II Desafío Cantabria. Ultra Trail del Mar a la Montaña. 19/10/2013.

88,8 Km

6230 m+

5344 m-

11h51'47''

Depués de vaguear tol branu col blog, a ver si voi poniéndome al día... Vamos dir de lo últimu (que tá más frescu) p'atrás, asina que toca falar d'esta carrera que cierra (en teoría, porque'l castrón de Mejido acaba de poneme de los nervios con una ocurrencia pistonuda... a ver en qué para...) la temporada 2013 de carreres per monte qu'entamó allá per marzu na V Carrera Alto Sil.

L'añu pasáu tamién cerré la temporada nel Desafío Cantabria, prestóme tantu que si me cuadraba bien tenía claru que tenía que volver: inscripción barata (manda güevos a lo que tamos llegando que pagar 48€ por garrar una h.odía d'esti calibre paezca baratu...), organización impecable y final de temporada col consiguiente bon estáu de forma depués de tar tol branu zapateando. Amás una bona oportunidá de pasar un fin de semana pela zona Liébana pa saludar a los amigos que ficimos na Chamonix-Zermatt yá va un par d'años: Chus, Toño y Fonso.

Depués de garrar el dorsal y cenar (mui bon detalle por parte de la organización) nel polideportivu de San Vicente de la Barquera, voi a vestime de romano pa salir a les 00:00 camín d'Espinama. Munchos y mui bonos gallos hai esti añu na salida, desde los astures Ureña, Gerardo, Rafa, Quico, Nico... a otros reputaos corredores nacionales d'ultratrail: Felipe Artigue, Imanol Alesón, Jose Vicente Benito, Juanan Ruiz, Álvaro Rodríguez, Tito Parra y Nerea Martínez, Alfonso Rodriguez, Pedro Bianco... mi madre, esto mete mieu!!

Con Chus y Blas

Esti añu salimos del puertu, non de la playa, colo qu'aforramos tener que cruzar tol puentón, Depa ta calentando los ánimos micro en mano y mediu minutu antes d'arrancar dizme Ureña: "Menudu ambiente qu'hai, ¿eh?", cagonsumadre, colo tranquilu que taba y de repente dispárenseme les pulsaciones que paez que me va salir el corazón peles oreyes. Salimos caleyando per San Vicente a tou trapu, Felipe marca'l pasu y Sergio y Yeyo pónense en primera fila delantre la so xente que los anima sin parar.

 En saliendo del pueblu tol mundu va en silenciu y pendientes unos d'otros, nun hai nadie que claramente garre la iniciativa pero en cuantu hai dalguna subidina comienzo a revolver el gallineru colos consiguientes pulsómetros pitando a tou trapu jejeje, vamos quedando un grupín en cabeza y tamos corriendo mui fuerte pa tolo que queda.

Llegando al avituallamientu de Gandarilla...

 ... y saliendo, ¡esperái, ho, que tovía toi mazcando'l cachu plátanu!

Les escaleres de Cades

En 56' tamos en Gandarilla (km 12) el primer grupín de 8, avituallamientu rapidísimu y póngome a tirar del grupu camín de Cades (km 21), onde volvemos a llegar los 8 más o menos xuntos en 1h39'40'', salgo como un tiru'l primeru yá en plan guerreru camín de Cicera (km 36), onde llegaríamos en 3h33' un grupín de 4-5.

 Cicera

Otru avituallamientu y fácennos un control de material a los dos primeros, que salimos solos camín de Lebeña. Veo que'l compañeru ta aguantando mui bien l'altu ritmu y aprovecho pa da-y la mano y presentame, a ver si entre los dos vamos tirando ún del otru y dexamos al restu p'atrás. Ye Tito Parra, compañeru de Nerea Martínez, y mientres vamos charrando va pasándonos el trayectu a Lebeña casi ensin danos cuenta. De vez en cuando pregúntame: "pero tío, ¿no vas muy fuerte?" pa descojonase cola mio respuesta: "bah, mientres tengamos fuerces hai que da-y, cuando nun podamos más yá diremos más despaciu...".
 Llegamos a Lebeña (km 45) en 4h33', un minutu menos que Salva l'añu pasáu. Equí Blas, el mesmu árbitru d'antes, vuelve a revisanos la mochila, ye'l avituallamientu "gordu" de la carrera y la organización llévate una bolsa colo que quieras (ropa o playeros de repuestu, comida...). Yo directamente nun mandé llevar nada y Tito nun lo sé, pero comemos y bebemos dalgo del avituallamientu rápidamente y salimos como tiros.

Lebeña

 Esta carrera tien 2 partes bien diferenciaes: hasta equí una maratón abundante mui rápida (pero con unos 2300 m+, ¿eh?...), a partir d'equí otra maratón abundante pero muchu más montañera (casi otros 4000 m+...). En teoría hai que tratar de nun calentase demasiáu na primer parte (cosa que viendo los tiempos de pasu por supuestu nun ficimos...) pa llegar "frescu" a la segunda mitá. Agora yá tamos equí con un bon recalentón de pates, asina que la cosa nun tien remediu, toca apretar un güevu contra l'otru y tirar p'alante.
La subida d'Allende a Cabañes facémosla esti añu per otru caminín mui guapu y entreteníu al llau d'un riucu.

Con Tito n'Ullances

 Llegamos al avituallamientu d'Ullances en 6h13' y camín del avituallamientu de Brez cruzámonos a Pablo Criado y más xente de la organización que vienen marcando en sentíu contrariu tol tramu porque algún desgraciáu nun tuvo más que facer que quitar les marques (l'añu pasáu tamién pasó lo mesmu, últimamente paez que se ta poniendo de moda boicotear los marcaxes de les carreres...). En Brez (km 63 y 7h23') un rapaz acuérdase de mí del añu pasáu y dizme que Sergio Besoy (col que fui más de media carrera) tuvo que retirase (¡¡yá tienes escusa pa l'añu que vien!!). A estes altures sigo tovía como un cañón, pero veo que Tito yá "calentó" y el que lleva la iniciativa la mayor parte del tiempu ye él. Nel primer cuestón pa subir al Colláu de Cámara vemos un par de frontales bastante cerca, que depués d'un cachu desapaecen (¿perderíense o apagaríenlos pa dir "camuflaos"?, en meta confirmaríennos lo segundu...). Llegamos a Cámara onde tán Toño y Chus que al veme en cabeza lleven un alegría casi tan grande como la mía de velos ellí dando ánimos. Na baxada a les praderíes d'Áliva, Tito escápaseme un pocu, cuando llego a la ermita dícenme que me saca 2', y cuando llego al avituallamientu d'Áliva (km 71) yá son 5', ¡¡h.oder, esti puso'l turbo!!.

Imanol y yo n'Áliva abducíos pola visión d'un platu xamón jajaja

Namás entrar llega Imanol, que venía subiendo rapidísimu, arrancamos los dos pa la H.orcadina de Covarrobres, aunque yo nun soi a sigui-y el pasu tan fuerte que lleva, y al peazu pásenme Álvaro y Alfonso completamente endemoniaos. Yo voi bien, non cola chispa que traía hasta agora pero tampocu desfondáu, pero estos vienen como motos. La baxada de la H.orcadina a Igüedri yá la fago con calma, nun veo a nadie más per detrás y a estos nun los garro nin llocu. Na última subida a Valdecoro, que fago bien pero sin que sobren fuerces, ta Chelis animando y arriba'l tou fai un airón que casi nun me dexa baxar.

Subiendo Valdecoro

 

Baxando a Fuente Dé

Baxo pocu a pocu a Fuente Dé y sigo sin ver a nadie detrás, pero nel aparcamientu siento aplaudir al pocu de pasar yo, vien Juanan pegáu a mí, pero esti ¿d'ónde salió?
Pásame con una sonrisa de picardía mientres yo-y digo: "yá me h.odiste, ¿vien alguien más detrás?", "no, tranquilu, nun vien nadie", nun soi a siguilu porque va a tope pero tou y así aprieto por si acasu. Voi un pocu despistáu y casi salto un cruce a mano izquierda, onde al pocu ta Laura que nun contaba veme llegar tan luego.

Baxo a Espinama a tou lo que doi a estes altures y cuando llego a meta dícenme que soi el quintu, "non, soi el sestu, el quintu adelantóme al pocu de Fuente Dé... a nun ser que se despistara nel cruce nel que casi me paso yo...". Al pocu llega Felipe, que tuvo que facer un final fuertísimu, y detrás llega Juanan, efectivamente despistóse nel famosu cruce, ¡nun se puede relaxar unu ni un momentu!

Pues esto ye lo qu'hai, mui contentu col puestu pero sobre tou cola sensación de dir metíu en carrera dando guerra sin duelu hasta prácticamente Áliva y de nun reventar d'ehí p'alante, aunque ye verdá que tuvi qu'afloxar bastante sobre tou nes baxaes, y mui contentu coles 11h51' (tola carrera más o menos nos tiempos de Salva del añu pasáu, 11h43') y la sensación de llegar cansáu pero non derrangáu a pesar de facer 1h43' menos que l'añu pasáu. Mui bona la carrera del restu de los astures, y si nun se tuerce nada, tamos pensando yá nel Desafío Cantabria 2014!!

Ta fecho!!

Reponiendo a base de callos nel Remoña

Clasificación Xeneral con tiempos de pasu

Tiempos de pasu míos del añu pasáu y d'esti

Un montón de fotos

Un vídeu

Otru

Páxina web