Los Castrones: mayo 2014

martes, 27 de mayo de 2014

III Trail Altu Ayer. Campeonatu d'Asturies. 18/05/2014.

32 km

3000 m+
4h32'25''

Tercera edición d'esta espectacular carrera, nun se me arregló dir a les dos primeres ediciones, pero d'esta nun podía pasar, distancia en teoría media, terrenu técnicu, desnivel brutal y d'echar el mesmu tiempu que nuna maratón durina, así que de les carreres que me gusten, que últimamente casi tou ye UltraMegaXtrem y al final...descafeinadín tou...

Otru detalle pa nota ye que ye en autosuficiencia, nun hai avituallamientos, 2 o 3 fuentes pel camín y cada ún que se les arregle (esti añu al ser campeonatu d'Asturies tuvieren que poner un avituallamientu por cuestión de reglamentu), ta bien esto, tamos acostumbraos a dir en plan hiperlixeru y cómodu nes carreres y convien que nos acostumbremos a dir con un mínimu d'equipamientu, agua y comida polo que pueda pasar, qu'en monte nun siempre tenemos a una organización y un dispositivu de rescate preparáu p'actuar en casu de cualquier contratiempu.

Depués de facer Apuko 15 díes antes la verdá ye que nun sabía como diba encontrame, eses dos semanes tuve sin chicha y sin muchu convencimientu de poder dar guerra, el sábadu anterior pa encima fuímos Velino, Michi y yo a facer una ruta mui guapa que yá habíamos fechu l'añu pasáu pero en sentíu inversu, Tarna-San Isidro pela llínia de cumbres, y la verdá ye que diba muertu, pero 3 o 4 díes antes de la carrera salieren un par d'entrenos d'hora y media-dos hores a ritmu de les grandes ocasiones, afloxé un par de díes pa llegar descansáu y a ver que se puede facer.

Salimos a les 7:00 como si fuésemos a correr un 1500

Vídeu salida

Nel caminucu bien lisu y sin una piedra d'al llau del ríu voi y recalco'l tobillu derechu al minutu y mediu de salir, empezamos bien...paez que fue sólu'l sustu y enseguida quedamos solos Santi, Fuego y yo. En pasando les Foces del Pino quedamos Santi y yo, tamos subiendo a bon ritmu pero vamos charrando. Llegamos a la fuente Palmián, un traguín rápidu, baxada corta pero pindia y siguimos subiendo pa los Altos de Riopinos. Nesta subida gárrenos Fuego y Vitorín, inconscientemente toos queremos agrupanos, tovía tamos al principiu de la carrera, falta muchu, y la cresta a La Cabritera, Nogales y Picu l'Osu siempre se fai más rápidu si se va nun grupín que sólu. Vamos los cuatro a bon ritmu, toi subiendo mui bien pero baxando vann descolgándome, recalco'l tobillu otres dos o tres veces y doime cuenta que nun ye grave pero va tocáu y a la mínima va de viaxe, así que a baxar tranquilín y güei nun toca dir a muerte a nun ser nes subíes. Na baxada a la Mayada Alba pásenme Pablo y Carlos primero y depués Amador y Samuel, pero tengo qu'aguantar les ganes d'intentar siguilos... Baxando pel bosque Tuzu pásame otru y de repente topo a Vitorín qu'acaba de h.oder un tobillu (¡a meyorase, campeón!), polo que tovía lo tomo con más calma, nun vaya ser yo'l siguiente...
El bosque abre pa dexar pasu a la Braña El Gumial y volver a metenos n'otru bosque pa siguir baxando a Cueves.

Entre El Gumial y Cueves

N'El Carrozal ta l'avituallamientu, parada rápida a garrar unes gominoles y un par de galletes, recargar agua, charrar un pocu con Gerardín que ta'l probe arranáu por nun poder correr y a pola última subida de 1000m+ pa rematar la carrera. Namás salir del avituallamientu veo venir detrás a Mariano y delantre ta'l que m'adelantó en Tuzu paráu, tien que dexalo equí porque los cuádriceps al ponese a subir acaben de dicir que si quies. Un pocu de caminucu ratoneru ente matu con varios repechos y baxaduques y a subir tou de siguíu. Ponemos Mariano y yo un ritmu fuerte de subida, nun vemos a nadie nin por delantre nin per detrás, pero si somos capaces d'aguantalu nun nos garra nadie, seguru, y si algún de los d'alantre forzó demasiáu na baxada, igual lu garramos...Toi encontrándome mui bien y préstame ver que subo como un cañón, Mariano sácame algo al final del tou pero va con bastones y vese que sabe usalos bien, lo que nestes subíes da un plus considerable.

La subida ye llarga y pendiente, lo primero per bosque y depués yá per terrén abiertu, llegando arriba'l tou vemos a Fuego, sácanos un bon peazu, pero tamién vemos a Amador y Samuel a menos d'un par de minutos, tuvimos que recortá-yos bastante na subida, la pena ye que na baxada que queda van volver a sacame lo que nun ta escritu...

Póngome a baxar y nun doi créditu: un canalón de pación nel que cuesta trabayu mantenese en pie (revisando'l track sal una pendiente d'entre'l 45 y el 50%!!) y del que nun se ve'l final, voi baxando como puedo, mediu faciendo cetes mediu garrándome a les escobes mientres pierdo de vista a Amador y a Samuel y voi viendo como m'escapa Mariano pocu a pocu.

Foces del Pino de nuevu y últimu tramu correderu pa llegar a Felechosa, adelantando a xente de la carrera corta y llegando a meta con sensación d'haber podíu dar bastante más guerra de nun ser pol tobillu (igual hubiese reventáu los cuádriceps por baxar fuerte y depués la última subida...a saber...)

Nel caminín al llau del ríu llegando a Felechosa

III Ultra Trail Apuko Extreme (Zaramillo, Bizkaia). 03/05/2014.

90 km

6000 m+

-"Velino, hai una carrera por pareyes nel País Vascu francés a finales de mayu con mui bona pinta, 2 díes siguíos a 45km cada día y con barru bastante"

-"Apúntame"

La carrera en cuestión yera la Euskal Raid, pero fuímos dexándolo y pasósenos el plazu d'inscripción:

- "¿y si vamos p'Apuko?"

-"¡Cagonmimáquina!, ¿nun sedrá muchu?"

-"No, home, non, ¿que ye eso pa un paisano?"

-"Hala, pues apúntame"

La carrera d'Apuko tien fama de dura, subíes y baxaes mui brusques y 6000m+ en 90km, el perfil promete (más bien mete mieu...):

El mapa nun dexa llugar a dudes, vamos subir y baxar tolos montes de la rodeada entre Zaramillo y Zalla

Aprovechando que'l vienres faise puente arrancamos p'allá pela mañana pa dir con calma, comer, garrar el dorsal y echar una siestina , que tenemos la salida a les 6:00 (tempranín pero presta salir a esa hora, nun ye la putada de salir a les 00:00 y tar tola nueche per ehí abeyando). Na expedición vienen tamién Carli y Rafa, de Llangréu, que van correr la Long Trail (65km y 4500m+) y salen a les 10:00

Velino y yo antes de salir

Carli y Rafa

Preparaos...¡¡maricón l'últimu!!

Salimos mientres orbaya un pocu y, coño, qué raru, cuando me doi cuenta voi el primeru na primer y dura subida al Gongeda. Xusto detrás llevo a Josep y un grupín de 4-5 vienen un pocu más atrás. Depués vese un corte importante, tamos subiendo a bon ritmu pero tampocu como pa que nun venga nadie.

-"Gaiteru, castrón, ¿dexarás de tirar?"

-"Calla y corre, ¡margaritu!"

Por fin apaez Velino y con él Gaizka, el ganador del añu pasáu (qu'acabaría ganando de nuevu).

-"¿Asturianos?"

-"¿nótase muchu?"

Facemos les presentaciones pertinentes y al lío, que tovia falten unes cuantes pataes. Llegamos al picu y tenemos una baxada corta pero pindia y peligrosa a estes hores al tar tou moyáu, alguna culada, primer avituallamientu nel colláu que pasamos de llargu y enfocamos la subida al Ganekogorta pa rematar el primer diente de 1000m+ del perfil. Na baxada Josep y Gaizka pónense a tirar un pocu más fuerte, lo primeru ye un crestéu llargu y depués, al final del crestéu, hai que baxar pa la derecha; de repente véolos abandonar la cresta y tirar pa la izquierda, dudo pero sígolos, "si ganó l'añu pasáu conoceralo", sigo dudando porque nun me cuadra de ninguna manera y tiro de gps, "¿Onde vais?, ¡que nun ye per ehí!", media vuelta los cuatro y a subir otra vez a garrar la cresta. En cuantu entramos nuna pista ponen el turbo y Velino y yo preferimos baxar un pocu más tranquilos, tovía nun llevamos 15km y hai que guardar cuádriceps pa más alante.

Llegando a La Quadra

La Quadra, km 17, 2h de carrera y primer avituallamientu de verdá, llegamos 3^u y 4^u con bona cara y a 3' de los primeros, garramos daqué de comer sobre la marcha y siguimos. Facemos una especie de bucle (el segundu piquín piquiñín del perfil) subiendo una riega a tomar pel sacu pa depués volver a baxar a la subestación de Güeñes (pela carretera nun debe haber ni 1km) y facer yá otru bucle pero de los potentes, la subida al Eretza, antes de llegar a Sodupe, km 31.

Subestación de Güeñes

L'últimu "repechín" de subida al Eretza

Si la subida al Eretza ye pindia y dura, la baxada nun podía ser menos, asina que llegando casi abaxu'l tou, cuando garramos una pista ponemos el pilotu automáticu y a correr como descosíos, pero al peazu desapaecen les marques llegando al pueblu, vuelvo a tirar de gps y pasamos el cruce va un peazu, cagontal, mientres damos la vuelta vemos a otru que nun se despistó y va per onde teníamos que dir nosotros, ¡vaya manera de perder un puestu más a lo tochu!, bueno, tranquilidá, que queda muchu y de momentu vamos mui bien. Al llegar a Sodupe resulta que volvió a adelantanos otru y nosotros sin enteranos (nel cruce onde nos despistamos y dimos la vuelta él baxó hasta'l pueblu y fue a Sodupe pela carretera en llanu y en mediu km mientres nosotros facíamos otru bucle de 1,5km y 60m+ y otros tantos-...).

Avituallamientu, km 31 y casi 4h, comemos algo rápidu y salimos camín de Zalla, unos 23-24 km más allá. Nuna subida corta pero dura per un prau Velino saca los bastones pa garrar a ún de los que nos adelantó, yo prefiero siguir con ellos na mochila y subir un pocu más tranquilu. Cuando quiero dame cuenta yá tan los dos bastante más alante, Velino va en plan perru presa y yo agora mesmu toi en fase h.ipi, dame igual el puestu, el ritmu, la carrera y la madre que lo parió, asina que voi arraposando y quedando un pocu atrás pa que Velino nun me vea ya-y de por esperame.
En San Cosme hai un avituallamientu con agua y un pocu p'arriba gárame Imanol, vamos xuntos hasta'l Picu Ilso y na baxada al avituallamientu de Rigada escápaseme. Otra dura subida al Rioia onde me adelanta otru y nel crestéu a Espaldaseca pásame otru más.
Garramos una pista mui corredera y voi cavilando: "tan mal nun voi, toi bastante alante, llevo les ñalgues cargadines pero nada preocupante, en cuantu llegue a Zalla y coma un pocu curiosu seguro que lo veo d'otra manera, depués en vez de tantu cresteu ye más sube y baxa a lo castrón...¡¡mecagon los sapos de cría, nun me h.odas, desapaecieren les p...s marques, otra vez non, nun puede ser!!". Echo mano del gps y el track dexelu atrás va la de dios, h.oder, vuelta pista arriba a ver onde carajo vuelvo a encontrar les marques, subo, y subo y subo (corriendo pa intentar nun perder muchu tiempu) y encuentro a otru que vien en contra mía tamién despistáu, siguimos subiendo y por fin encontramos una cinta que marcaba qu'había que dexar la pista y baxar per un caminucu a mano izquierda (la verdá que marcáu taba, pero d'una manera bastante probe, que con 40 y picu km encima la cabeza yá nun riega en plenes condiciones...). Veo xente delante y per detrás empieza a pasame hasta l'apuntador, yo que yá nun diba mui convencíu d'apretar nos últimos kms acabo de desconectar de la carrera totalmente, hala, a tomar pol sacu, a terminar y otru entrenu más, que pal UTMB nun sobrará...
Otra subidina simpática al Bolunburu y por fin llegamos al avituallamientu de Zalla (km 55, 7h09'). Platáu de macarrones, siéntome a comer como un paisano, con calma, como y bebo bien y a siguir, que tovía falta un mundu.

Zalla (apreciable la pérdida de gracia respectu a la semeya de La Quadra...jijiji)

D'equí p'allá pocu más que contar, p'abaxu despaciu, en llanu (lo pocu qu'había) regular, les subíes de caminar sin ritmu y les de trotiar yeren les úniques que mediu salvaben.

Subida al Ubieta, crestéu al Larrea, baxada a Güeñes (onde teníemos l'hotel, menuda tentación...pero ¿a qué vinimos?, ¡venga p'arriba!), subida al Luxar, baxada a garrar una pista que per unos zigzags a estes altures eternos sube camín del refuxu, avituallamientu onde teníen hasta cerveces, otru piquín más y otra baxada pa engaramitase al Aldape, baxada per un prau al borde de saltar les rótules disparaes de lo pindiu que yera, siguimos per otra baxada pa matase per un bosque embarradísimu onde nun había dios que se tuviese en pie, baxada per una pista interminable al avituallamientu de Castaños, siguimos baxando (¿pero nun había que subir al Apuko?) y de repente por fin la última subida. Vamos dando vueltes per unes riegues hasta que salimos a una mayada y por fin vemos el famosu últimu repechu.

Tramu final del Apuko

Bueno, tampocu paez pa tantu, por una cuestuca más nun vamos quedar mal a estes altures, pa encima comentame un rapaz del control que taba ellí que'l castrón de Velino pasó como una moto y que diba cuartu, bien, subidón de moral y cuando quiero dame cuenta toi arriba, veo la meta empozadísima y una baxada qu'aparenta ser bastante cafre, y puedo asegurávos que nesti casu les apariences nun egañaben...

Manu y Velino