domingo, 23 de marzo de 2014

VI Carrera Alto Sil. 16/03/2014.

32 km
1900 m+
3h16'52''


Otra vegada más en Santa Cruz del Sil, como siempre, últimu fin de semana del inviernu y primera carrera de la temporada. Tamos tovía a media temporada d'esquí pero hai que dir a pasar la ITV, a ver si la maquinaria ta a puntu, pa encima a los que corrimos toles ediciones resérvennos dorsal, polo que nun se pue faltar.
A pesar de saber que nun voi tener ritmu carrera (de xueves tovía cayeren 8 horines d'esquí per Picos... buenísimu pa la zancada pa correr el domingu...) fago una salida especialidá de la casa, en 150 metros yá voi'l primeru, aunque al pocu pásenme Saúl, Zaid y Merillas. Facemos grupín con Raúl y Manu y al empezar la primera baxada pel cortafueos pásame Santi. Casi me da la risa cuando llevanto la vista y yá veo a Saúl y Zaid enfrente a media subida d'El Muro, ¡¡mi madre cómo van!!

 Subiendo El Muro.

Na subida aprieto a ver como va'l personal y póngome cuartu, na baxada a Páramo pásame Raúl y solo me garra Manu entrando al pueblu, aunque Santi y Arca vienen cerca.



 Llegando a Páramo con Manu, igual que l'añu pasáu.

Na subida a La Campona van dexándome atrás Manu, Santi, Raúl (diba delante pero perdióse y garró una bona pulmonada'l probe pa volver a pillanos) y Arca, nun voi mal pero nun hai más ritmu nes piernes.

 Camín de La Campona con Manu y Santi.

Baxando de La Campona a Primout.

Primout.

Al empezar a baxar a Primout la xente que ta animando diz: "Venga, campeona", ¡¡coño!!, ¿con estes pates peludes como un osu y confundiéronme con una muyer?, miro p'atrás y Ana Conde a puntu garrame, ¡¡h.oder, nun me puedo entretener!! Llego a Primout y paez que la distancié na baxada, fago más de mediu tramu al llau del ríu solu, nun tengo referencia y nun sé si voi rápidu o despaciu y de repente oigo zapatear detrás, Rubén y Ana. Ponse Rubén a tirar y veo que cuando diba solu diba más despaciu de lo que podía, voi cómodu detrás d'él y al peazu póngome yo a tirar.

 Ún de los muchos tramos acuáticos, antes de la última subida.

Llegamos los tres xuntos a la última subida y póngome a tirar a tope, "equí suéltolos fiju" pienso pa mí. Rubén quédase pero Ana sigue ehí. Veo a unu caminando tranquilamente, pero pa tar viendo la carrera véolu mui "preparáu", al acercame veo que ye Saúl, dizme que va col estómagu tocáu y que quedó sin gasolina, mui elegante'l xestu d'acabar la carrera a pesar de tou. Pásame Ana y nun doi créditu, toi encontrándome mui bien, toi dándo-y a tope, estes subíes d'andar ye lo míu y nun soi a siguila, ¡¡la madre que la parió, cómo sube!!, a ver si con suerte na baxada soi a garrala.

¡¡Más agua!!
Yo contaba con qu'esti yera l'últimu repechu pero...

...quedaba algún otru, polo menos equí pusieren puente pa cruzar la riega...

Nun se por qué contaba que la baxada diba ser como siempre, pero metieren unos cambios al final mui guapos pero que nun contaba con ellos, unos cuantos repechucos más, una baxada per una caneya-ríu mui guapa y entrada a meta en subida, guapu pero Saúl (padre) adelántame al principiu de la última subida y casi na mesma meta failo Carlos.

 ¿Acabóse yá, ho?

Al final el 10 na xeneral y mui contentu pues acabé mui bien y mui enteru. Ana metióse la 7ª y ojo a Leire Fernández Zabete, creo que tovía nun cumplió los 16 añinos y llegó 10' por detrás míu, la 17ª!!
La paella como siempre espectacular y más compartiendo "mantel" col gran Higinio y Estrella y con Iñaki y Olaya



3 comentarios:

  1. Una crónica muy guapa Jordi, bueno y tú carrera ya no digamos, la primera del año y ahí en cabeza como un león batiendo el cobre.

    Un saludo desde tierras Galaicas.

    ResponderEliminar
  2. Norabona Jordi,

    Pa entamar pol carrerón que ficisti. Nun ye cenciellu llegar tan alantre col nivel tan altu qu'hebía esti añu nel Altu Sil. Segundu pola crónica, que ta bien fecha, explica bien lo que ye la carrera y además ye mui prestosa. Por últimu munches gracies por escribir n'asturianu. Nun ye fácil atopar daquién que escriba na nuesa llingua llariega y ya fai falta que perdamos la vergoña y pongamos en valor la vieya llingua de la nuesa tierra.

    Por ciertu, cuandu tu llegaste a meta, taba yo entovía entamando el camín de baxada a Primout (podías haber dao 2 vueltes al recorridu y hubiesemos llegau xuntos)

    Col tu permisu quedome per equí pa seguir les toos evoluciones (y la del restu de castrones) y añado el'enllaz del tu blogue al miu blogue de carreres por montaña.

    Vemonos corriendo per montaña collaciu,

    ResponderEliminar
  3. ESPECATCULAR crónica a la altura de AltoSil, las fotos de 10. Un fuerte abrazo y espero volvernos a ver el próximo año, mientras el cuerpo aguante nuestras naranjas no van a faltar a su cita.

    Isma (MeGustaLaNaranja.com)

    ResponderEliminar