3ª prueba puntuable pa la Copa d'España FEDME 2011
27,3km
1730m+
2h52'52''
La semana después de
Canfranc, después d'encontrame como un cañón, tuve una pequeña rotura de fibres nel xemelu derechu. Al día siguiente tocó castronada de les buenes en bici (
Vuelta castrona a Piloña) y como pedaleando nun molestaba, pues 3 semanines dándo-y a la bici a muerte (unes 25h/semana). Nun pude dir a la
II Sky Marathon Ribagorça Románica, qu'esti añu yera'l Campeonatu d'España, aunque tuvieron que recortar el recorríu poles previsiones de mal tiempu (el que nun se consuela ye porque nun quier) y taba amagándome una puñetera fascitis plantar que cuantu más andaba en bici paecía que diba a más ¿...?. Por suerte dióme por mirar pa los playeros d'andar en bici y teníen la suela reventada (toi como un burrín!!, potencia pura!!!jajjaja), la flexión pel sitiu onde taben rotos facía qu'acabase cola planta de los pies cargada a tope...
Playeru derechu (sí, yá se que nun ta precisamente limpiu, perooo...)
Detalle de la estroza
Playeru izquierdu cola suela rompiendo pel mesmu sitiu que'l derechu
Playeros nuevos (y unos cuantos € menos!!!), vuelta a les plantilles y fondu igual qu'un caballu, pero'l ritmu corriendo igual que'l d'un percherón, la cuenta pa dir a una prueba de la Copa España...pero buenu, arrancamos p'allá y a ver que pasa, lo importante, como siempre, ye dir a pasalo bien y procurar nun mancase.
Na charla técnica del sábadu (como nun había folletu de la carrera nun quedó más remediu que dir...) avisárennos que la carrera diba ser un pocu más llarga y con más desnivel de lo previstu debíu a problemas con permisos de tipu mediuambiental y yá veo que va ser de correr correr, un par de kilómetros d'asfaltu más o menos llanos tantu al principiu comu al final y otros 5 (también tantu a la ida comu a la vuelta) de pista, amás nun hai subíes llargues, asina que voi mentalizándome y olvidándome d'acercame al 14º puestu de
Sierra Elvira, van meteme una chamiza...
El domingu tempranu ya se ve que va facer calor, riñoneruca con agua con sales pa evitar calambres y a sobrevivir...
Preparando les ferradures con cara sueñu
D'Asturies tamos Iván Torre y Jorge Rivero del Piloña Deporte, Pedro Rodríguez del Running Team Lafuma, Moisés Nachón del Peñasanta-Llagar Casa Juan y yo, del Vízcares.
Salimos toos escopetaos y alante fórmense 2 grupos de 6 o 7, voi faciendo la goma nel segundu grupu y veo que nun tengo chispa pa rodar a estos ritmos, asina que pocu a pocu que tovía queda muchu. Km 5 en 27'11'' (5'26''/km) y un pocu más allá, onde'l km 7 dexamos la pista pa facer una subiduca corta per terrenu un pocu más complicáu y entreteníu, la típica cuesta de caliza mezclada con prau y algo de maleza onde aprovecho y paso a Pedro y a otros 4 o 5 que paez que nun se desenvuelven con mucha soltura nesti terrenu. Siguimos con un sube-baxa pel mesmu terrenu hasta'l km 10 (57'23'') onde ta'l avituallamientu de Markua y onde hai una subida corta pero dura, garro un puñáu d'almendres salaes y a media cuesta casi muerro empapizáu...subiendo caminando veo que tampocu voi tou lo finu que debería, nun dexo atrás a nadie, voi bien, mui bien, pero nun soi a dir más rápidu, sigue faltando chispa. Después tenemos una baxada-flanquéu per un senderucu estrechu mui entreteníu, con mucha piedra, algo de matu pa masaxear les pates y per una ladera que tien bastante pendiente pa llegar al avituallamientu d'Inungán.
Inungán: Yo
Pedro
Jorge
Moisés
Enfoco la sudida al picu Leungane, km 15 y puntu más altu de la carrera, voi oyendo a xente que diz que la baxada d'antes yera mui técnica ¿? (si vienen al
Benzúa van saber lo que ye técnicu...), lo que me da pa reflexionar un bon peazu sobre les distintes visiones que tenemos unos y otros sobre qué y comu tien que ser una carrera de montaña, y porqué una carrera como ésta tien que tener 4 km llanos d'asfaltu y 10 de pista buena sobre un total de casi 28, colo cual nun quiero dicir que nun sea guapa, la parte de monte ye preciosa y el terrenu nun ye pa dir a lo llocu sinon con cuidadín, pero pienso que nun taría mal buscar alguna alternativa a esos kilómetros de rellenu.
La llegada al picu y la correspondiente baxada acaba coles reflexiones trascendentales de golpe, ta'l terrenu tovía algo rosáu y hai que dir concentráu
Llegando al picu Leungane
Iván
Toca facer una baxada non mui llarga (nesta carrera nun hai grandes desniveles de golpe) onde me pasen 3 y paso yo a otru que va con un cuádriceps tocáu y después una subiduca, col avituallamientu de Marmola a la mitá, y un tramu d'unos 4 km de sube-baxa de correr fuerte pero con tramos de camín empedráu onde hai que dir con bastante cuidáu (piedra caliza pulida y moyada) nel que Pedro y otros 2 o 3 vuelven a adelantame. Llegamos a Belatxikieta onde hai la última subida, corta pero pendiente, con un montón de xente animando, a partir d'equí baxada a tou trapu onde me pasen 3 más y llegada a meta nel puestu 22, digo yo...
Peles cais d'Amorebieta, goliendo la meta (y goliendo a castrón!!!)
Acabo contentu y mui enteru (igual demasiáu...), nun tengo la sensación d'habeme exprimíu pero ye que aunque hubiese queríu nun tenía ritmu ni velocidá nes piernes, eses tres semanines sin correr notáronse, en condiciones normales calculo que unos 5' menos podía facelos bien y hubiese estáu más o menos pelos puestos de Sierra Elvira, pero tampocu se fue tantu la cosa, lo meyor de tou ye que nun tuve molesties de ningún tipu. Jorge pasolo mal a cuenta'l calor y los calambres y Moisés vino a facer la carrera con relativa tranquilidá yá qu'acababa de salir d'una lumbalxia, tou y así entraren en 3h10' los dos sobre'l puestu 50, Iván llegó en 3h40' y Pedro volvió a ganar en categoría de Veteranos, con 2h49' y puestu 16 xeneral, colo que a falta d'una prueba pa terminar la Copa yá ye'l ganador de la Copa 2011 na so categoría, ¡¡NORABONA!!
Duchina más que merecía, pa Bilbao a comer, y después en vez de dormir la siesta pal Guggenheim a ver una colección d'Expresionismu Abstractu...menos mal qu'hai visites guiaes y aquella moza diba explicándonos (mui bien, por ciertu) la hestoria de tou aquello...
Mapa
Perfil
Ficha técnica
Vídeu
Hala, marcho el xueves pa
Lorient con
La Raitana asina qu'otros 10 merecíos díes de relax deportivu y volveremos a la carga pal
II Trail de Valgrande-Payares, a cuidase.
.
