Un añu más (y yá van 3) vuelvo a Santa Cruz del Sil a la primera carrera de la temporada, esti añu somos casi 400 corredores (¡unos 60 asturianos!), lo que da idea de la magnitú d'esta fiesta del corredor y de lo bien que trabaya la organización, los voluntarios y tolos vecinos del conceyu; el pueblu ye como Argandenes y ta completamente volcáu col eventu, ye increíble como pregunten a tol mundu que d'ónde vienes, que qué te paez el pueblu, la carrera, como animen a toos por igual...asina da gustu y corre cualquiera!!!
El sábadu hai carrera pa guah.es, banda de gaites amenizando la tarde, visites guiaes a una mina y el domingu aparte de la carrera tienen guardería pa los neños de los corredores y paella pa toos n'acabando la carrera.
La carrera entama a les 9:00 con algo de fresquín pero nada que ver colos -3º del añu pasáu. Salimos pela calle Infiestu, pica p'arriba y toi na calle del mio pueblu, resumen, hai que dar espectáculo y póngome a tirar en cabeza como un burrín (pa variar...), después d'un peazu van pasándome algunos corredores y más o menos yá nos vamos poniendo toos nel llugar que nos corresponde na carrera, hai muchu nivel y la xente anda la de dios pero paezme qu'hai dos o tres que van forzando demasiáu y nun me cebo, yá caerán, pienso.
Camín de Páramo del Sil, segundu avituallamientu
Pasamos el primer avituallamientu onde nun paro, nel segundu bebo y como algo y veo a Mejido que ta a puntu de garrame, hai un regatu que traviesa'l camín y que l'otru añu cubría pel tobillu, veo al d'alante facer munchos esparabanes pa evitalo y yo de gallu cruzo pel mediu, total tampocu cubre tantu...¡¡¡cagonsugüela!!! cuando quiero dame cuenta l'agua llégame casi a la cintura y al nun contar con ello arrodíllome a rezar un pocu... moyadura del 15 y rodilla derecha ensangrentada, pa encima al pocu gárrame Mejido. Pasamos el km11 en 52' (a 4'43'/km!!!), yo nun diba a gustu, paecía que me faltaba ritmu pero'l reló nun engaña, lo que ta pasando ye que vamos mui rápidu (los 4 primeros km son de subida con bastante pendiente, d'eso que se sube corriendo pero que casi casi subes igual caminando rápidu) y comento con Mejido que nun se si esto acabará bien...
Subimos hasta'l puertu de Primout (km 15) con xente delante aparentemente cerca y forzando un pocu la maquinaria pa ver si los garramos, Mejido bufa bastante y va faciendo la goma pero ye un castrón de pura raza y aguanta'l tipu. Nuna rápida mirada p'atrás vemos a unu que nun reconocemos (Eulogio Bello) que ta echándosenos encima y a Rubén del Peñasanta un pocu más atrás, colo que apretamos el pasu otru pocu. Al llegar arriba tenemos otru avituallamientu, echamos un traguín y enfocamos el nuevu descensu a Primout, en vez de baxar per una pista buena, directa y mui rápida, garramos otra pistuca que va en llanu hasta casi enriba del pueblu pa después baxar per un caminucu mui entreteníu onde na parte más baxa tenemos que fozar ente caños y ramascos pa poder pasar. Nel llanu primeru (que se nos fai eternu) conseguimos recortar bastante distancia colos 3 que llevamos xustu delante y al empezar el caminucu de baxada adelantamos a unu, tamos baxando fuerte pero sin arriesgar, el últimu tramu de baxada ye mui guapu, hai qu'agachase, esquivar caños, saltar riegues...
Primout
Al pocu de pasar l'avituallamientu de Primout (km19) gárranos Eulogio, ponse a tirar fuerte y salimos detrás d'él, Mejido acaba soltándose y yo sígolu sin despistame, paezme que ye la rueda buena. Vamos recortando pocu a pocu a los dos d'alante, el ritmu ye mui altu pa estes altures de carrera pero encuéntrome bien y tamos nel tramu mas entreteníu de tola carrera, vamos per un camín al llau del ríu, de vez en cuando'l camín mézclase col agua, hai barru y hai qu'andar saltando ente piedres, lo que fai más cansáu avanzar pero tamién recortar más terrenu al que va un pocu tocáu. De repente ún de los d'alante para a mexar y mira horrorizáu como pasamos igual qu'obuses, vamos a pol otru, garrámoslu y tira un cachín detrás nuestru hasta qu'hai que desviase a la derecha pa subir per un caminucu mui pendiente nel que nun queda más remediu que caminar, namás que da un pasu caminando pega un berríu gordísimu y cae al suelu fulmináu por un calambre, esto paez una guerra jejeje...Eulogio y yo ponémonos a subir la última cuesta a tou trapu, el siguiente que tenemos delante ye Merillas (20 añinos y como anda!!!!), pero ta un pocu lejos como pa garralu colo pocu que queda de carrera, detrás vemos a Fuego, Mejido, Rubén y al primeru qu'adelantamos nel ríu, tán a una distancia que permite facer los 4 últimos kms de baxada con relativa tranquilidá pero Eulogio empieza la baxada bastante fuerte y pega una buena llombada, dígo-y que vaya tranquilu, al d'alante yá nun lu garramos, los d'atrás nun nos garren y yo nun voi a disputa-y el puestu después de dir tou esti tiempu chupando rueda, pero caliéntase y empéñase en baxar rapidín, dizme que tire detrás d'él pero nun-y fago casu, baxo asegurando y sin arriesgar (nesos 4km de baxada nun me llegó a sacar un minutu).
Última baxada
Llegada a meta espectacular, con tol pueblu animando como si fuésemos superhéroes, al final 8º y a "sólu" 12' de Miguel Heras (l'añu pasáu sacóme 5' más), meyoré'l tiempu 1' a pesar de que la nueva baxada a Primout fue bastante más lenta que la del añu pasáu. Buena carrera pa empezar la temporada, prestóme encontrame tan bien na parte final que ye onde siempre suelo fallar, les castronaes n'esquí de tou esti inviernu paez que me dieren un plus de fondu.
Preparando la paella
Mapa y perfil
Clasificación con tiempu parcial intermediu (Altu de Primout) y evolución
¡¡¡Vaya como se lo curren!!!
Web de la carrera
Fotos de Rodrigo Vallina
Fotos de Iván M.R.
Vídeu
Y como tou nun va ser correr, el sábadu aprovechamos pa facer un pocu'l guiri, exemplu de tunning bercianu...
...y puesta de sol en Las Médulas.
Hala, vémonos el 10 d'abril nel
Asturcón.
