrión d'entrenos en plan pa esta cita cola ilusión de rematar con dignidá una bona y variada temporada.
En principiu nun tenía mui claru si dir a correla a tope o tranquilamente, cola chifladura de dar la vuelta a Piloña nel día prevista pa 15 díes después d'esta maratón, taba metiendo tiraes mui llargues y machacándome bastante, tenía mieu de nun recuperar bien y de nun tener ritmu pa la carrera, pero'l cuerpu asimilaba bien la burrada de kilómetros de monte que taba metiendo, nun tenía molesties y acababa los entrenos enteru y recuperaba pal día siguiente perfectamente; pa encima faciendo series paecía que volvía a recuperar algo de chispa; pues nada, ¡¡¡a dar madera tou lo que se pueda!!!
Madrugón y pa la salida, esta vez d'Infiestu fuimos Ricardo, Sebas y yo. Tán un montón de gallos de los buenos: Santi, Fuego, David de La Cuesta, Txus Romón, Fran, Zígor Iturrieta... más otru montón d'ellos qu'aunque nun tengan tantu nome hai que tenelos siempre en cuenta... Pero habíamos decidíu dar madera y yá desde la salida póngome a tirar a muerte y a ver lo que sal, el que quiera ganar que lo sude... Subiendo a Priena veo que saco un pocu de ventaxa a un grupín de tres (Fran, Txus y Zígor) que van tamién con un pocu de ventaxa respectu al pelotón.
Llego arriba en 23'27'' y nel crestéu pa dir pa La Güesera van garrándome. Txus tira del grupu onde ye p'arriba de correr, a Zígor cuando ye p'abaxu nun hai dios que lu siga, Fran va ehí metíu pero sin enseñar les cartes y yo tiro fuerte cuando hai cuestes dures de les de caminar. Después d'un foyeru Fran da la vuelta a rebuscar entre'l barru'l playeru qu'acaba perder, sigue habiendo un montón de barru aunque esti añu fai bon tiempu. Llego a La Güesera'l primeru en 50'45'' entre un montón de voces d'ánimu: "venga, que vas el primeru", cosa que s'agradez, pero se que colos tres que llevo en remolque nun puedo faceme ilusiones...

Saliendo del avituallamientu de La Güesera

Sebas

Ricardo

En Comeya volvemos a reagrupanos, un pocu de cachondéu colos charcos, subimos pel Escaleru a Buferrera y subiendo les escaleruques de Buferrera o yo nun voi bien o acaben de pegar un tirón... Llego l'últimu al avituallamientu del Ercina en 1h21'55'' y sorprendentemente salgo d'él el primeru, al pocu pásame Txus col semblante seriu y yá me doi cuenta que s'acaba la comedia, Fran y Zígor salen detrás d'él y yo descuélgome un pocu. Onde'l Bricial oigo unes voces, son los castrones de Rubén, Berto y Luis que tán corriendo'l raid y paez qu'anden un pocu desorientaos jejeje, intercambiu d'impresiones y ¡¡mierda!!, que se me van los d'alante. Sáquenme un bon peacín y na subida a La Porra recórto-yos algo, llego arriba en 1h44'02'' y dícenme Iván y Laura (tuvieren siguiendo y animando tola carrera, gracies) que me saquen unos 50''.

Llegando a La Porra

Sé que na baxada va ponese a tirar Zígor como un llocu y nun voi a ser quien a garralos. Amás baxando solu nun voi dir tan rápidu comu si fuese a rueda d'ellos. Como se suel dicir "fue bonito mientras duró", taba claru que'l mio sitiu nun yera esi, pero prestó dir con estos tres grandísimos corredores hasta tan allá, a partir d'agora tenía que facer la mio carrera. Per detrás paez que vienen a 1'30'', asina qu'a intentar mantener esa distancia na baxada hasta Cuadonga. Yá llegando a Cuadonga (2h31'53'') gárrenme Paco (canariu) y Emilio Llamedo, que vienen baxando fuerte.




Arrancamos p'arriba y al pocu pásame primero Sergio (de Béjar) y después David de La Cuesta. A Emilio y a Sergio voi manteniéndo-yos la distancia, pero a Paco yá casi nun lu veo más y David sácanos un bon peazu. Nel avituallamientu de Pozobal tán como siempre los padres d'Amador Priede que tolos años me reciben cola mesma simpatía, sabe mal tener que despedise tan rápidu pero nun ta la cosa pa parase muchu. Después de pistear un pocu llega la famosa subida del aductor (ye raru que nun traben al ponese a caminar p'arriba despues de venir corriendo tantu tiempu...). Veo a Emilio mirando p'abaxu intentando estirar, acaba de quedar agarrotáu pero pocu a pocu va recuperando, póngome a tirar y vamos xuntos hasta l'avituallamientu d'antes del repetidor de Següencu onde ta Pablo Criado (3u nel Tor des Geants, 330 Km y  24000 m+ en casi 90h...menudu animal, norabona!!!) animando.

Avituallamientu de Següencu

Na subida veo a Emilio que se queda y voi recortando terrén a Sergio, al que garro después de llegar al repetidor (en 3h52'19'') y d'un tramu de baxada. Va tirando Sergio tola baxada y depués de saltar el talud de la carretera vemos a David a 1 ó 2', pero aunque Amador (esti añu d'espectador) diz que lu tenemos a tiru sé que nun lu vamos a garrar. Repechucu en Nieda onde encontramos a un montón de xente del raid emburriando les bicis y última baxada hasta meta, onde ta Valentín animando. Entramos Sergio y yo 6y 7u (5y 6u senior) baxando con holgura de les 4h30' y per debaxu del tiempu del vencedor del añu pasáu, pa que vos fagáis una idea del nivel qu'había esti añu...
Qué raru que nun te faciendo'l pijo...


Sebas y Ricardo entren en 5h17' y 5h38', faciendo un carrerón los dos, Sebas que nun la corrió nunca y Ricardo baxando'l tiempu del añu pasáu en ¡¡¡más de media hora!!!
Mención especial pa Fran, que ganó reventando'l reló con unes increíbles 3h55', metiendo 10' a Txus y 15' a Zígor, y pa Santi, que tuvo que dexalo por lesión, a recuperase rápidu. Nerea con 5h20' y Eva con 5h23' ficieren un tiempu buenísimu y Ana Cristina consiguió baxar de les 6h, recortando tamién bastante tiempu respectu del añu pasáu.
Personalmente poques veces acabé tan contentu col resultáu y disfruté tantu d'una carrera, encontréme mui bien y vi tolo qu'había entrenáu reflexáu nes bones sensaciones que tuve. Aparte acompañó'l día y la organización tuvo impecable, gracies por tolo que trabayasteis y por tolo qu'animasteis.

Misión cumplía...

...y con nota!!! (hai que dicir que nun yera tou nuestru, ¿eh?, tropezamos con otros castrones d'Infiestu n'El Polesu y complicóse la cosa...)



Crónica de Sebas

Crónica de Santi Obaya

Crónica de Txus Romón

Fotos (Carmen)

Vídeu










lunes, 26 de septiembre de 2011

Ultra Trail Castrón en Piloña (IV). Descripción Tramu Arniciu-Sotu Dueñes.

32,13 Km
2200 m+
2700 m-
6h20' (corriendo)

Track

Mapa

Perfil


Nesta etapa los tiempos yá se desmadren una barbaridá. Ye'l tramu más técnicu con diferencia y vamos tener un par de pasos delicaos non aptos pa cualquier persona. Nun ye que sean extremadamente difíciles o peligrosos pero hai que tar avezáu a andar pel monte y per galardeyos varios. Nos primeros 19 Kms eché 4h37', asina que podéis imaxinar como ye'l terrén. Pa facelo caminando, pues depende, pero 2 ó 3 etapes; si lo facemos en dos, una hasta Tameces (16 Kms, hai fuente y sitiu p'acampar) o tirar hasta Moandi (19 Kms) pa que nos vayan a buscar en coche, y la otra hasta'l final (13-16 Kms dependiendo d'onde terminemos la etapa anterior); si lo facemos en tres, la primera hasta Traslafuente (11 Kms), la segunda a Moandi y la tercera de Moandi a Sotu.

Vamos a pola descripción: salimos d'Arniciu a pinchu p'arriba a buscar el cantu (en pasando la primer llomba hai un camín que sube hacia la izquierda, ta marcáu con puntinos) pa dir pa la derecha tou cresteando.

Na cresta mirando p'atrás, tamos xustu onde empiecen Los Negros.

El primeru tenemos que bordealu bastante arriba dexándolu a la nuesa izquierda.

Baxamos un pocu a buscar esti pasu...

...pa después subir esta canaluca que tenemos a continuación y saltar l'alambrera del cantu pa pasar pa la otra vertiente pa subir al picu hasta arriba'l tou.

Vista p'atrás prácticamente dende'l picu, vese'l colladucu que taba al final de la canal onde saltamos l'alambrera.

Pa llegar al picu tenemos un pasín aereu con vista pa les dos vertientes, nun tien ninguna dificultá pero convién nun caer... Xustu nel picu volvemos a cambiar de vertiente y tenemos que baxar una canaluca con un arranque de destrepe tapineru...

...y con una continuación de canal mala de caminar, pación llarga y muncha piedra.

Como veis, la cresta de frente nun ye viable. En cuantu acabemos de baxar la canal, tenemos que volver a remontar pa dir buscando otra vez el cantu, onde ta la flecha hai un colladucu nel que sal un senderu que va pa'l Llagu Ovia.

Mirando p'atrás, la baxada pela canal.

Un cachu más alante después de pasar Los Negros. Otra opción pa los menos aventureros ye rodealos pela parte d'abaxu de la foto, veis qu'antes, a la izquierda, vense unos árboles que van baxando, baxar per ehí y después dir remontando'l cantu pelo más cómodu.

Vista de Los Negros a la derecha, Llagu Ovia a la izquierda y Ovia xustu debaxu nuestru.

Encima tenemos el pasu de Traslasenda...

...nel que tamos agora y desde'l que vemos el Cuetón de Les Travieses y Peña Crespa. Tenemos que baxar un pocu y dir remontando después pocu a pocu siempre hacia la derecha.

Vista desde Peña Crespa de tou esti tramu: Traslasenda a la derecha, el bosque que tenemos que cruzar y el Cuetón de Les Travieses a la izquierda.

Vista de la subida a Peña Crespa, el camín fai unes revueltes pa dir a buscar la última canal antes del cantu que sube pa la derecha.

Xustu cuando vamos a salir a la cresta d'arriba'l tou, en vez de xirar pa la derecha y subir un pasu estrechu encaxonáu que nos saca arriba'l tou, siguimos de frente, tenemos l'árbol de la foto de referencia.

Vese l'árbol arriba y tola baxada pela pación sorteando les peñes. Tenemos que tener muchu cuidáu, ye mui pendiente, la pación resbala muchu y hai piedres escondíes, nun nos vamos matar porque tampocu hai patiu pero podemos dar un golpe buenu. Si ta moyáu seguramente la meyor opción sea baxar arrastrando'l culo garraos a la pación...

Tenemos que dir a metenos al bosque dexando l'espolón rocosu a la nuesa izquierda.

Vista completa de tola baxada de Peña Crespa a Pandemules. El bosque ye mui pindiu pero báxase bien.

Agora toca subir a Maoñu.

De Maoñu baxamos a Traslafuente tou pel cantu y al final hacia la izquierda a buscar les cabañes. Hai que saltar un llendador, normalmente tien corriente. Esta baxada tien tamién mucha pendiente, pación que cuando ta llarga patina bastante, furacos escondíos ente la pación y un tramu de cotolla na parte baxa. En Traslafuente cruzamos tola campera pa dir a buscar el camín que sal pa la izquierda que va llevanos a Culebrina, que ye toa esa mancha de prau y árboles que sube dirección al cantu. El Vízcares, presidiendo a la izquierda cola elegancia habitual, vamos pasalu de llargu, pero solo por esta vez, ¿eh?

Remontamos Culebrina tou p'arriba y llegamos a esti pasu que tien restos de camín.

Baxamos hacia la izquierda a la mayada de Xerra d'Aves pa garra el camín que sal pa la derecha dirección al Colláu Los Llaos.

Colláu los Llaos a la derecha, baxada a Piedrafita y subida a Llagos Ciegos y Cuniu.

El Cuniu en mediu de la foto, Maoñu y Peña Crespa a a la izquierda. Al llegar a Cuniu, cruzamos la xerra qu'hai a continuación pa dir a Tameces, yo fícelo en llanu dexando la xerra a la izquierda (na foto, que ta sacada p'atrás, queda a la derecha), pero puede facese pel otru llau perdiendo al principiu algo d'altura.

Tameces col Sueve al fondu y un pocu antes y más a la derecha la Cuesta Bodes, per onde pasaremos más tarde.

En Tameces tiramos p'abaxu y pa la izquierda pel bosque (como non, malu de caminar...) a dir a buscar el cantu que lleva a los praos que tán encima de Moandi.

Tenemos que cruzar varios praos pa dir a buscar la pista a Moandi.

Llegando a Moandi, vese la pista que subiendo al principiu lleva a Fontecha.

Fontecha, siguimos pela pista de la izquierda...

...hasta llegar a El Picu, onde garraremos un peazu de carretera dirección La Frecha/Caldevilla...

...pa cuando lleguemos a un cantu onde  la carretera empieza  a baxar dirección a La Frecha tirar pa la derecha remontando'l cantu. El depósitu d'agua que sal na foto y que ta al pie de la carretera ye una referencia pistonuda.

Cresteamos tou (hai felechu y escobes p'aburrir, aunque paez que nun se pasa hai un caminucu entre escobes per tol cantu)...

...hasta llegar al cantu que cae directu a Caldevilla. Si vamos arrimaos al primer prau que ta a la derecha del cantu tenemos algo menos de cotolla na parte baxa y garramos un caminucu que lleva a la pista d'hormigón...

...que baxando hacia la derecha lleva a Llames de Parres.

Curva cerrada a la derecha, a la izquierda y na siguiente curva cerrada a la derecha...

...tiramos pa la izquierda per esti caminucu que paez que tien qu'acabase al pocu pero que baxa casi a Caldevilla. Esti camín, preciosu, déxanos na carretera a unos 300-400 m de Caldevilla

Carretera abaxu pasando Caldevilla pa llegar a Villar, onde la capilla tenemos que xirar pa la derecha.

Vamos caneyando...

...

...hasta dar col camín qu'ente praos baxa al antiguu puente de Sotu Dueñes.

El camín ta mediu tomáu pero pasase bien, incluso en bici.

Salimos onde les víes del tren, xiramos pa la derecha y onde'l apeaderu cruzamos les víes...

...pa desembocar nel puente...

...que por fin lleva al puntu de partida.

Recuperando fuerces a la sombra, con unos increíbles y asfixantes 32º a mediaos de setiembre.

Queda por fin cerráu'l bucle a la espera del asaltu definitivu pa intentar facelo tou nun día. Espero que la descripción de tola ruta pueda servir pa dalgo y que vos animéis a conocer el conceyu Piloña dende les altures. ¡¡¡Que la cotolla vos acompañe!!!...jejeje...