viernes, 28 de octubre de 2011

Al Vízcares dende Infiestu "atayando" a la vuelta...22/10/2011.

45 Km
3200 m +
8h52'

Recorríu: Infiestu-Cardes-L'Añobal-La Tallada-Braña-Friera-Pendedor-Llarañes-Ñiañu-Andolléu-Vízcares-Traslafuente-Maoñu-Pandemules-Peña Crespa-Traslasenda-Ovia-Los Negros-Facéu-Sellón-Pandoles-Llozana-Santianes-Villanueva-Infiestu

Track (fechu a mano en casa)

Vista panorámica

 Perfil


 Después de la última castronada dixe que daba por finalizada la temporada de xataes corriendo, pero claro, ente que lo de descansar tando buen tiempu nun apetez muchu, qu'esta vuelta yá diba munchu tiempu que tenía gana de facela, que'l volumen de kilómetros acumuláu y el bon estáu de forma nun se podía desperdiciar y qu'había qu'aprovechar los últimos díes llargos antes del cambiu d'hora, pues p'allá qu'arranco un sábadu pela mañana a echar tol día destapinando...
Aunque salgo de casa tranquilín (o eso creo...) nuna hora toi na fuente de Friera, baxando yá pa Pendedor, sigo pel GR 105 hasta Llarañes y llego a Ñiañu en 1h40'. Como algo y arranco p'Andolléu per un crestéu preciosu y entreteníu. Traguín na fuente d'Andolléu (2h04'), qu'echa agua a retorcer, y p'arriba per tol cantu, faciendo una de les subíes más elegantes al Vízcares que se pueden facer (y falando d'esti picu nun ye poca cosa...). Nel picu (2h59', nun creía yo que diba a subir en tan pocu tiempu) encuentro a un paisano con un guah.e qu'acaben de subir pel mismu sitiu que yo y qu'arranquen p'abaxu otra vez, charramos un peazu y despedímonos, como otru pocu y entreténgome un peazu viendo a media docena d'utres volando casi al alcance de la mio mano con gran maxestuosidá (deben tar pensando: "esti con eses pintes pocu va durar equí, agora que munchu que comer nun tien..."). Tiro pa Traslafuente, relleno agua nel bebederu y subo pa Maoñu (3h54'), onde llevanto a 3 rebecos que salen despavoríos namás ver la cara de fame que traigo...Después d'otra paradina baxo a Pandemules y armo la cagada del día na subida a Peña Crespa, voime mui pa la izquierda y acabo subiendo per una canal que dende abaxu ye de les típiques de "bah, paez que se sube" y que cuando tas metíu nella "¡¡¡cagonsumadre!!! que tenga salida per arriba que per equí a ver quien destrepa...". Después d'unos resaltes verticalucos de graduación "tapín difícil superior-peñascu-qu'esmigalla" llego arriba col corazón saliendo pela boca y según miro per onde acabo de subir respígome enteru... Salgo pa la cumbre per una aristuca aerea (4h48') y tiro p'abaxu casi sin parar, les ganes de pisar suelu firme son mayores que les de mirar pal paisaxe... Esti pasu al p'abaxu téngolu controláu, pero subiendo despistéme, cuidadín si vais per ehí que nun hai camín y al dir metíu ente árboles nun se tienen referencies.
Na base de Peña Crespa crúzome con unu que paez que va p'allá, sigo pa Traslasenda y sin novedá llego a la fuente d'Ovia (5h30') onde paro a garrar agua, oigo falar y de repente apaez un grupín de xente en bici que vienen con sede y que nun sabíen bien ónde taba la fuente. Charramos un peazu y póngome en marcha, qu'hasta Infiestu tovía hai pataes.
Paso Los Negros sin mayor problema que'l cansanciu que traigo yá a estes altures (6h11') y sigo cresteando hasta Facéu (7h11'), onde me cruzo con una pareya que baxa p'Arniciu. Otra paradina d'un par de minutos pa comer algo y p'abaxu a buscar el camín real, Sellón, Pandoles, Llozana, Santianes (onde tropiezo con Javier, "¿pero nun dicíes qu'esta temporada yá nun facíes más castronaes?"...), Villanueva y por fin pa casina después d'una bona fundía, yá que llevóme baxar de Facéu a casa 1h39' cuando alguna vez subí en 1h33'...
Acabé cansáu, mui cansáu, pero mui contentu, fueron un par de traques finales espectaculares (la vuelta a Piloña y ésta) pa rematar una temporada corretera mui variada y mui bona.
Agora a ver si nieva d'una vez y tenemos una temporadina d'esquí polo menos tan productiva (que non bona) como la pasada.

Ehí van unes fotos (bastante males, por ciertu) de la castronada, que vos presten.

Vista p'atrás, Infiestu y Cayón dende L'Añobal. El día promete.

Friera

El Vízcares, vese lejos...

Vista p'atrás, Infiestu va quedando empozáu

El Sueve al fondu

Vista de Tebrandi llegando a Llarañes

Tola cresta hasta Vízcares dende Ñiañu

El Peñón del diablu en primer planu y El Sueve al fondu dende Ñiañu

Facéu en mediu de la foto con tol cordal que voi recorrer unes hores más tarde

Vízcares

Impresionantes les vistes que tien esta cresta

Vista p'atrás, Ñiañu nel centru la foto y El Sueve al fondu, dende'l puntu onde se xunten la cresta que sube dende Andolléu y la que vien dende Llanoriu

Lo que queda pa llegar a Vízcares

Vistes nel Vízcares


En Maoñu mirando pa Vízcares...

...y pa Peña Crespa. En coloráu la "Directísima cágate lorito", meyor subir pelo verde, munchu meyor...

Vistes en Peña Crespa


En primer planu la impresionante viesca de Purupintu

Vista p'atras en Facéu...

...y lo que tovía queda pa Infiestu

Sellón

Nel Cantu Les Cadenes

Despedímonos de Vízcares en Pandoles











3 comentarios:

  1. Mui guapa la ruta y les vistes panorámiques. Lo que los datos no faen justicia a lo dura que ye 45 Km con 3200 positivos en casi 9 hores ye que ye un señor bocadillo...

    ResponderEliminar
  2. Señor bocadillo y de los de salchichón, ye verdá que los datos llamen a engañu, paez que 45km nun son pa tantu y el desnivel tampocu ye mui esaxeráu, pero pa echar esi tiempu ye que'l terrén ye duru de narices...

    ResponderEliminar
  3. Menudu castrón estás fechu, asustada me tienes(a Mon ni te cuento)
    Lo de Peña Crespa tienes que contamelo bien, en cuantu Oscar me de el alta tengo que subila... ya me vale :)

    ResponderEliminar