martes, 3 de julio de 2012

Camille Extreme 2012. Isaba, Navarra. 01/07/2012.

31,6 km
2044 m+
3h28'43''

Saludando a Camille

Yá va tiempu qu'oyí falar d'esta carrera, dura y con unos paisaxes impresionantes y que garra'l nome del últimu exemplar d'osu pardu autóctonu del Pirinéu navarru. Cuando tuvimos Furu y yo esquiando a finales del añu pasáu pelos Prineos nuna incursión relámpagu, pasamos pel Valle de Roncal y yá vi qu'había bona materia prima na zona pa que la carreruca en cuestión xustificara'l viaxe en coche de cerca 6 h. Asina que después de tarazar una rodilla esquiando tamién en Pirineos (pero esta vez n'abril), de tar un par de semanes d'absolutu reposu deportivu y un mes sin correr, de dir empezando a funcionar pocu a pocu y de facer 15 díes antes la Travesera pa ver si respondía'l lligamentu, plantéme n'Isaba por fin a correr la Camille Extreme.

Viendo como calcen a los vespinos nesta zona lo d'Extreme tovía va ser verdá y tou...

Les previsiones pal día de la carrera son d'agua, niebla, baxada fuerte de temperatures y munchu vientu, colo qu'hai que dir a la charla técnica pa ver si cambien el recorríu o hai que llevar daqué material obligatoriu. En principiu vamos correr el trazáu previstu y dícennos que nun fai falta llevar nada, aunque recomiéndennos que llevemos algo de ropa por si acasu. 
N'acabando la charla técnica (y sin posibilidá d'escapar, menos mal que duró pocu...) entama una charla d'una nutricionista sobre nutrición y deporte. La verdá qu'aunque nun pudo profundizar quedéme con cuatro o cinco conceptos clave: durante un entrenamientu o carrera ye recomendable, aparte d'hidratase y dir comiendo los famosos hidratos de carbono, dir metiendo proteína pal cuerpu (¿veis como tenía yo razón colos bocatas de xamón o cecina?); l'estómagu vacíase a una velocidá de 1,2 litros por hora, asina que durante un esfuerzu intensu nun bebáis más d'esa cantidá si nun queréis acabar igual que la Fontana di Trevi...; l'alimentación en carrera a base de barrites, xeles y morralla d'eso ye práctica (y carísima, aparte de tener bastantes papeletes de que te siente mal o de que te acabe repunando, esto nun lo dixo la nutricionista, dígolo yo), pero pueden conseguise resultaos igualmente satisfactorios con comida "normal" (plátanos, galletes, chocolate, frutos secos, gominoles, bocadillinos...); la cafeína ye interesante na parte final (bendita cocacola, cómo presta a última hora pa rutiar y asentar l'estómagu...); namás acabar, pa recuperar la musculatura ye fundamental hidratase lo primeru, dir comiendo hidratos de carbono y después proteína (colo que presta un bon chuletón después d'una bona encendía paecíame a mí que nun podía ser malu...); ¡ah! y nel turnu de preguntes nun pudo faltar el cachondu que preguntara si yera bona la cerveza pa la rehidratación post-esfuerzu, a lo que la moza respondió que yera una bebida mui bona, con munches vitamines y minerales y propiedaes antioxidantes, pero recalcó que nun nos excediéramos cola dosis...
Namás acabar la nutricionista, otra charla d'un podólogu pa saber en qué tenemos que fixanos a la hora d'escoyer playeros, y después, por fin, a cenar.
¿Cenar?, ¡¡MI MADRE!!, esta sí que fue gorda, Isaba ye un pueblín pequeñu y mañana vamos correr 300 y picu llocos, asina qu'a les 21:00 ta tou a tope y nun hai manera de conseguir mesa pa dos en nengún llau. "Bueno, garramos el coche y baxamos a Roncal, que tien qu'haber sitiu", tou llenu; "pues siguimos carretera abaxu, en Burgui tien qu'haber daqué", resulta que son ¡¡¡les fiestes del pueblu!!!, que tovía vamos dir pa la cama sin cenar... son les diez pasaes y la cosa pinta mal, preguntamos a un par d'aboríxenes y mándennos pa un chiringu mediu camufláu, nun se ve nada pero la fame aprieta ("venga, tira pa dientro"), hai unes escaleres que baxen y apaecemos nun chigre col suelu llenu serrín, rancheres al altu la lleva, bola discotequera en techu  y tou llenu paisanos cantando (y pasándonse pel forru la llei antitabacu...) al altu la lleva. Preguntamos al camareru si puede danos de cenar y diznos que solo bocadillos, ¡¡bien!!, de fame yá nun morrimos. Una flauta bien curiosina de llombu con pimientos y quesu, una cañina y antes de dir pa la cama un xeláu, menudu estrés a cuenta la cena...
Pela mañana la mesma cantinela de siempre, ¿qué ropa llevo?, ¿llevaré pa beber?, ¿llevaré pa comer?, al final salgo con camiseta de manga llarga (¡menos mal!), una riñoneruca pequeña pa llevar algo de comida (si lo sé nun la llevo...) y unos calcetos que ¡¡mierda!!, son demasiáu baxos y nun me dexen poner les mios queríes polainuques... menos mal que'l día nun ta tan gafu como lu pintaben.

Cola pinza de Sportident pal cronometraxe ("¿y ónde dices qu'hai que meter esto, ho?"...)

 Métennos a toos a calentar nel frontón, tamos dando vueltes alrededor nel sentíu contrariu a les aguyes del reló, yo yá taba mareáu y de repente dame por poneme a dar vueltes nel otru sen; veo a unu que vien de frente a mí y diz: "mecagonla...a, l'únicu que ta dando vueltes al revés que tol mundu, ¡¡¡d'Infiestu tenía que ser!!!" Jejeje, yera Súper, lo que son les coses, dir a coincidir dos d'Infiestu per equí...

Súper y yo, duchadinos y sin goler a castrón después de la carrera

Xustu antes de salir baillen un aurresku n'homenaxe a los componentes de la expedición Bex Everest 1992, los primeros 5 navarros que subieren al techu del mundu y que güei tán equí (unu d'ellos nun pudo venir) corriendo con toos. 


Al ser tantos procuro colocame alante pa que nun pase como na Travesera (venga rises p'aquí y rises p'allá y cuando dieren la salida tábamos los últimos con 300 y picu delante nuestru...), salimos y voi colos d'alante'l tou, paez que nun va mui rápida la cosa pero prefiero nun poneme a tirar.


Al pocu empiecen a dar cera y quedamos namás qu'un grupín de 6, entre ellos Hassan Ait Chaou, Aritz Egea y Fernando Etxegarai, van los tres enseñándose los dientes y vese que tán como xabalinos, pero desde atrás vese a Hassan con una soltura, una elegancia corriendo y una sensación de que va sobráu qu'impresiona. Ye pista bona durante unos 5 km y sin mucha pendiente, colo que'l ritmu ye mui fuerte, yo voi faciendo un pocu la goma al principiu pero acabo cediendo unos metros. Tar sin facer series ni rodar en llanu desde marzu y correr namás una carrera en tol añu (la salvaxada de la Travesera pa esto nun creo que sea mui buenu...) tamién en marzu ye lo que tien...
De toles maneres ye simpáticu ver como van controlándome de regüeyu: "esti castrón, ¿quién será?, nun acaba de soltase nin pa dios...", esta carrera puntúa pa la Copa d'Euskadi y pa la Copa de Navarra, colo que'l nivel ye altu y el personal ta nerviosucu...

Un infiltráu nel grupu de cabeza...


Llega'l primer avituallamientu, vasín d'agua y veo como del grupín d'alante yá se soltó otru, empieza una cuesta mui pindia y adelántolu, después hai que dir per un cantu mui guapu entre árboles subiendo y baxando sin parar, segundu avituallamientu, otru vasín d'agua y un par de gominoles, seguimos pel cantu y gárrame un rapaz de Ponferrada que s'acuerda de mí de veme na carrera del Alto Sil d'esti añu. A tou esto, del grupu de 5 d'alante yá nun volvimos a saber más en tola carrera (¡nin que fueran en moto!). Baxada guapa a Zuriza onde garramos un bon recalentón de frenos y llegando al Altu de Los Navarros el de Ponferrada va dexándome atrás y adelántame otru. Del Altu de Los Navarros (1290 m) al Ezcaurre (2047 m) cronometren la subida y el que la faga en menos tiempu recibe un premiu especial, el Memorial Iñaki Ochoa de Olza, colo que los corredores locales dexen el pelleyu nesta dura ascensión al picu y veo como me pasen otros tres o cuatro bufando a tope, yo a lo míu qu'aunque toi encontrándome mui bien tovía queda munchu y tengo mieu d'acabar pagando la salida tan fuerte que fice. Tou esti tramu ta llenu de xente animando y ye una pasada, el primer tramu ye per un bosque y después ye una subida ente piedres mui pindia hasta la parte final onde suaviza un pocu la pendiente pero yá nun tán les pates pa correr. Arriba fai munchu vientu y munchu fríu, menudu méritu que tienen el montón de voluntarios que tán equí, a mitá de subida había otru avituallamientu (otru vasu d'agua) y nel de la cumbre bebo un vasu d'isotónicu, como un cachu plátanu y garro otru par de gominoles. Arranco p'abaxu per un terrén malísimu pa intentar correr, tou piedrones sueltes, ente'l fríu y l'airón na cara llevo los güeyos llorosos y nun veo nada, pego una zarapicada bien elegante que por pocu dexo los dientes en suelu y otru que me pasa, calma y pocu a pocu, que pa encima la rodilla aunque va bien tovía nun ta al 100% y nun me da la suficiente seguridá pa baxar fuerte, qué vamos facer, ye'l terrén que más me presta pero güei toi esperando poles campes verdes pa poder correr...adelántenme otros dos a tope y depués d'un peazu llegamos a les llombes antes de la baxada final. Hai unes tres subidines cortes pero dures a estes altures de carrera y toi encontrándome fuerte, pero veo a la xente bastante alante, aunque al de Ponferrada pocu a pocu voi recortándo-y, controlo tamién a los d'atrás, paez que-yos mantengo la distancia.


 Súper llegando al penúltimu avituallamientu, na Punta Godía, col Ezcaurre detrás

Otru avituallamientu onde tienen cocacola, pues hala, a face-y casu a la nutricionista y un vasín d'ello antes d'enfocar la última baxada, primeru per un cantu onde cuesta trabayu mantenese en pie a cuenta l'aire tan fuerte que fai y después per una cuesta de pación mui pindia per onde tenemos que baxar a pinchu.
Llegamos al últimu avituallamientu onde yá nun paro y siguimos p'abaxu per un caminucu mui guapu y pindiu ente árboles, otros 3 que me garren, paso de calentame con ellos pa nun forzar la rodilla, tramín de 500 m d'hormigón onde retiemblen toles mueles y otra baxada per un camín mui pindiu y mui malu onde realmente ye difícil mantenese en pie pa llegar al pueblu, garro y adelanto al de Ponferrada (menos mal qu'algunu baxa peor que yo...), veo a Laura esperándome y entro en meta el 15u per debaxu de 3h30', nun tuvo nada mal pa nun haber forzáu muchu y llegar tan enteru, faltóme ritmu de carrera p'aguantar al principiu y confianza na rodilla pa da-y caña baxando, pero la verdá ye que salió la carrera redonda.

Llegando a Isaba de vuelta

Vitamines, minerales, antioxidantes...

Pues esto ye tou, la carrera ye dura y aunque tien dalgún tramu complicáu ye de correr munchu, asina que si queréis dir y nun pasales mui putes, entrenái; ye una zona mui guapa y la organización tuvo impecable, marcaxe perfectu, avituallamientos bastantes (había lo que tenía qu'haber y sobre tou lo qu'habíen dichu, qu'hai carreres onde dicen que van tener esto y lo otro y al final nun tienen nin la mitá...) y comida pa toos después de la entrega premios, aunque faciéndo-y casu a la nutricionista y pa hidratar y reponer proteínes fuimos a una sidrería a comer un chuletón...





Páxina de la carrera


Clasificación xeneral


Fotos







2 comentarios:

  1. Gran cronica! Enhorabuena por el carreron. El año que viene os esperamos. ADI / IKE

    ResponderEliminar
    Respuestas
    1. Gracies, intentaremos volver, si nun ye a correr será a facer monte, y la carrera podéis tar seguros que-y la voi a recomendar a tol mundu.

      Eliminar