Si nun nieva...

...hai que tener paciencia!!

Mientres tantu vamos con un par de briconseyos partiendo d'una fórmula maxistral:

material llixeru = material incómodu (la mayoría de les veces) y pocu duraderu (siempre...)

Primer briconseyu: partimos d'unes botes llixerines, les Scarpa Alien, cómodes, suela corta que facilita caminar bien con elles, pesu d'unes botes de trekking, caña con gran rangu de movilidá... peeeero, tou y siendo un calzáu p'andar pela nieve...¡¡cala!!

¿¡Cómo van calar unes botes d'esquí!?, pues sí, la puñetera abertura de la carcasa dexa la llingüeta al aire, y como non, la llingüeta nun ye impermeable ¿? Cuando empapa y depués xela conseguimos una sensación mui agradable...

Depués de probar (les botes nun son míes...) a encintar les llingüetes con cinta americana durante 7 xornaes siguíes d'esquí d'unes 7-8h cada una y ver que l'inventu funciona, pasamos a facelo más profesional y permanente.

 Les botes en cuestión coles llingüetes encintaes

Lo primeru de tou ye sacar les llingüetes, pa ello tenemos que desmontar el tinglao del cable que sirve p'axustar la bota al empeine; con cuidáu y un destornillador podemos dir sacando los enganches de plásticu que sirven pa pasar y poder tensar el cable

 Una vez quitaos tolos enganches del cable acabamos de soltar la llingüeta desatornillando la pieza que la mantién suxeta per alante a la carcasa de la bota.

 ¿Seremos quien a volver a montalo y que funcione...?

 Pesu de la llingüeta col cable y el sistema de tensión

Agora vien el pasu más gochu, tenemos qu'entafarrar bien per tolos llaos les llingüetes con sellador de poliuretano (ye elásticu y úsase na construcción n'esteriores, asina qu'aguanta humedá y fríu).

 Una vez fecha la marranada y depués d'esperar que seque, l'incrementu de pesu ye ridículu, unos 15 gramos. Tal y como vienen de serie, con qu'empapen un pocu yá garren bastante más pesu...

Volvemos a montar el chiringuito rezando pa que nun nos sobren pieces y yá tenemos les Alien preparaes pa cuando nieve.

Como veis, fizo falta material de la NASA pa esti primer briconseyu...

Agora vamos col segundu briconseyu: el compartimentu con abertura llateral pa guardar los crampones de les mochiluques más llixeres. Ye un bolsu nel fondu de la mochila que podemos abrir y cerrar con una mano pa sacar y meter los crampones d'él ensin quitar la mochila. Pero como les mochiles son llixeres, ye un bolsu de teluca de nada: si metemos dalgo nel compartimentu principal de la  mochila va aplastanos el bolsucu inferior de los crampones colo qu'estos nun van entrar nin salir con facilidá, cola consiguiente pérdida de tiempu y colos consiguientes enganchones de les puntes de los crampones na tela de la mochila y la posibilidá nada remota que la mochila nun dure muchu más d'una temporada...

Amás, les mochiles tampocu suelen traer muchu refuerzu (o directamente nada nos modelos más allixeraos) ente les afilaes puntes de los crampones y la nuesa espalda, lo que da bastante mal rollu si pensamos n'una hipotética caída...

Material necesariu:

- Una garrafa d'agua de 5 litros de capacidá con forma cuadrada (les redondes nun se adapten bien a la espalda)

- Dalgo que corte medianamente bien: navaya, cuchillu, cúter...

Nun m'enrrollo más y déxovos les fotos del inventu, que ye bien fácil, llixeru y ¡¡baratu!!

Ultra Trail Macizu d'Ubiña-Güeyos del diablu. 12/09/2015

2ª prueba puntuable pa la Copa d'España de carreres Ultra

80km

5560m+

5440m-

11h30'

Namás llegar a casa del GRP, acordéme qu'un día n'Uviéu tropecé con Andrés de la Torre, tuvimos charrando un peazu y comentóme que la "Güeyos del diablu" diba ser prueba puntuable pa la Copa d'España, que si nun m'animaba a correla. Díxe-y qu'imposible, yera una carrera a la que tenía muches ganes de dir pero depués del GRP calculaba que nun diba tener el cuerpu como pa metéme 80km.

Pues mira tu que dexalo nel km 90 diba venime bien pa nun acabar desalambráu y allargar un pocu más la temporada...

Salida a les 6:00, yo nun sé qué voi facer, va tol mundu mirando y controlando... pues salida marca de la casa, pa variar... Cuando quiero dame cuenta yá vamos 3 solos y del restu nun sabemos nada: un cántabru (Manuel, al final llegó antes que nadie a meta), un gallegu (Fernando, acabamos faciendo prácticamente tola carrera xuntos) y un asturianu (paez un chiste, yá lo se...). Vamos rápidu pero tamos encontrándonos bien, así que p'alante. Xustu cuando empezaba a amanecer llegamos a una zona de camperes, col borrín teníamos que separanos unos metros y dir buscando les banderes y les cintes, colo que tranquilizamos un pocu col ritmu, que pa la kilometrada que quedaba nun diba sobrar.

Apaez unu d'atrás corriendo como un llocu, dexámoslu pasar y olvidámonos d'él mientres pensamos "esti, o muchu anda o nun sabe lo que falta..."

Llegamos al primer avituallamientu y de repente apaez un grupu d'unos 7 corredores con pinta de nun venir de paseo precisamente, esto ye Copa d'España y el personal anda que mete mieu. Van pasándonos y quedamos Fernando y yo, el cántabru salió escopetáu del avituallamientu y nun lu vimos más.

Llegamos a Xomezana, segundu avituallamientu ¡con casadielles y fayueles!, parada rápida y arrancamos pa Tuiza, va llegando xente per detrás y van adelantándonos, lleven un puntu más que nosotros pero nun queremos cebanos, sabemos que si aguantamos esti ritmu a última hora vamos acabar apañando a unos cuantos de los que nos tán pasando agora. A mitá de subida topamos a Mariano, que güei ta de xuez pero nun quita pa que nos acompañe unos minutinos.

 Tuiza

Otru avituallamientu en Tuiza y seguimos, que paez que quier salir el sol; tamos teniendo muncha suerte col tiempu, daben agua hasta mediudía y de momentu nun cayó una gota. Nel Puertu Cerreo abre un pocu y vemos Les Ubiñes, La Mesa... Pero na baxada a El Meicín métese'l borrín y tenemos que baxar con cuidáu pa nun perder les señales. Va llegando más xente d'atrás y algún de los d'alante comienza a nun dir tan finu como antes, siguimos conservando la calma. N'El Meicín tenemos arroz con lleche, ¡espectacular!, por gana quedábmos arrañando la pota pero hai que siguir. Tiramos pa la Forqueta d'El Portillín a bon pasu, detrás vienen Nuria Domínguez, Mercedes Pila, Sonia Regueiro con Ánder Cangas y algún más a tou trapu, tamos subiendo alegres pero tán recortándonos. Nel avituallamientu d'El L.legu xuntámonos toos, comemos dalgo, recargamos bebida y equí Fernando y yo sabemos que ye onde tenemos qu'empezar a apretar pa si tenemos suerte recuperar dalgún qu'otru puestu. Na baxada pela Foz Grande dexámoslos a toos atrás, llegamos a Manín y enseguida apaez Nuria.

Con Fernando en Manín

Quédennos casi 1000m de subida y tola llarga baxada, así que p'arriba como aviones, va tirando Fernando pero a media subida caliéntome y meto otru puntín más, Fernando veo que va un pocu xustu pero aguanta'l tirón, colo que recuperamos creo que cinco puestos na hora xusta que nos llevó subir de Manín a la cumbre de Peña Rueda pel Cuchillar, una subida mui guapa.

 Dándolo tou na subida a Peña Rueda

Baxada mala de dir con cuidáu al siguiente avituallamientu onde adelantamos a otru par d'ellos y d'ehí a meta salióme la vena de perru caza y siguí calentándome a medía que díbamos garrando y adelantando xente. Nun sé en qué momentu Fernando quedó p'atrás, pero Nuria siguía ehí, algún cachín descolgábase un pocu, volvía a garrame y al final acabamos faciendo l'últimu tramu xuntos, llegando nes posiciones 14 y 15 de la clasificación xeneral.

 Llegando a meta cola grandísima corredora Nuria Domínguez

Carrera con un recorríu de carrera de montaña de verdá, monte puru y duru sin concesiones, mui bien marcada (aunque cuando se mete'l borrín nunca ye bastante), con unos voluntarios mui simpáticos y amables y con unos avituallamientos d'escándalo: casadielles en casi toos, fayueles en Xomezana, arroz con lleche n'El Meicín, ¡sidra! en Peña Rueda y pasta caliente y masaxe-tortura (jijij) en meta.

Quité la espina del GRP quedando contentísimu cola carrera que fici, tantu por tiempu y puestu como por cómo respondió'l cuerpu, debe ser la primer carrera llarga que consigo dir disfrutando tol tiempu, sin la sensación de dir fundíu en nengún momentu.

La xente anda muchísimu y hubo que xugar les cartes d'otra manera, guardando pal final y esperando con paciencia. 

Como puntu "polémicu", hubo varies penalizaciones por nun cumplir col reglamentu, ente ellos los que llegaron primeru y terceru, póngolo entre comines porque polémica nenguna, el reglamentu ye'l que ye y ye'l mesmu pa TOOS, si en toles carreres se ficiera lo mesmo...

Y como puntu polémicu de verdá, nunca debí tener a más de 20 delante, pues fuímos viendo y apañando envoltorios varios, como unos 7-10, nun me paez nin mediu normal, depués protestamos porque nun dan permisos pa facer esto o lo otro; nun tien que dir nadie apañándonos la mierda pa que quede tou igual que taba antes de pasar nosotros, y nin Copa España nin ye que son mui buenos y van mui rápido nin hosties en vinagre: ¡¡GOCHOS NON!!

Vídeu

Páxina

Facebook

Clasificación

GRP (Le Grand raid des Pyrénées). 21/08/2015.

87km

5668m+ y 4851m-

18h03'

Llega la gran cita de la temporada, otra barbaridá de 160km y 10000m+, bastante más cerca de casa que l'UTMB de l'añu pasáu. Voi colos deberes meyor fechos (creo...) que l'añu pasáu, unes cuantes hores d'entrenu menos pero descansando más y sin machacame tantu durante tol añu. Tou y así, son muchos kilómetros y muches hores y cualquier tontería puede facer que nun termines; hasta más o menos los 100km o 18-20h, sé que aunque nun tenga'l día, sácolo, d'ehí p'alante tá claru que me queda grande...

Salimos a les 5 la mañana y la primer subida de 15km y 1500m+ llévame 2h20', voi mui tranquilu y pásame bastante xente, nun-y doi importancia precisamente porque voi mui tranquilu, caminos anchos y pistes d'esquí.

Nel siguiente tramu empiecen los caminucos ratoneros llenos de piedres típicos de Pirineos y algún que otru tramu de bloques onde hai que pisar con muchu cuidáu, tou ello en terrenu de sube y baxa sin grandes desniveles pero de llanu nada. Empiezo a pasar xente sin parar, ye curiosu lo mal que se defiende la xente en xeneral nesti terrenu y lo mal que baxen, porque vese cuando alguien va despaciu porque nun quier castigar la musculatura o cuando ye porque van a puntu de dexar la dentadura nun morrillu...Procuro nun emocioname muchu y siguir reservando, pero en delles baxaes dóime algún homenaxe...

En La Mongie (31 km) fago una paradina d'unos 10' a comer curiosu y a dexar pesu (¡casi-yos tupo la fosa séptica!jijji) y arranco animáu pola vexetación de felechu, gorbizu y una especie de cotolla que fai que me sienta como en casa. Vamos a pol Pic du Midi y el calor que llevamos sufriendo dende la salida comienza a pesar, más a estes hores y sin una puñetera sombra, pero ye lo qu'hai. Una baxadina y a subir, que yá veo yo qu'hoi p'abaxu y en llanu corriendo bien, pero p'arriba caminando nun tengo precisamente el meyor día. Espectacular la vista que tien esti monte y aunque temos nuna ¿carrera? ye obligatoriu parar un cachín a contemplar el paisaxe.

Baxando voi garrando xente y nel Col de Sencours otra paradina a comer, beber y cargar agua pal siguiente tramu de 20km hasta Hautacam. A mí llevóme 4h, col 1,5l d'agua reglamentariu y col calor que facía y colo pocu que suelo yo beber, si-vos digo que les pasé putes pa nun quedar ensín agua...mantuve el puestu que llevaba nel Pic du Midi pero llegué h.odíu, físicamente porque nes subíes yá daba pena aunque siguía baxando y corriendo bien, y lo que más me preocupaba, mentalmente, taba empezando a dar demasies vueltes al tema. Eso sí, el tramu espectacular, llagos, pedreros y  praderes, subiendo y baxando collaos per senderinos y terrén d'alta montaña sin ver un alma.

N'Hautacam ta Jose Vicente Benito, yá corrió equí creo que 5 años y un añu terminó 2^u, fuímos un peazu xuntos na primer subida; dizme que queda equí, que nun puede más; charramos un pocu pero doime prisa en marchar o sinón acabo yo quedando equí con él...

Baxada gorda a Pierrefitte, 12km y 1200m- de correr correr pa llegar al km 76, la prueba de fueu pa ver si tamos en condiciones de siguir o hai que apease. Voi como un cañón y adelanto a tou cristo, 37 puestos namás y na menos, voi con ritmu onde hai que correr fuerte y axilidá nos tramos más técnicos. Feliz y contentu, nun me acuerdo pa nada del calor y de tou lo que pasé hasta agora, aunque procuro beber y beber y beber...

Nel avituallamientu cambio de ropa, playeros, vuelvo a soltar lastre, como, bebo, como más, bebo más, charro colos voluntarios, noto un calor de la de su madre (toi sudando a chorru y eso que toi sentáu nuna silla sin facer gran cosa), sigo comiendo, bebiendo, charrando, sudando...¡hostia, llevo 1h10' equí!, hala fiyos, o marcho o quedo...Sólu perdí 9 puestos parando tantísimu tiempu, así que la cosa paez que tá h.odía pa toos...

Casi 12km, 1200m+ y 2h40' de subida coincidiendo col oscurecer acaben conmigo, l'estómagu depués del avituallamientu cerró a cal y cantu y nun soi quien a meter p'allá más que sorbucos d'agua de xilgueru. Cada vez subo peor y sin meter combustible la cosa nun promete muchu. Queda tola nueche y nestes condiciones y col tramu de monte a tomar pol sacu de toa civilización hasta Cauterets prefiero quitar el dorsal, nun vaya ser que quedemos per ehí trabaos que nin p'alante nin p'atrás, de nueche y colos que me puedan ayudar igual o peor que yo...

Agora vien la parte más cachonda del tema: ¿que pasa cuando abandones nuna carrera d'esti tipu y quies volver al puntu onde dexasti aparcáu el coche?, amiguín, casi te sal más cuenta siguir corriendo y acabar...¡¡Vaya matu!!

3 hores y picu esperando nel chiringuito del avituallamientu a que nos baxasen a Pierrefitte. Mientres tantu tas viendo llegar cada cuadru que mete miéu...a la xente yá-y cuesta coordinar y háilos que lleguen h.odíos, h.odíos. Eso sí, los voluntarios de 10, tán con una comedia increíble, cantando, bailando, ofreciendo comida y bebida y animando a tol mundu. Llamóme l'atención qu'igual pasaren 6 o 7 pareyes/matrimonios que diben corriendo xuntos, y sobre tou qu'ellos diben bastante más fundíos qu'elles, que diben con cara de tar pensando: "menuda mierda paisano que traigo yo equí, que yá va que nun puede colos güevos". Y yo, que como a dios per una pata, sin ser capaz a comer nada...

Cuando por fin arrancamos cola fregoneta llena de cadáveres, un tramu de pista malísima que paez que nun se acaba nunca, esto paez una baticao, su madre!!. Acaba la pista y empieza un tramu de carreteruques, el piloto caliéntase y baxamos alegres alegres, el valencianu que llevo sentáu al lláu y que tuvo que retirase porque devolvía tou lo que metía...menos mal que fue previsor y garró una bolsa. A la octava arcada lo menos, el conductor pega un frenazu, para, prende la lluz y pregunta: "¿todo bien?, ¿lleva bolsa?", contesto yo pol valencianu, que'l probe bastante tien y arrancamos otra vez yo creo que más rápidu tovía qu'antes...

Casi 1h depués faciendo tramu llegamos a Pierrefitte, tenemos qu'esperar otres 2h y media a que venga'l bus que nos lleve a Vielle-Auré, asina qu'intentamos echar una cabezadina nel polideportivu. Cuando por fin montamos en bus, el xofer piérdesenos peles afueres de Lourdes y vese que nun sabe pa onde tirar, eso sí, parar nun para y fai como que sabe..., otru par de hores depués por fin llegamos, son les 7 la mañana y de la qu'entro al hotel tán preparando'l desayunu, agora sí que paez que me entra dalgo, desayuno y pa la cama.

Pela tarde voi a ver llegar a la xente de 32h p'alante, la verdá que h.ode retirase pero tampocu toi mui afectáu, nun pudo ser y yá tá. Contaba despedime d'esta distancia con esta carrera, y aunque nunca se puede escupir p'arriba, sigo convencíu de que ye demasiáu.

Carrera mui bien marcada (una cinta cada 30 metros, que tuve tiempu bastante pa dir contando pasos...), avituallamientos correctos (aunque'l tramu de Sencours a Hautacam resultó demasiáu llargu col calor que fizo) y voluntarios mui amables. Quitando algún tramu puntual nun me paeció más técnica que'l UTMB, aunque eso sí, ye muchu más montañera nel aspectu que ties tramos mui llargos onde nun hai un alma.

Páxina web

Facebook 

Faciendo los deberes...

Como llevo un branu bastante vago col tema del blog, voi facé-vos un pequeñu resumen d'unes cuantes actividaes feches como preparación pa la gran cita de la temporada, el GRP, otra castronada de 100 milles y unos 9500m+ del estilu del UTMB que corrí n'agostu del añu pasáu.

Depués de La Travesera, que siempre la tengo atravesada, tocó a la semana siguiente La Piloñesa, la vuelta castrona en BTT pel conceyu Piloña (130km y 6000m+ con unos cuantos tramos bastante técnicos), qu'esti añu a pesar de dir tranquilu salió en 12h32'. En total llevo faciéndola 6 veces y nun canso de repetila, BTT castrón y piloñu n'estáu puru.

Y pal sábadu de la semana siguiente tocó el I Trail Magüetu, creación intelectual de Ruben, a saber: dir d'Infiestu a Samalea pasando per Les Vízcares y tou pel cantu faciendo 6 cumbres: La Coroña, Friera, Ñiañu, Vízcares, Cuniu y la Peña Priede. 34km, 2700m+ y casi 9h de felechu, cotolla y  calor insoportable, tou ello acompañáu de cabarres y tábanos endemoniaos empeñaos en intentar amarganos el día y l'actividá tan guapa; pa otra vez hai que facelo más pa la primavera.

Chupando cámara col Sueve al fondu camín de...

La Coroña

Friera, Vízcares detrás 

Ñiañu

 Vízcares

Colláu Los Llaos

Esti...¡¡alloqueció col calor!!

Peña Priede

Y el fin del trayectu queda bien cerca, Priede y Samalea a tiru piedra.

Actividá mui guapa, dura y mui montañera, baxa montaña pola altitú pero montaña peleona...

A los 10 díes tocó La Castronina, versión reducía de La Piloñesa (64km y 3000+). Como ye distancia "corta", fícelo "al corte", pa ver cuantu tiempu salía: 5h06' que pa después de comer nun tuvo nada mal, 3h13' pa llegar a Espinaréu dan idea de lo que pude entreteneme...

Nembra pa la semana siguiente, maratón de montaña durina (42km y 3000m+) qu'esti añu ye campeonatu d'Asturies de carreres en llínia. Una semanina antes retorcía de tobillu gorda que quedó nun sustu namás, pero suficiente pa llevar los bastones, apretar subiendo y dexar les baxaes pa otra ocasión. Al final el día salió más duru de lo esperáu a cuenta d'un bochornu espantosu pero contentu, 9^u de la clasificación xeneral, 7^u de la clasificación del Campeonatu d'Asturies, y unos cuantos kms más d'entrenu a bon ritmu pa la colección. Eso sí, Vitorín y Juanjo dexaren bien claru que los de más de 30 años podemos dir dedicándonos a xugar a les boliches, ¡¡mi madre, metiérennos un repasu que pa qué!!

Vídeu


Clasificación

El xueves escapada a Picos a ver como tá'l neveru de La Forcadona, acabo liándome y lo que diba ser una vueltina de 4-5h acaba en 41km, 3000m+ y casi 9h: baxé a Caín y volví per Culiembru y Ostón a Ariu. Tenéis l'actividá equí, bona actividá si nun fuese porque esi fin de semana diba facer l'Anillu de Picos, la cuenta pa dir descansáu...

Pues eso, el sábadu dexo'l coche en Poncebos y tiro a dormir a Cordiñanes, 61km, 3700m+, 3100m- en 10h22', mui cómodu y disfrutando. Ducha, cervecina, cena, dormir nun cama de verdá, desayunu y arranco'l domingu como un tiru. 

En Jermoso, col toque "pro" de les chancletes colgando de la mochila pa tar cómodu en Cordiñanes...(semeya de Dani Ablanedo)

Nel Casetón tán  los mios pas pa dexame un bocadillón de cecina y pa yo dexá-yos dalgo de pesu, sigo como un tiru pero'l calor, el cansanciu acumuláu y nun parar a garrar agua en Sotres fai que la subida a Urriellu acabe siendo la más penosa de tola mio vida, ¡su madre qué reventón!, d'ehí p'alantre a tirar de callu, Cabrones, Amuesa, Bulnes y por fin Poncebos, otros 61km, 4700m+, 5300m- y 13h18'. Fin de semana espectacular fartucándome de Picos.

Fin de semana siguiente, comento-y a Juan la xugada: les tres cumbres más altes de Cantabria, Lleón y Asturies nel macizu central de Picos, en Los Urrieles. Nun puede resisitise a la tentación y p'allá que vamos a pola Triloxía del Central, 44km, 3830m+ y 11h56' de terrenu d'alta montaña con dalgunos pasucos delicaos (Tiro Callejo, Llambrión, rampa de Coello y Torrecerréu).

Otra actividá de les de recordar durante muchu tiempu.

Peña Vieja

El Llambrión

Torrecerréu

 Cuando subíamos al Torrecerréu baxaben los últimos d'arriba colo que tuvimos el picu pa nosotros solos, aprovechamos p'acabar la comida arriba disfrutando del paisaxe y del día tan guapu que facía. Al día siguiente depeñóse unu na vía normal de subida / baxada del picu, cara y cruz de la mesma moneda, muchu cuidadín siempre, toles precauciones son poques.

Y otra semana más tarde como fin de fiesta arranco cola intención de facer La Travesera na versión orixinal, de Los Lagos a Sotres, a partir d'Urriellu empieza a dame la galbana y la cabeza a dar vueltes de que falten mui pocos díes pal GRP y que yá voi servíu de kms, fago Collada Bonita y Moñetes en plan tranquilu y por hoi vamos perdonar H.idiellu y tirar andando pa Sotres, otros 47km, 4300m+ y 12h de disfrute per Picos (los playeros fueren directos pa la basura, la caliza paez que nun-yos sienta mui bien, más col añu que llevaben...).

Toes estes actividaes completaes colos consiguientes entrenos en BTT de 2 a 4h y tiraes corriendo de 20-30 kms, y un día a la semana de monte con Laura, andando y col bocadillo, pero 18-25km, + o - 1500m+ y 8-10h. 

Van 930h d'actividá/entrenu nun añu, l'añu pasáu presentéme nel UTMB con 1250, así que dalgo menos entrené, pero que nun-vos cuenten milongues de que si fulanito o menganito nun entrena casi nada, la xenética ayuda, pero si nun se da'l callu...

Yá-vos contaré qué tal pelos Pirineos!!

La Travesera, La Carrera de les carreres.

Pues esta vez tocóme a mí (Rubén) hacer La Travesera, que ya hacía años que le tenia ganas.
Os cuento mi experiencia:
El viernes 12 de junio a mediodía ya fuímos a por el dorsal con unos nervios que pa qué. Jordi, Mejido y yo, faltaba otru castrón más, Ricardo. Los cuatro seríamos la representación castrona esti añu en La Travesera. Cojelu y pa casa a ver si se puede dormir tou lo posible la siesta pa levantase, cenar y a las 10 de la noche tiramos pa Covadonga, acojonáu perdíu, por ciertu.

En la salida después de pasar el control faltaba un castrón, Ricardo, ¿onde cojones tará esti castrón?, pero pocu antes de dar la salida llegó.
Dan la salida a las doce de la noche y empieza la aventura, salgo apretando un pocu pa no cojer muchu tapón en la senda que sube pa Orandi (que al final cojilu igual por que tou dios corrió la de dios), empieza la senda y cojemos un pocu de aire, ya me alcanzó Ricardo y vamos juntos. Jordi y Mejido deben ir delante metiéndo-y mieu a Merillas jejeje. La subida hasta Los Lagos fue agónica pa mí, había muchísimu barru y patinábase la de dios con lo que me desgaste muchú llegando a Los Lagos sobre la 1:50; beber un pocu, un besu a Carla (la mi peque) y p'arriba. Corrimos la de dios hasta el Pozu del alemán y a partir de ahí a caminar fuerte; en Vegarredonda yo ya no podía con los cojones, le dije a Ricardo que tirase que yo así no iba a ningún lau.
Iba a parar a poner ropa, bajar el ritmo y poner piles al  frontal que no veía un pimientu a pesar que eren nueves. Vamos en dirección al Colláu La Fragua y voy recuperando, en el Jou de Los Asturianos ya empieza a relajar la subida y rápido llegamos al Jou Santu donde Ricardo empieza a demostrar como se corre por la nieve p'abaju y me quedo atrás. Casi lo alcanzo pero empieza la bajada y tírase p'abajo como un castrón y ya no lu vere más hasta Cain. En el Boquete llego bastante desmoralizáu por que descender me cuesta mucho y me estoy quedando sin luz otra vez, tengo que bajar Mesones enteru practicamente a oscuras ya que bajaba solo y llego a Caín a las 6:40 más o menos. Veo a Ricardo y me dice que acaba de llegar, entonces me animo, como bien y salimos rapido hacia la canal de Drobesengos, la cual no conocia (¡vaya dia tambien pa conocela!), amanece y a tomar pol culo el fontal, empiezo muy bien subiendo fuerte y dissfrutando pero esa canal no se acababa ni pa dios, se me acabó el efectu del gel y dióme un bajón bestial. Esperé a Ricardo, que no lo venía pasando muy bien tampocu, y como un par de borrachos logramos subir a dures penes a la Horcada Caín, impresionante las vistas. A partir de aquí mejoré muchu y fui encontrándome muy bien. Llegamos al refugio de Urriellu con 40 min. de antelación con respecto al corte. Comer, saludos a Carlinos Llerandi, su madre Eva y demás amigos. Entre una mucha gente animándonos (asi da gustu) salimos hacia Collada Bonita subiendo fuerte y muy bien. La nieve estaba algo dura pero decidimos no poner crampones ya que habia buena huella y cuerda y gracies al esquí tamos acostumbraos y pasamos mucha gente. Ricardo se quedó un poco en la subida pero yo sabía que p'abaju cojíame de golpe como asi fue. Enfocamos la bajada de Moñetas, que en esquí bajarla mola mogollón, pero corriendo  y después de donde veniamos...pero sabía que abajo estaban todos esperándonos: mi mujer María Jesús, Carla, Furu, Lolo, Loli, Laura, Dani, Armamdo, Susana y Bea. A todos ellos les agradezco de corazón todos los animos que nos dieron, eso si fue un subidón.

Parada y fonda en Les Vegues

 

Susana dando ánimos

 ¿Qué-y taría contando a Armando, lo del grifu?jijijiji

Venga, vamos, que sinón siguimos comiendo y quedamos equí tol día!!

Comimos un poco de pasta, cambiamos algo de ropa, cuatro consejos que me dio Furu y pa la temida canal de Jidiellu que subí como un peu, yo creo que hice scratch, subí muy cómodu y motivau, tampocu la conocía y gustóme un montón, sobre todo la parte final. En esta canal quiso llover pero fue poca cosa y aguantó bien. Empezamos a bajar y Ricardo estaba bastante atrás pero en un plis ya me cojió (que zuna tien el castrón, por algo lleva tres Traveseres terminaes) y llegamos al ultimo avituallamientu en el Jitu sobre las 4:30 (creo), ahora ya estaba hechu, un besu a la muyer, otru a Carla y a por la gloria, ahora había que acabar por cojones.

 

 

Tái-vos quietos!!! 

Empezamos a bajar corriendo bien pa que no nos cojiera nadie, subimos a Portudera a buen ritmo y la senda Caoru no llegaba ni pa dios. Después de muchu pateo llegamos a la senda pero ahí empezo mi agonía, ¡mi madre que mal lo pase!: vómitos, mareos, visiones y Ricardo más o menos igual; teníamos que parar y echar agua en la cabeza a cada pocu, del mareu que traíamos ya no nos entraba nada, ni bebida ni comida y apareció un cartel de 4km a meta, en mi vida me duraron tantu. Como me decía Emilio eso no son km, son milles jejejejeje ¡y que razón tenia!
Pero el último km es lo más especial que viví en esto de les carreres pel monte. En Cabrales toda la gente animando a tope, allí me esperaban Jordi, Laura, Mejido, Laura, Manuel, mi padre, mi madre y todos los que nombré antes; cojí a Carla pa entrar en meta y casi se me escapan les lagrimes, fue muy emocionante poder terminar, eso sí, 20h20m de agonía y aventura. Después de tantos entrenos de noche después de trabajar y fines de semana corriendo por el monte, por fin logré mi objetivo que era terminar, eso sí, namás llegar dije "yo aquí no vuelvo más ni llocu" pero hoy ya no pienso igual, como tenga tiempo pa entrenar lo intentaré otra vez.

Dar las gracias a la mí muyer María Jesús que siempre está conmigo en estos telares con la peque Carla, a todos los Castrones que sin ellos no podía haber lográu semejante hazaña, a Carlinos por eses fotos tan chules y a otros fotógrafos que había por la carrera haciendo fotos y muy amablemente nos las mandaron, y muy especial a Ricardo que me cuidó tola carrera genial, y en definitiva a todoa los amigos que me apoyásteis y me animásteis de alguna forma.
IMPRESIONANTE LA AVENTURA QUE YE LA TRAVESERA.

 

Pal añu que vien...

¡¡Que tiemblen estos!!jijijiji