jueves, 23 de agosto de 2012

Vuelta castrona a Piloña en BTT "La Piloñesa 2012". 07/08/2012.

Versión 2.0 (correxida y aumentada... pa variar...)
137,18 Km
5900 m+
13h33'44''


Infiestu-Montecoya-Xerra Ques-Collada de Maza-Cuerries-Incosa-Biforcos-Tayones-La Comba-Puente Miera-La Marea-El Moru-Sellón-L'Omedal-Espinaréu-Porciles-La Tayada-Ríu de Valle-La Collada-El Tombu-Torín-Valgoín-El Pindal-Villamayor-Moñes-Pesquerín-El Corralín-La Matosa-La Canal-El Texedal-Moandi-Fontecha-El Picu-La Frecha-L'Arbolín-Caldevilla-Villar-Puente Sotu-Cúa-Sorribes-Cutre-Vallina l'Osu-Sieres-Espineres-La Llama-Fuentes-pel cantu a Robléu-Anayo-La Formiga-Brecín-L'Oscuredal-campu tiro-cantera, llanu atrás y antenes de Cayón-El Pedregal-Biedes-Infiestu



El 18 de xunu de 2011 ficimos una castronada en bici que consistió en garrar el mayor númeru posible de puertos de categoría especial del MTB piloñu y empatalos nuna sola xornada (hai que dicir qu'esto planeóse na cena después de facer el tramu del GR 109 de Panes a Infiestu del tirón, y qu'en dicha cena había na mesa de tou menos agua y verdura jejeje, asina que como buenos asturianos, de fartura y col cerebru con escasu riegu a causa de la h.odía, a ver quién la diz más gorda, el problema ye qu'una vez que se da la palabra hai que cumplila...).
Equí tenéis la crónica de Jorge'l de Valles, equí la d'Iván y equí la noticia que publicó La Nueva España (mira que poneme Moltá...). Salió un peazu rutón de los d'agarrase, aunque por problemas mecánicos perdimos bastante tiempu y nun ficimos tolo que teníemos pensáu (¡¡menos mal!!) porque nun daba tiempu acabalo ensin oscurecenos.

Foto de familia n'Espinaréu de los castrones de la partida d'aquel gloriosu día:
Jorge'l de Valles, yo, Iván y Furu

Esi veranu tengo constancia de que lo repitió Miguel el del Alpaca, aunque él pa rematar la ruta subió a Cayón y nun tengo noticia de que lo hubiese fechu más xente (polo menos del tirón). Asina qu'esti añu tocaba intentar facelo de nuevu. En xunu, preparando la Travesera, garré la bici pa intentar repetilo, empezó a llover a l'altura Espinaréu y en Villamayor (a onde llegué en 5h24', mui bien pero caláu hasta l'alma) sabiamante decidí dexalo pa otru día...

Esi día ye'l 7 d'agostu, martes, día raru pa facer una d'estes pero que si dir a tocar de fin de semana, que si más castronaes pendientes que s'empiecen a amontonar, que si empiecen a menguar los díes, que si entra una ola de calor pa mediaos de semana y puedo morrir achicharráu nel intentu... nun se fale más, preparo'l día antes una buena maconada de comida y el martes a eso de les 7 y pocu de la mañana arranco.

Salí bien tempranín porque amás de repetir la vuelta del añu pasáu, quería meter dalguna cosina más:
- Na collada Cuerries, en vez de baxar pa Biforcos de frente, subir primero a Incosa pa facer completa una de les subides más mítiques de Piloña.
- En La Matosa, en vez de tirar pa Sevares, subir hasta Moandi y Fontecha y baxar per tol cantu hasta'l puente Sotu. 
- Subir a Espineres (otra subida mítica, y más per Sieres, l'añu pasáu onde El Frade tiramos yá pa La Llama).
- Subir a Cayón, que l'añu pasáu nun dio tiempu porque oscurecía.

Onde la salida de la variante Infiestu un coche méteme unos buenos pitíos, ye Furu que va a trabayar y yá lu veo meneando la cabeza, imaxínomelu diciendo "cagonlamadrequeluparió, ¿qué castronada traerá esti animal entre manos?". Voi pela carretera xeneral hasta Montecoya y garro la pista, Xerra Ques, Collada Maza y baxada trialera y disfrutona pela caneya que va dar a Cuerries. Subida hormigonada hasta la Collada Cuerries y pela pista pendiente y suelta hasta Incosa, bon recalentón de pates. Vuelta a baxar a la Collada Cuerries y otra baxada entretenía hasta Biforcos, enfoco la terrible subida a Tayones y la técnica baxada a La Comba, el camín cada vez ta peor, una trinchera llena de morrillos gordos y cada vez más cotolles que dificulten el descensu, colo que tengo qu'apoyar dalgún pie. En La Comba casi tengo un encontronazu con una vaca a la salida d'una curva rápida (menos mal que-y dio por saltar al prau de la parte abaxu...) y en un momentu llego a Puente Miera. Tiro pela carretera hasta La Marea, subo a El Moru y garro la pista a Sellón, peazu subida y peazu baxada a continuación, primero una caneya empedrada y embarrada mui difícil de baxar hasta L'Omedal y después una baxada rapidísima per asfaltu hasta Espinaréu.

Otra subida de meter mieu, la carretera a Porciles, y después la pista que sigue p'arriba, con un par de rampes de lo más pendiente que pueda unu imaxinase. Mediu llanéu pa llegar a La Tayada de Cardes y otra baxada disfrutona y técnica con barru hasta'l Ríu de Valle. La subida a La Collada, sin comentarios, rampes d'hormigón  casi verticales y una vez na Collada, el caminín que sube a El Tombu empieza con un muru mui pendiente pela campera y acaba con un pasu trialeru entre piedres de subida qu'esixe sacar el máximu d'unu tantu física como técnicamente, pero hai un tramín d'unos 3/4m demasiáu rotu nel que nun me queda más remediu que posame. Sobra dicir que'l llegar arriba y andar en bici tola llomba d'esti monte ye una esperiencia única, presta rodar pel prau y dir contemplando las grandísimes vistes que tien esti modestu pero perguapu monte. Toca concentrase de nuevu, la baxada monte a través pel cotollal pa dir a salir a Sabornín nun ye apta pa cardiacos, la inclinación ye brutal y vas continuamente a puntu de apilancar p'alante, dalgún tramu tengo que baxalu cola bici de ramal, val más llegar abaxu con tolos dientes en sitiu...

Garro la pista que baxa a Llanuderos y d'ehí pela carretera a Cañún y a Valgoín, onde garro'l caminucu que sal a El Pindal, pista a Carúa y carretera pa subir de Villamayor a Moñes y Pesquerín. Pista a El Corralín, con unes rampes esaxeraísimes pa llegar a La Muezca, y llegando a El Corralín, a mano izquierda otra baxada cotollera bastante técnica pa garrar la pista que baxa al Ríu Color y a La Matosa. Pela carretera tiro a La Canal y el Texedal y baxo a garrar la carretera a Moandi. Subidina d'unos 4/5 Kms a la sombra per esta carretera tan guapa y solitaria a les tres de la tarde y en llegando a Moandi garro la pista a mano izquierda a Fontecha. 

Baxada rapidísima pela pista hasta El Picu y después pela carretera: La Frecha y desvíome más abaxu a la derecha pa dir hasta El Arbolín pa, al empezar a baxar hacia Llames, garrar un caminucu mui guapu a mano izquierda que me saca otra vez a la carretera que baxa a Caldevilla, Villar y caminucu al puente de Sotu. 

Subo pela carretera a Cúa, Sorribes, Cutre y garro la pista que sube per La Trapa a la Vallina l'Osu. Baxo dirección Muñío y desvíome a la derecha per un caminucu guapísimu pero mui técnicu que va dar a Sieres, ta bastante tomáu de maleza pero menos una subida al principiu que nun queda más remediu que facela de ramal, más o menos pásase (a estes altures yá nun vamos andar con remilgos...). 

Llego a Sieres y ¡¡BUFF!!, subida a La Cruz, La Raíz y ¡¡¡ESPINERES!!!, ta metiéndose'l borrín (pa variar en Sueve pela tarde...) y paez que refresca algo, cosa d'agradecer. Onde la fuente Espineres paro a garrar agua y pegame un homenaxe vía bocata, voi meyor de lo que pensaba que diba dir a estes altures, aunque voi cansaúcu y duélenme les almohadilles de los deos gordos de los pies, pero sé que nun par d'hores yá ta l'asuntu liquidáu. 

Bien fartucu baxo a tou trapu pela pista hasta La Llama, carretera a Fuentes y pa la derecha pela pista que sube a la llomba que baxa a Robléu, caneya a Anayo, pistuca a La Venta, Pidrabeya, La Formiga y El Brecín (esti tramu ye común col Ultra Trail Castrón que ficimos n'ochobre del añu pasáu). L'añu pasáu, cuando lo ficimos en bici, de La Formiga fuimos directos a la carretera Incós, pero'l tramu de caneya que baxa de La Formiga a El Brecín ye mui guapu de baxar, aunque des un pocu de vuelta y después tengas que facer un pocu más de carretera. Una vez en Pintueles tiro pela carretera dirección a Incós pa dexala en cuantu xira a la derecha y garrar el caminucu a L'Oscuredal, salgo a la carretra Pintueles otra vez y baxo per ella hasta'l campu tiro, última subida, Cayón, pero voi tener que dar dalguna vueltuca porque nel zigzag de la cantera d'El Calzáu encontré'l día antes trabayando a los que tán sacando madera y nun ye plan de pasar pel mediu les máquines. Onde la cantera d'atrás dexo la pista asfaltada pa garrar la que sube al cruce de la campera, pero antes desvíome a la derecha pa dir pel llanu d'atrás hasta'l final, xiro pa la izquierda pa subir pel cantu a les antenes (mítica la rampa pendientísima y suelta pa llegar al vértice xeodésicu, otra vez a sacar lo pocu que queda yá de físicu y de técnica cola rueda esgargachando al límite...) y agora sí, p'abaxu y yá nun toca subir más. Campera, pista de Pascual, desvíu a la derecha pa baxar pel camín d'El Pedregal y llego a la fuente de Biedes onde voi pegar un manguerazu a la bici, que yá lu va mereciendo la probe. Fago unos 15/20' de cola (tán llenando garrafes pa dar de beber al ganáu) qu'aprovecho p'acabar la comida que me queda, manguerazu y pa casina.

Al final salió una media d'unos 11 Km/h en movimientu (como l'añu pasáu), pero unos 33 Km y 1000 m+ más.

Tovía queda dalguna cosa pendiente más, como subir a Les Praeres o a Ogavia, pero ye que nun tienen salida lóxica pa la bici pa empatalo colo demás (d'Ogavia a Moandi cola bici a llombu... como que non, val más volver a baxar a La Matosa y subir a Moandi pela carretera, y de Les Praeres a Tayones... sin comentarios...), sedría subir por subir y volver a baxar pel mesmu sitiu pa continuar ruta (como lo que fice al principiu subiendo a Incosa, pero buenu, eso ye más cortín y nun pierdes muchu tiempu). Asina que pal que-y quede la ruta corta yá tien un par d'opciones p'allargala...

Ehí vos queda'l track, esta vez grabáu col gps de verdá, y si vos sirve pa conocer dalgún rincón o camín de Piloña desconocíu pa vosotros o pa garrar un bon dolor de culo pedaleando, doime por satisfechu. La ruta ye mui esixente tantu física como técnicamente pal machaca que quiera facela del tirón. Pero nel apartáu técnicu, con posase onde les dificultaes sobrepasen el nuesu nivel, asuntu solucionáu. Y nel apartáu físicu, con tirase abaxu onde temos cansaos y volver a retomalo otru día...

¡¡¡Que vos preste!!!



Datos


Perfil (menudu serruchu...)



PD: siento nun poder poner ninguna foto, pero'l día nun yera precisamente de los de dir cola cámara...





2 comentarios:

  1. Sin comentarios:
    ¡¡¡IMPRESIONANTE!!!

    ResponderEliminar
  2. Impresionante ye...pero normal, normal...
    A mi ya me duel el culo de pensálo, y eso que no lo conozco tou.
    Tas como un xabalín.
    VIEYU

    ResponderEliminar