jueves, 16 de agosto de 2012

De Moandi a Infiestu. 18/07/2012.

30,3 km
2332 m+
2835 m-
6h08'11''
Track

Collada Moandi-Tameces-Cuniu-Piedrafita-Xerra d'Aves-Traslafuente-Maoñu-Traslafuente-Vízcares-Andolléu-Ñiañu-Llarañes-Pendedor-Friera-La Coroña-La Ñoval-Cardes-Infiestu


Vízcares dende Ñiañu


Tenía un montón de ganes de repetir esta ruta que fice corriendo'l 2 de mayu de 2009 con Marcos Hernández García, gran corredor y meyor persona que nos dexó'l 14 d'ochobre d'esi mesmu añu nun fatídicu accidente llaboral. Yera una manera de face-y un pequeñu homenax a títulu personal que tenía pendiente pa con dalguien que consideraba a tol mundu como'l so amigu, siempre de bon humor y dispuestu a echar una mano a quien ficiese falta. 

Arranco pela mañana en coche hasta la collada Moandi, aparco y empiezo a correr con bastante desgana, dormí mal a cuenta'l calor, lo que fai que tenga un mediu dolor de cabeza que xunto col calor tan esaxeráu a estes hores de la mañana (tovía nun yeren les 8:00 cuando arranqué a correr) eleven los niveles de galbana hasta un puntu en que casi doi la vuelta pa casa. Menos mal que m'acuerdo d'una frase que a Marcos-y facía muncha gracia: "¿a qué vinimos?", pues eso, aprieto'l culo y p'arriba...
Nuna hora toi en Cuniu, nun me veo nada finu y con esti calor menos, asina que güei toca tirar d'oficiu y conservar los muebles, ritmín de percherón y sin munches alegríes qu'amás el terrén nun les permite...
Baxo pa Piedrafita, onde veo un raposu, y tiro pa Xerra d'Aves. Nel Colláu de La Verdá despístome un pocu y cruzo per otru colláu 20 metros más a la izquierda, pero nun hai problema, Culebrina p'abaxu y la próxima parada nel bebederu de Traslafuente, pa garrar agua y ánimos pa enfocar la brutal pandona de Maoñu.
Al final subí meyor de lo que contaba, paez que la maquinaria va engrasando pocu a pocu, pero por si acasu con relativa calma. Llego a Maoñu en 2h12', llevo 9km dende Moandi y 1200m+, como veis la ruta ye corredera... Acuérdome de la de veces que la xente pregunta polos km qu'hai pa dir equí o ellí y les cuentes qu'echen, que si a nun sé cuántu'l km, que si en tantu tiempu sácase bien... Nesti terrén los cálculos tán h.odíos de facer, hai que cambiar el chip y nun pensar en minutos per kilómetru, sinón en kilómetros per hora y sin emocionase munchu...
Otra paradina en Traslafuente pa beber y pa Vízcares, veo un rebañau de rebecos y unes cuantes utres llegando arriba. 13km, 1600m+ y 3h05' en picu y una moscada de su madre, asina que p'abaxu per tola cresta camín d'Andolléu. Tolo que quemaren esti añu (el 2u incendiu más grande d'Asturies del añu, nun sitiu onde nin hai ganáu nin lu habrá nunca, ta hasta cerráu con alambre pa que nun se meta allá'l ganáu y se depeñe... quemar por velo quemar... ye una vergoña l'ausencia de cultura y política medioambiental que padecemos, pa encima paez que fai hasta gracia y tou...) pa lo únicu que sirvió ye pa qu'arranque'l felechu col doble de fuerza, acaben de perdese del tou los caminucos qu'había y acabe tou mediu desertizáu, después munchu paraísu natural y muncha hostia pero estes desgracies nin siquiera son noticia...
Llego a Andolléu, onde aprovecho pa beber, y comienza a metese'l borrín, el día arriba ta guapísimu pero p'abaxu ta cerráu del tou, cuento que polo menos enfríe un pocu, pero ta'l día bochornosu y sigue faciendo calor. Cruzo hasta'l colláu de Ñiañu y subo al picu (18km, 1900m+ y 4h23'), onde xustu arriba vuelve a pegar el sol, pero a la que baxo pa contra Llarañes vuelvo a meteme ente'l borrín. Garro'l GR 105 y voi per él hasta Pendedor y al colláu Espina onde lu dexo pa subir a Friera, onde llego en 5h08' y onde vuelvo a ver el sol por última vez. 
El día que vine con Marcos tiramos pal Picu Colines y después a Coín pa dir a salir a Cardes, esi tramu taba bastante tomáu de maleza y yo nun lu tengo mui controláu, asina qu'aunque llevo gps decido nun arriesgar a dar vueltes y cambio'l tramu final sobre la marcha; baxo a La Tayada pa subir a La Coroña como últimu picu del día y d'ehí baxo a La Ramada, La Ñoval, Cardes y 1,5 km de carretera pa llegar a casa xustu a la hora comer...
Como veis, ruta mui elegante (6 cumbres y casi siempre siguiendo cantos) pero mui montañera, acordáivos, km/h (¡¡Y pocos!!) non min/km...

El día guapísimu

Ñiañu 

Cuniu a tiru piedra, Maoñu a la izquierda y Vízcares nun se ve por pocu hacia la derecha

La Llambria

Rebañu de cabres, en mediu'l camín, ni casu, yá s'apartarán, van apartándose pero de repente apaez el mastinón col collar de carraca, asina que'l que s'aparta soi yo, pero porque quiero, ¿eh?, su madre qué sustu...

Vista dende Cuniu: el colláu de Piedrafita al que tengo que baxar pa subir a Xerra d'Aves y dir a Maoñu (a la izquierda). Vízcares, per onde voi pasar después, a la derecha.

Vista al valle del Semeldón dende Piedrafita

Dende Traslafuente: Picos atrás del tou, un pocu mas p'acá'l Pierzu y tol valle de Vallemoru a los pies

Maoñu a la derecha y más a la izquierda La Llambria dende Vízcares

Y lo prometíu ye deuda, pa Pablo que sigue toles castronaes dende Chile: Ciébana y Lligüeria

Dexando Vízcares atrás

Cuniu a la izquierda de Vízcares

Ñiañu en mediu la foto con tola cresta qu'hai que baxar dende Vízcares. El Sueve al fondu.

Baxando de Vízcares, ta pindiu...

El Colláu Llivís, Valverde y Cuniu mas atrás a la izquierda

Cuniu y al fondu Picos

Peñón del Diablu en Ñiañu

Pa Infiestu nun se ve nada...

Dende Friera vista p'atrás

Peñamayor y La Chamoca a la izquierda


Ramu de San Xuan puestu pola mocedá de Cardes en La Coroña

Adivínase Infiestu, yá queda menos pa comer...


Perfil









2 comentarios:

  1. Si señor, esta ruta ye elegante. Chapooooo.

    ResponderEliminar
  2. Soy Pablo, muches gracies por la foto, cagonros casi me caen les lagrimes viendo estes fotos, estando aislau en esti putu desierto de Atacama. La ruta muy guapa. Saludos¡¡¡¡¡

    ResponderEliminar