Les buenes coses hai vegaes que surden nun momentu d'inspiración, nesti casu surdió na cabeza de Jordi y fízonos partícipes a mí y a algún más, por mediu d'un sinfín de correos:
- ¿Si facemos pa cerrar la temporada una vueltona pel central, subiendo Moñetes, la Canalona, la Hda. Caín, Canal del Lebaniego y Moñetes?
Yá ta abierta la caxa de Pandora, ¿cuántu llevará facelo?, ¿cuándo lo facemos?, ¿per ónde se puede facer?, ¿qué ye lo que conocemos y lo que non?...
Les últimes nevaes fácennos posponelo, primero pol mal tiempu y dempués pol riesgu d'aludes. Al final, debíu a estos contratiempos solo vamos Jordi y yo, echando de menos al restu de collacios...
A lo fatu ficimos un rutón que nun tien nada qu'envidiar a nada de lo meyor fechu hasta agora, la Chamonix-Zermatt, Silveretta, Aneto, o Mulhacén... Pa mí fue la ruta d'un día que fice más guapa, meyor que'l día del Cervino de la Chamonix-Zermatt. Hai vegaes nes que vas a buscar coses fuera y desconoces lo de casa, mui típicu de los asturianos, que paez que lo de fuera siempre ye meyor, qué se va facer, somos asina...
Salimos de L'Infiestu a les 7:00 el domingu 5 de mayu, nel tiempu dan previsón de buen tiempu y nun xela pela nueche, a les 9:10 salimos de les Vegues de Sotres, sin tar mui seguros de lo que vamos facer, fadremos lo que se pueda en función de cómo encontremos la nieve, porque a estes altures podemos atopala de tou tipu...
Como somos previsores dexamos nel ríu al llau del coche 4 lates de coca-cola, pa que tean fresquines cuando lleguemos, que seguru nos van saber a gloria...
Panorámica
Track equí
Arrancamos a les 9:08 sin tener mui claru lo que vamos facer...
En breve garramos nieve y ta durina, buena señal, así vamos dir más rápido y más frescos al nun tener que facer güella...
El día promete...
- Pues Collada Bonita tien buena pinta...
Colláu de La Canalona
- Vaya pinta que tien la Torre Blanca (la pala que se ve en mediu, y el pasu de la cda. Blanca, el que ta onde la barbilla de Jordi).
D'equí n'adelante hasta'l H.oyu Grande Cimero, nun lo conocemos ningún y tamos a la espectativa
La primera del día, la baxada del Colláu La Canalona ta como hormigón y el día anterior baxáronlo faciendo escalones, ta mui "entreteníu" de baxar ente lo duru, los escalones y lo pindiu...
Dempués topamos munches colaes d'aludes dures como morrillos mui difíciles d'esquiar, hai que dir tratando d'evitales...
Vistes del descensu de La Canalona, fue una pena porque tien que ser mui prestosu cola nieve buenu...
El Tesorero al fondo a la izd. nos H.oyos Sengros
- Bueno, qué faremos, el Tesorero o la Torre Blanca...
- Home, la Torre Blanca ta más lloñe...
- Pero tien una pala meyor...
- Y así vemos como ye'l pasu pal H.oyu Grande
Torre Blanca, a 10 m. de la cima dexamos los esquís y subimos caminando. El Llambrión detrás
La nieve ta yá paposa, son les 14:15 y lleva dándo-y el sol tol día... pero "ye lo qu'hai"...
Vista de tolo que tenemos que baxar hasta'l H.oyu Grande Cimero y luego en puntos coloraos la subida a la Hda. Caín...
Cda. Blanca
El Llambrión...
P'abaxu...
Comemos un bocadillín nel H.oyu Grande Cimero y p'arriba que tovía falta ...
Topamos munches colaes, pero lo buenu de tar faciendo calor tol día ye que tán blandes y con poner a Jordi en modo "BULLDOZER" ...
Llegar a la Hda. Caín col Picu al fondu, fai a ún respigase...
Pal otru llau la Torre la Palanca
Esto ye lo que falaba al principiu, la suerte que tenemos de tener esto en casa...
Baxando al H.ou Sin Tierre, la nieve ta paposa pero presta pola vida con eses vistes...
Vamos controlando la canal del Lebaniego, pero primero vamos dir al refuxu d'Urriellu, tenemos que poner les pieles pa subir a la Garganta del H.ou sin Tierre...
Nel refuxu con Íñigo, tomamos algo y comemos otru bocadillín
- ¿Per ónde se sube meyor pa dir a la canal del Lebaniego, Íñigo?
- Per equí detras, pero ya que tais equí, ¿cómo nun vais per Bonita que ye más guapu?
- ¡¡Coño!! ties razón, yá que baxamos equí sin falta, vamos dir per Cda. Bonita. ¡¡Gracies!!
Con estes vistes, nun fai falta gasolina...
Llegamos a la canal de La Celada, penúltimu pasu delicáu del día...
Pieles y p'arriba, a la mala subímosla con crampones.
Yá solo nos queda Cda. Bonita, pero tien meyor orientación que La Celada...
Uff, vese mui bien y con la güella del día anterior que nos val de refencia tenemos que facer güella al tar blanda, pero con estes vistes...
Llegando a Cda. Bonita col Picu al fondu, sin palabres...
- ¿Per ónde baxamos pela izquierda del Cuchallón de Villasobrada o pela derecha?
- A mí dame igual, nun conozco ninguna de les dos.
- Pela izquierda que paez que tien meyor la nieve.
Saliendo al Jou sin Tierra, col Cuchallón al fondu, y baxando ente morrillos de nieve de los aludes...
El tubu de Moñetes, quitóse mediu metro de pela mañana agora...
La nieve ta mui paposa y faite enterrar 20 cm y dempués de garrar unos morrillos...
Esquís al llombu, que como diz un castrón: "el que nun se fartuca comiendo, tampocu llambiendo"
Uff, vamos garrar les coca-coles del ríu que van saber a gloria...
La sorpresa ye cuando vien Jordi y dizme:
- Que nun tán, que nos les llevaren.
- ¿¡Cómo les van llevar!? Llevaríales la corriente.
- Non, que dexéles enterraes na arena como otres vegaes y ye imposible, ¡¡llevárenles!!
- ¿Les 4?
- Sí, sí, nun dexaren ni una.
El tema de les coca-coles ye un reflexu de la sociedá na que vivimos, yo creía que nel monte tovía nun s'estilaba l'egoísmu, l'individualismu y la falta de respetu a los demás. Yo siempre dexé coses pel monte, mochila, bici, playeros, etc. porque así m'enseñaren a vivir el monte, a respetalu y a los qu'encuentres nél, así como a ayudanos ente nosotros.
Tantu a Jordi como a mí, nun nos hubiese importáu que nos les garrasen pa beber si taben deshidrataos, pero paez difícil tando metíes a enfriar n'AGUA y teniendo la fuente a 200m... Más bien paez la obra d'un listu, que pa encima tará orgullosu, qué pena...
Dempués de casi 12 hores coles botes puestes asina me quedaren los pies, ¡¡¡cocíos al vapor!!! jijiji
Póngovos les cuentes de los tiempos revisando'l track que fizo Jordi:
- Vegues de Sotres-Moñetes-La Canalona (2h54’, 15’ paraos)
- Cabaña Verónica-Torreblanca (4h48’ y 5’ paraos -1h39’ dende La Canalona)
- Collada Blanca-H.ou Trasllambrión-H.ou Grande Cimero(5h41’ y 17’ paraos-48’ dende Torreblanca)
- H.orcada Caín (6h36’ y 7’ paraos -38’ dende’l H.ou Grande Cimero)
- H.ou Sin Tierre-Vega d'Urriellu (7h23’ y 27’ paraos - 40’ dende la H.orcada Caín)
- Canal de La Celada-Collada Bonita (9h15 y 19’paraos, cagontal, muchu paramos equí...-1h25’ dende Urriellu)
- Moñetes-Vegues de Sotres (2h04’ dende Bonita, baxamos a pinchu jejeje)
TOTAL: 11h 38'
FIN
Muy buena actividad. Me quedo con la "copla". Del tema de las latas.... Que asco de gente!!! En fin. Enhorabuena y un saludo.
ResponderEliminar