miércoles, 24 de octubre de 2012

I Desafío Cantabria. Ultra Trail del Mar a la Montaña. 20/10/2012.

88 Km
5600 m+
4700 m-
13h34'03''


¿Una carrera de San Vicente de La Barquera a Espinama pasando per Peña Vieja?, pues sí, tamos tochos del tou, namás que lo vi quedéme cola copla, y si cuadra...
Al final cuadró, fecha mala climatolóxicamente falando (demasiáu tarde pa subir tan altu) pero buena porque, polo menos yo, yá lleves un montón de volumen d'entrenamientu de tol veranu y ye una manera elegante de rematar la temporada.
Taba previstu subir pela Canal del Vidrio y baxar pela Canalona, pero tando la semana anterior a la carrera lloviendo sin parar, la organización decidió cambiar el recorríu d'Aliva p'alante. Na Canal del Vidrio, nel pasu más complicáu, taba'l día antes de la carrera baxando agua y piedres sin parar, y amás, na parte d'arriba yá teníamos la primer nieve de la temporada y unes temperatures demasiáu fríes como pa garantizar la seguridá de tolos participantes, asina que recorríu alternativu, con un par de kms más que l'orixinal y casi'l mesmu desnivel positivu, pa que nadie proteste porque quede una "mariconada" de carrera...
El vienres tenemos cena antes de la carrera y charla técnica pa explicanos el cambiu de recorríu. Asturianos tábamos apuntaos 16 pero al final somos algún menos: Maxi, Gilberto, Joel, Rubén, Jorge, Alejandro y yo. Cenamos a les 21, tomamos un café, cambiámonos y yo a les 23:00 póngome a desayunar... pa estes xataes siempre lo fago, desayuno antes de salir sea la hora que sea, bastante descentre ye tener que correr tola nueche como pa encima tener que pasar fame...

Ambientín na salida

Con cara de nun querer saber lo que m'espera...

 La salida ye na playa, música al altu la lleva d'ACDC, Bruce Springsteen, Deep Purple... l'adrenalina saliendo peles oreyes y salida quemando suela, cruzamos tol puente, damos una vuelta per tou San Vicente (la xente de comedia flipando cola banda de trastornaos que tán viendo) y seguimos a un ritmu infernal per carreteruques, pistes y caminos de bastante buen firme, aunque hai dalgún qu'otru tramu de barrizal. Rápidamente fórmase alante'l tou un grupín de 6/7, onde voi metíu al principiu, faciendo un pocu la goma después, y d'onde me suelto después del avituallamientu de Gandarilla (onde namás me dio tiempu a garrar mediu plátanu) nun ataque de lucidez (1h02' pa los primeros 13 Km, teniendo per delante lo que tenemos...). El siguiente tramu hasta Cades voi más o menos con Jorge, subiendo quédase un pocu pero nes baxaes y nos llanos arráncame les pegatines, asina que voi garrando'l mio "ultrarritmu", procurando ser sobre tou constante, sin cebame nos tramos rápidos pero subiendo a buen ritmu. Los d'alante van garrando metros pero seguimos viéndolos. De repente métennos a baxar per un prau con caballos, nun se ven marques y el voluntariu qu'había a la entrada dizme que tire p'abaxu, coño, p'abaxu sí, pero ¿pa la izquierda, de frente o pa la derecha?, "p'abaxu, p'abaxu", pues p'abaxu, nun se ve nada, ta llenu sucos y da la impresión qu'en cualquier momentu van tiranos un quesu rodando pa que salgamos detrás d'él jejeje, pero de repente vemos a otru voluntariu faciendo señales cola llinterna.
 Llegamos a Bielva, baxamos unes escaleruques de cerca 300 escalones y llegamos a Cades, segundu avituallamientu, Km 21, 680m+, 600m- y ¡¡1h47'!!, como nun tranquilicemos un pocu más col ritmu nun llegamos nin a Lebeña. Salimos Jorge y yo xuntos subiendo per una pista primero, después per un senderucu onde lu dexo atrás, llaneo y baxo un tramu con bastante piedra y barru pa llegar a un avituallamientu líquidu y sigo cola subida al Colláu d'Arria. Lo de que yera tou corrible y rapidísimu hasta Lebeña, bueno, a peazos, porque la subidina al final ye montañera montañera y la baxada de después, tela, eso sí, ta preciosa, vense abaxo'l tou les luces de Los Pujares y ta tol camín marcáu con unos faroles blancos, pa encima nesti tramu voi completamente solu, asina que la estampa ye máxica. Subo la potencia del frontal y baxo concentráu. Cuando acaba'l tramu de baxada técnicu sigo per un camín y de repente veo los cuatro intermitentes d'un coche d'espectadores "espontáneos", paez que la noche los confunde jejee, empéñense en que salte una alambrera con 8 alambres d'espinu porque'l camín tien muchu barru y vase meyor pel prau (según ellos), por supuestu doime cuenta del percal y nun-yos fago casu... Garro un tramu asfaltáu y despues un camín, adelántame unu y siento a otru par d'ellos detrás, nun sé cómo despístome na entrada a Cicera y pásenme los dos mientres toi peleándome con un alambre d'espinu al saltar un portelleru, unu d'ellos ye Jorge que vien con calambres. Otru avituallamientu (Km 36, 1800m+, 1200m- y 4h03', lo de "casi" llanu...) onde tomo un caldu y yá me voi dando cuenta que la carrera nun fai más qu'empezar. Na subida al Colláu Arcedón gárrame primero David y después Sergio Besoy, de Brez, l'ideólogu d'esta movida de xuntar el mar con Peña Vieja, col qu'acabaré faciendo'l restu de la carrera hasta meta. Despistámonos nel colláu ente les marques fluorescentes y el reflexu de los güeyos de les vaques, asina que saco'l gps y nun momentu tamos na interminable y machacona baxada a Lebeña, onde nos adelanta José Vicente Benito igual qu'un obús.
 Llegamos a Lebeña, Km 44, 2250m+, 2030m- y 5h20', equí hai avituallamientu potente (pasta, caldu, té del puertu, bocadillos, y aparte tráente una bolsa por si quies cambiar de ropa, calzáu o meter comida propia) aunque nun paramos muchu, lo xustu pa comer y beber daqué y rellenar los bolsos de comida por si acasu. Salimos Sergio y yo sabiendo que queda la mitá en distancia pero más en tiempu, pero animaos porque llegamos hasta equí en un tiempu mui buenu y tamos bastante enteros, y amás empieza la parte más montañera. Unes buenes rampes pa subir a Allende y a Cabañes, un tramín cortu d'asfaltu hasta Penduso, otra buena subida hasta la fuente Culudre y después mediu llanu hasta l'avituallamientu de los Puertos d'Ullances (Km 54, 3250m+, 2350m- y 7h15'). Tán unos amigos de Sergio per ellí animándolu y tán acoyonaos col ritmu de subida que traemos, un par de vasos de té, comer algo y seguimos. Queda pocu pa qu'amanezca y comentamos lo llarga que se ta faciendo la nueche y que menos mal que nos asociamos, tou esto solu, de nueche y cola kilometrada que llevamos... ye lo típicu que si nun vas con alguien ye una agonía porque nun sabes si vas bien, si vas mal, si demasiáu rápidu o si demasiáu acomodáu, pa encima como lo conoz, va cantándome los tiempos y ¡¡hasta les piedres!!, dizme que si tou va bien llegamos a Espinama entre 13 y 14h, al principiu nun lu creo (contaba facer unes 15), pero viendo que los parciales ente avituallamientos ta clavándolos habrá que face-y casu...
 Yá quier amanecer, tramu embarráu aparentemente llanu nel perfil pero rompepiernes (nun hai grandes desniveles pero tou suma) y llegamos al avituallamientu de Brez col frontal recién apagáu (Km 64, 3760m+, 2750m- y 8h34'). Salimos a pola subida al Colláu de Cámara, comienza'l rock&roll, senderu estrechu a media ladera y después un peazu cuestón, empiezo a arrepentime d'haber decidíu dexar los bastones en casa media hora antes de salir pa San Vicente después de llevar tola semana pensando si los llevo o non... polo menos veo que sigo subiendo bien. El ritmu ye altu, porque nun momentu que me despisto llegando al colláu garrando algo pa comer, Sergio sácame unos cuantos metros que nun soi a recuperá-ylos hasta l'avituallamientu d'Áliva (Km 70, 4700m+, 3000m- y 10h20'). Otru té, comer otru pocu y apaez José Vicente Benito, coño, perdióse y por eso lu adelantamos sin velu. 

Forrando n'Áliva...
 

...y saliendo col bocáu en boca

Salimos pa la Horcadina de Covarrobres los tres, pero José Vicente va como un auténticu cañón y sube destapinando, nosotros dos siguimos bien pero vamos a tomalo con un pocu más de calma y yá empezamos a goler la meta, sabemos que si tou va bien como hasta agora, nunes 3h-3h30' tamos en Espinama. De la Horcadina a Igüedri ye tou de correr picando p'abaxu, a estes altures resulta un pocu pesáu, pero al llegar a la Portilla del Boquejón oigo unes voces animándome, ye Chus, conocila xunto con Toño y Fonso (los 3 de la zona) na Chamonix-Zermatt l'inviernu pasáu y agradezse un montón a estes altures de carrera los ánimos d'alguien conocíu. 

Llegando a la Portilla del Boquejón

¡¡Cómo presten los ánimos a estes altures!!
 

Queda la última y dura subida al Colláu Valdecoro, por primera vez en tol día siento sensación de fame, por si acasu vuelvo a comer y dígo-y a Sergio que coma, ta pasando una pequeña crisis pero ye duru y con algo que come y bebe volvemos a la carga y antes de danos cuenta tamos nel colláu. Acoyona ver la baxada que tenemos delante, tol circu de Fuente Dé prácticamente a pinchu. Pocu a pocu llegamos abaxu onde tán un montón de compañeros de trabayu de Sergio esperando p'animalu, y onde la entrada al teleféricu, ¡¡Coño!!, ¡¡ún d'Infiestu!!, Tolivia con Inés que tamién nos animen pal últimu tramu que nos queda. Subidina per pista y después tou en llanu y p'abaxu, aunque yá nun queden ganes de correr muchu, vamos 9u y 10u
y detrás nun se ve nadie, colo que yá cumplimos de sobra. Pa encima, nel avituallamientu d'Áliva taba l'alcalde de Camaleño y díxo-y a Sergio: "¡¡Coño!!, ¿yá tas equí?, si llegues ente los 10 primeros doite 50€", asina que vamos riéndonos pensando nos 50€ que va tener que posar si quier quedar como un paisano. De repente apaez ún de la nada y adelántanos, bueno, dexo a Sergio entrar delante y sigue tando'l 10, pero vemos detrás a otros dos o tres, asina qu'arrancamos a correr nun vaya ser... Recortamos un cachu al que nos acaba d'adelantar pero dase cuenta y aprieta otru pocu. Llegamos a Espinama en 13h34'
10u y 11u, al final ficimos un carrerón. 

Entrando n'Espinama...
 

 ...después de 88 Km y 13h34' de comedia...


 

Con Laura y mio padre

 Cocíu lebaniegu pa reponer...

...y pa San Vicente a tomar algo. Con Maxi y Gilber tomando una merecía caña xustu nel chigre que taba onde la salida.

Del Mar a la Montaña y volvemos al Mar. D'equí a los montes que tán al fondu a la izquierda detrás de la niebla ye la burrada qu'acabamos de facer

Tarde espectacular pa dar un paseo.

Soltando les pates el día después...

...eso sí, ¡¡con cuidáu!!

Antes de la entrega premios y d'una espectacular parrillada, ¡¡cómo taba la ventrisca de bonito!!
Joel, Maxi, Gilberto, yo y Rubén, los 5 irreductibles astures que conseguimos acabar, ¡¡Qué bravos sois!!

Con Sergio, ¡¡Norabona, campeón!!
Por ciertu, l'alcalde de Camaleño cumplió colo dichu y dio-y los 50€ jejeje

¡¡Ah!!, y sesión de rehidratación y batallines n'Infiestu colos dos castrones Iván y Furu que xunto con Jorge Egocheaga veníen de quedar segundos nel TriRaid  Picos d'Europa, ¡¡¡GRANDES!!!



Personalmente por esti añu cierro'l chiringuito, contentísimu y con buenes sensaciones en distancia llarga, que siempre se m'atragantaba bastante. Paez que'l trucu, aparte d'entrenar y entrenar y entrenar... ye dir conociéndose, comer y beber a cada pocu y llevar un ritmu cómodu, sin dormise pero sin calentase más de la cuenta.
Norabona a la organización, viendo esta primera edición seguru que vamos tener Desafíu Cantabria un montón d'años, carrera mui recomendable, mui montañera (por muchu que los primeros kms sean rápidos), guapa y dura, con un preciu mui axustáu (48€) y con un tratu espectacular pa col corredor: cena'l vienres, comida'l domingu, buenos avituallamientos, llevábente un bolsa al Km 44 y otra a meta, bolsa de corredor completa, de detalle pa los qu'acabamos un peazu malles... y sobre tou un equipu de voluntarios amabilísimos y volcaos por completu cola prueba.

¡¡¡Gracies a toos!!!






2 comentarios:

  1. enhorabuena!, muy prestosa la crónica
    un saludu
    Angel

    ResponderEliminar
  2. Tas intratable x algo yes agora el castrón alfa
    Muy prestosa la entrada

    ResponderEliminar