martes, 18 de octubre de 2011

Ultra Trail Castrón en Piloña (V). Vuelta non-stop corriendo a Piloña. 09/10/2011.


Por fin llega'l día, aunque teníamos previstu facelo de sábadu (pa descansar el domingu antes de dir a trabayar el llunes...), les previsiones meteorolóxiques fácennos cambiar los planes pal domingu (menos mal que-y ficimos casu a Maldonado...) p'asegurar que nun nos llueva y nun tener niebla.
Nunca había preparáu una castronada con tantu empeñu, ilusión y tiempu, lo que nun quitaba qu'hubiera un montón d'interrogantes ya que nunca había corríu tantos kilómetros siguíos. El principal yera'l ritmu a siguir, pero Velino y yo tenemos una manera bastante peculiar y paecía de correr y sin siquiera comentalo ente nosotros salimos a tou trapu, pa variar...
La estratexa paecía que yera dir limando kilómetros lo más rápidu posible durante les primeres hores pa después dedicase a sobrevivir. Como yá había fechu la ruta en tres etapes tenía unes referencies de tiempos de cada tramu (sin contar les paraes) (tabla de tiempos en 3 etapes en días distintos y del tirón el día D calcando equí) y la verdá ye que nos primeros 40 km clavámoslo, pa tantos kms igual el ritmu yera altu pero tou eso qu'adelantamos...
A los 40' de salir tamos metíos nel cotollal de La Invernal, Velino (al que-y gusten les cotolles con llocura...) cree que tamos perdíos y nun fai más que dicime que pa que coño traigo'l gps, que lu saque que per ehí nun puede ser jejeje. Nun hai lluna llena pero casi, colo que durante algún qu'otru tramu apagamos el frontal (¡¡Cómo presta andar de nueche pel monte sin falta de lluz artificial!!). 
Llegamos a Espineres onde ta esperándonos Jorge Pablo cola bici y con un par de focos que cuando va detrás nuestru paez que ye de día, y con unes pastilles de frenu que cada vez que frena meten un ruiu infernal (¡¡Van matanos los vecinos!!). 
De repente Velino saca un peazu termo de 1 litro con té con miel: "¡¡¿pero ónde vas con eso?!!", la verdá ye que diónos media vida durante la nueche. 
Jorge y Miguel tán tamién per ehí (¿Nun diréis mui rápido? dícennos a cada pocu...) y baxen pela pista detrás de nosotros cola sufría furgo. En La Llama Javier, Manolo y Mavi intenten sacanos alguna foto, Jorge Pablo tira pa Fuentes pela carretera pa dir a esperanos a Robléu y nosotros subimos pa La Coroñina pente'l felechu y la cotolla. Mejido yá va dándose cuenta de por qué nun fui a engañar a ningún de los d'Infiestu: "¡¡¡pero si per equí nun pasen nin los xabalinos!!!". Pasamos per Anayo, La Formiga, Pintueles, Cadanes, Cayón y Biedes y sin novedá llegamos a Infiestu con sólo 3 minutos de retrasu sobre'l tiempu qu'había fechu cuando corrí solamente esti tramu de día...
Paradina de 10' a comer y beber algo y a cargar la mochila pal trayectu que tenemos per delante. Pasen per ellí un grupín de xente que tamién ta trasnochando, pero por otros motivos jejeje, entre ellos ta'l castrón de Marco'l de Valle: "vosotros, ¿qué ye, que si nun tais tol día cola bombilluca esa pela cabeza nun tais contentos?" 
Arrancamos col fríu metíu nel cuerpu (la parada matónos) y a la hora Jorge Pablo despídese de nosotros, tien que dar la vuelta porque a partir d'agora yá nun ye ciclable. Pocu a pocu les piernes van a menos, los kilómetros pesen y hai que dir mui atentos a la orientación, yá nun hai camín, la lluna desapaez detrás de Peñamayor y ta fríu, colo que, aunque vamos caminando a mui buen ritmu, echamos 1h30' más en facer el tramu d'Infiestu a Arniciu (yo la verdá ye que yá diba contando con ello, si siguiéramos al mesmu ritmu del principiu nun sería mui normal...). 
Antes de La Chamoca tuvimos un pequeñu despiste cola niebla (aunque tuvo mui despexáu), fue la segunda y última vez que tiramos de gps (la primera fue pa localizar la fuente de Breza, tábamos al llau pero nun acabábamos de dar con ella), porque al pocu acabóse la pila y les de repuestu teníales Laura en coche...
Llegando a La Chamoca por fin amanez y ye increíble como'l cuerpu y la cabeza arranquen a funcionar a tope colos primeros rayos de sol, aunque l'allegría dura pocu al apaecer un problema bastante pocu glamurosu, les mios tripes empiecen a soltar llastre casi sin dame tiempu a baxar les malles... ¡¡Lo que faltaba!!, por suerte, aunque tuve que parar como unes 10 veces nel restu del día, casi nun echo nada, asina que creo que nin la cagalera va poder conmigo jejeje. 
Llegamos a Arniciu onde ta Laura col avituallamientu (bocata de cecina en vena, cocacola, gominoles, mazapanes, chocolate... para, para, nun saques más que sinón quedamos equí...), Manolo y Javier cola cámara de fotos ya Iván que va acompañanos en principiu hasta Moandi pero sé yo que va venir hasta'l final (y nun m'equivoqué). Cambiamos los calcetos que veníen empapaos y después de la fartura arrancamos pa Los Negros. 
Vamos caminando (equí puede correse mui pocu aunque vengas frescu) a un ritmu tovía elegante y nos llanos y baxaes tovía somos quien a correr. Pasamos el pasín delicáu de Los Negros sin mayor problema, Llagu Ovia, Traslasenda y llegamos a Peña Crespa. La baxada ta tovía rosada y tenemos que dir con muchu cuidáu, pero les vistes que tenemos hacia tolos llaos son espectaculares: El Cornión, La Llambria, Tiatordos, Campigüeños, el bosque de Purupintu, Trallán, Vízcares, Sueve, Mota Cetín...
Después de baxar a Pandemules, subir Maoñu y baxálu llegamos a Traslafuente, onde ta Samalea esperándonos pa facer con nosotros tol tramu restante. Cargamos agua y comemos algo nel bebederu y siguimos ruta, aunque vamos algo más lentos del tiempu que tenía miráu vamos más rápidu de lo que yo imaxinaba que díbamos a dir a estes altures. Pocu a pocu vamos dándonos cuenta de que salvu una inoportuna lesión vamos a conseguilo, nun sé cómo pero vamos tovía a un pasu más que dignu y aunque yá cansaos tovía tenemos cuerda pa ratu. Eso sí, cada vez qu'alguien tien que parar a algo, tirámonos al suelu como si tuviese imán jejeje. 
Subimos Culebrina, baxamos a Xerra d'Aves y a Piedrafita, subimos hasta'l colláu de Cuniu, pasamos a Tameces, baxamos pel bosque esi tan malu y apaecemos en Moandi. Tán esperándonos p'animanos pal últimu tramu de 14 km casi tou p'abaxu que nos queda. Contábamos cambiar los playeros por unos más amortiguaos porque esti tramu ye bastante corrible, pero tenemos gana de llegar asina que comemos algo rápidu y arrancamos como tiros. 
Cada vez qu'hai un repechu, qu'hai unos cuantos, Velino quier matame: "¿Y esto pa los de Piloña ye p'abaxu?" y pa h.odeme pon un ritmu frenéticu de correr como si nos persiguiera un galgu. El tramu de Moandi a El Picu ficímoslu en ¡¡¡3' menos!!! y con 85 km y 16h30' nes pates...ye increíble tovía poder correr asina a estes altures...
Al llegar al cantu onde la carretera baxa pa La Frecha enfilamos la última subida (felechu, cotolla, escayos y un pocu más allá escobes que ye lo únicu que nun habíamos vistu hasta agora...) pa la Cuesta Bodes, baxada cotollera, Caldevilla, Villar y baxada kamikaze pel caminucu que va a Sotu, onde ta esperándonos un montón de xente pa facenos un calurosu recibimientu después de 18h26' de dar suela. Llegamos cansaos pero sorprendentemente bastante enteros y con bona cara y sobre tou felices y contentos, salió tou meyor de lo esperáu y d'esto seguru que vamos acordanos tola vida.

Nun m'enrollo más y dexo que falen el paezu fotos que nos sacaron Javier y Manolo en La Llama, Anayo, Pintueles, Infiestu, Arniciu, Moandi, El Picu y Sotu ya Iván pel monte d'Arniciu p'alante. Que vos presten.



Foto de familia, vaya sustu ver a tanta xente nel comienzu d'esta chifladura

La primer liebre, Jorge Pablo n'Espineres

¡¡¡Milagru!!!, esi termo con té con miel munchu valió...

Pasando pel Altu La Llama como tiros

Pintueles

Primer avituallamientu n'Infiestu, km 31, 1500 m+ y 3h19'


Camín de Picos Verdes a la lluz de la lluna

Amanecer en La Chamoca, namás por esto yá mereció la pena la h.odía...



Llegando a Arniciu, km 65, 3800 m+ y 10h27'





Camín de Los Negros con Iván, la segunda liebre.


En tantes hores arreglamos el mundu 3 o 4 veces...

Llegando a Traslasenda col Vízcares de fondu.

Detrás del Peñón de Les Travieses col Cornión al fondu y La Llambria a la derecha.

Subida a Peña Crespa.


En Pandemules; "pero, ¿hai que subir ehí, ho?", "sí, fiyu, sí"

¡¡¡P'arriba!!!

Llegando a Maoñu, La Llambria y Campigüeños detrás.

¡¡¡Pero si tovía falta la de mi madre!!!

La tercer liebre, Samalea, en Traslafuente, km 76, 5200 m+ y 14h15'

Subiendo al Cuniu, el valle del Semeldón a la derecha.

Llegando a Tameces, cualquier escusa ye buena pa sentase...

Llegando a Moandi, km 84 y 16h27'


Nun fai falta explicar munchu, ¿non?

Metiendo combustible al cuerpu


Buff, pues tando equí hai que llegar como sea...

Concentración nes primeres rampes a Fontecha


Equí sabemos que yá lo tenemos fechu (nótase, ¿eh?), última subida...

...con felechu y cotolla pa variar...


...y algunes escobes pa dar más emoción...

...más felechu, cotolla y escayos...

... y por fin...

 ...llegada a Sotu Dueñes con un recibimientu espectacular!!!

Últimos metros con Manu que quier sumase a la causa

Iván y Samalea, l'equipu d'apoyu nes últimes hores

Colos "culpables" de tou esti tinglao, Román y Javier


Munchísimes gracies a:

Velino por "dexase" engañar desde'l primer día que-y comenté la xugada y acompañame nesta aventura

Jorge Pablo, Iván y Samalea por acompañanos durante la ruta

Laura, Javier, Mavi y Manolo, Jorge y Miguel por andar pendientes de nosotros tola nueche y tol día.

Raquel y los collacios de León, Carmen y Ricardo, Sebas, Ana y Zoe, Ángel, Joaquín y Rolindes, Román, Eloísa, Ignacio y Paula, Furu y Vanesa, Laura y Manu por dir a danos ánimos.

Tolos que d'una manera o d'otra anduvisteis pendientes de nosotros, bien per teléfonu (Ángel y Malini, Seve, Marta...) o per facebook, mail, etc.

Ángel Espina, Enrique Carballeira y Lucas Blanco por facer que nos medios de comunicación apaezca dalgo más que fútbol y F1.

Los vecinos de Cúa, La Escosura, Braniella, Robléu, Anayo, La Formiga, Cadanes y Ques por amarranos los perros esa nueche.



La castronada...¡¡¡en prensa!!!:

Previu en El Comercio

Nota d'Ondacero Infiestu

El Comercio

La Nueva España


7 comentarios:

  1. Non puedo dedir otra cosa que, ESPECTACULAR, SOYS LOS MEJORES.

    ResponderEliminar
  2. Ye impresionante lo fuertes que tan, tantu fiscamente como de la cabeza, pa facer semejante xatada
    ¡¡¡Felicidaes!!!

    ResponderEliminar
  3. Tais como maraques,conteta estara alguna madre.....
    A le, a preparar otra mas gorda campeones.

    Pd. Como se ocurrio con esi jabali ?

    ResponderEliminar
  4. tais como toros makinas!!!enhorabuena por esi recorridu.
    un saludu.

    ResponderEliminar
  5. Enhorabuena por el retu tan guapu que ficísteis y más por el tiempu que echásteis pa ello.HAY QUE "ANDAR" MUY FUERTE...aunque no esperaba menos de semejante pareya...

    ResponderEliminar
  6. muches felicidades a los dos y eses liebres que anden la de dios amigos. un abrazo para todos.

    ResponderEliminar
  7. Una pasada chavales , como me prestó ver les fotos y imaxiname yo elli
    Un abrazu pa tos .

    ResponderEliminar