Vuelta al Ríu La Marea.

54,2 km

3037 m+

8h02'49''

Track

 Panorámica

Perfil

La temporada ultra que quería facer esti añu paez que nun se me llogra, después d'acabar la Travesera'l 16 de xunu quería facer la G2Haundiak pal 14 de xunetu, pero por compromisos gaiteros nun pudo ser, el 29 de setiembre quería dir a Cavalls del Vent, pero'l día de facer les inscripciones tupió'l servidor y acabaren faciendo un sortéu que por supuestu nun me tocó. Viendo'l panorama y que na Camille Extreme nun m'esprimí muchu, decidí volver a la semana siguiente a la Canfranc-Canfranc, según abro'l corréu'l domingu al llegar a casa de la Camille, veo un e-mail nel que me comuniquen que suspenden la Canfranc y pásenla pal 8 de setiembre, fecha na que nun voi poder dir... Pues nada, en vez de Canfranc, castronada al pie de casa que terrenu tenemos bastante, muchu más baratu y sin depender de nadie más que de les mios pates...

Después de facer la vuelta al Ríu Espinaréu a finales del branu pasáu tenía en mente facer lo mesmu col Ríu La Marea, rodiar tola cuenca del ríu pela llinia d'agües vertientes. Preparo la mochiluca y salgo del portal de mio casa, ye un lujo nun tener nin siquiera que garrar el coche. Garro'l camín que sube a Villanueva, onde'l pasu a nivel, apaezco en Santianes y voi pela carretera hasta'l final de Llozana, onde garro'l caminucu que sube a El Cabezu, Pandoles y pel camín real en 1h20' toi en Sellón. Sigo per él hasta después de la portiella, cruzo la riega Les Fuentes y subo pa la izquierda per tol cantu pa llegar a Facéu en 1h54'. Sigo cresteando hasta llegar a la Collada Arniciu (2h45', hasta equí 18,6 km y 1400 m+), onde recargo agua y voi rodeando La Busllar pa dir a buscar el cantu del Colláu La Trapa (tou esti tramu d'Arniciu a Infiestu coincide con parte de la vuelta a Piloña que ficimos n'ochobre del añu pasáu, daquella fici una descripción detallada de tou esi tramu pero en sentíu inversu). Picu La Trapa, El Cándanu, Torienes, Achanes, Colláu Les Haces, Pumarín, Picos de La Carba, Picu Les Llombes, Colláu Lechugueru, nun m'apetez desviame pa subir a La Chamoca y tiro pal Colláu del Mediu, Colláu del Arrudu, bordeo Los Faidiellos y El Resellón pa salir al Picu Xibiella y baxar a la fonte de Breza a garrar agua (5h28', 34,6 km y casi 2500 m+). Yá va quedando menos, calculo que nunes 3h como muchu tea de vuelta en casa.

El día nun prometía muchu pero agora'l sol casca con ganes y procuro beber bastante (en tol día bebí unos 3 llitros d'agua). Baxo tola campera d'Aneres pa na parte más baxa desviame a la derecha a salir a El Colladielu, Sabadiellu, La Llama y enfocar la penúltima subida del día, a Picos Verdes pasando per Carbayal. Llego a Picos Verdes en 6h39' (41,2 km y 2800 m+) y sé que va tar difícil baxar de les 8h pero va andar la cosa per ehí. Arranco p'abaxu pel Crestón de La Trapa hasta'l Colláu Los Piloños, onde garro'l camín que sal a mano derecha pa dir a la Collada Maza, enfoco la última subida pela pista de la Xerra Ques y tovía soi quien a correr a un pasín bastante decente, Cullacenti, baxo a mano derecha a El Pimientu, El Palaciu, La Llana y 2,5 km d'asfaltu pa llegar a casa. Nun tuvo nada mal el día y pa encima llegué bien, cansaducu pero decentemente y sin molesties.

Ye mui bon terrenu pa meter entrenos d'altu kilometraxe al ser casi tou camperes y caminucos de pisu blandu y nun haber baxaes llargues, machaca bastante menos qu'otros terrenos. Con engañar a alguien pa que vaya a llevavos o a buscavos a Arniciu o a La Llama (subiendo pa Les Praeres), podéis facer varies combinaciones más cortes y con más o menos desnivel, a gustu de caún.

¡¡Ah!!, y como Piloña ye'l paraísu del Cotolla&Cabarra Running, recomiéndovos dir con malles llargues (facer lo que queráis pero yo por si acasu aviso...).

Ehí van unes poques fotos, que vos preste:

En Pandoles, vista p'atrás...

 ...y p'alante

Nel Cantu Les Cadenes mirando p'atrás...

...y al mirar p'alante asoma Facéu al fondu.

Sellón, al fondu a la izquierda Picos Verdes

Vista dende Facéu de lo que llevamos fechu (y de parte de lo que nos va quedar pal final del día)

Yá queda menos p'Arniciu

...pero vese tolo que queda...

...asina qu'arrancamos y vamos dexando Facéu atrás...

...pa dir acercándonos a Arniciu.

La pirámide de La Chamoca en casa dios...

Mui guapu'l camín d'Arniciu al Colláu La Trapa, cruzando tou esi bosque.

Correr per estes llombes ye una pasada

Vista pa la zona de Tarna

Facéu

Peña Mea escondía ente'l borrín

La Chamoca en mediu la foto, yá ta más cerca...

Vistes pa lo que vamos dexando atrás...

 
...y lo que nos queda

Pa Infiestu paez que tovía falta un bon cachu...

En pasando La Chamoca

Peña Mea yá se dexa ver

Mirando p'atrás...

...y p'alante, Picu Xibiella...

...y vistes dende él: Breza...

...Aneres...

...Picos Verdes...

Subiendo a Picos Verdes, vistes p'atrás

Y el resumen de la vuelta dende Picos Verdes

Acabóse (de momentu...)