martes, 20 de septiembre de 2011

Ultra Trail Castrón en Piloña (I). Introducción.

Distancia aproximada: 98,4 Km
Desnivel positivu acumuláu: 6000 m
Desnivel negativu acumuláu: 6000 m
Desnivel total acumuláu: 12000 m
Puntu de salida y de llegada: curvona de Sotu Dueñes
Sentíu de la ruta: antihorariu
 Track equí (el puntu de salida y llegada del track ye Infiestu, coses de la informática...)



Dende la mesma puerta de casa tenemos la suerte de tener terrenu bastante pa enredar. Nun fai falta dir mui lloñe pa facer actividaes potentes, castronaes de les de verdá. Viaxar ye mui guapu, pero nun ye asequible andar de rumba tol añu, amás que tol monte que tenemos alredor de casa nun tien nada qu'envidiar al de ningún otru sitiu, y encima ye'l monte onde chamusqué les primeres catiusques, les primeres chiruques mercaes a Eduardo Marina, les primeres botes de monte (¡por fin!), les primeres cubiertes de la bici de ruedes gordes...
Con un par de proyectos tovía en mente, unu de Furu (venir de Tarna a Infiestu nel día) y otru míu (Infiestu-Ñiañu-Vízcares-Maoñu-Peña Crespa-Facéu-Sellón-Infiestu), planteéme esti añu rematar la temporada de correr con una castronada de les buenes, de momentu la más gorda na que me voi metiendo con diferencia...
Na Semana Cultural de Montaña 2009 del Grupu Montañeru Vízcares, coincidiendo col LX aniversariu del grupu, los hermanos Javier y Román Benito presentaben una proyección sobre una ruta circular al conceyu Piloña en 8 etapes, siguiendo'l límite natural del conceyu, pela llinia d'agües vertientes. Yera una ruta de trekking pero tiraron al aire la posibilidá de facela non-stop, como otres muches qu'hai n'Alpes, Pirineos...
Como podéis imaxinar aquello quedó grabáu "pa más alantre" y esti añu animéme a meteme con ello. Nesti mes de setiembre tan buenu fice la ruta en tres etapes pa dir sacando tracks pal gps, calculando tiempos y reconociendo'l terrén. La idea ye facela del tirón nel segundu fin de semana d'ochobre en menos de 24h, ver veremos...
Antes de siguir quiero agradecer a Javier Benito tola información y fotos que me pasó, a Jorge el de Valles el préstamu del gps y les vueltes que-y fice dar pa sacar los tracks d'esi cacharrón y a Laura'l dir a buscame a los finales d'etapa col bocadillín y la cervecina, así como'l facer una etapa conmigo na que m'ayudó a desbrozar a guiadazos algún qu'otru tramu...

¿Por qué empezar la ruta en Sotu y non n'otru llau?, bona pregunta. 
Pa facer la ruta n'etapes (les que sean) pues la verdá ye que da igual empezar en cualquier llau, pero pa facela d'un tirón nun solu día ta claru qu'hai que tar corriendo como pocu durante una nueche. Tuve dándo-y muches vueltes al asuntu, si salía a les 8 la mañana, mui guapu, empezar a correr de día, dormir bien y tou eso, pero diba garrar la noche después de llevar 12-14 h corriendo, cansáu y colos reflexos mui xustos. Si salía a les 12 la nueche, tenía marxe pa intentar nun tener que prender el frontal una segunda vez, facía 8 hores de nueche a lo primeru (frescu y con reflexos) y tenía posibilidaes d'acabar de día. Ésta ye la opción qu'escoyí, pero quedaba'l tema que si salía d'Infiestu, antes d'amanecer taba nel pasu de Los Negros y tenía que facer tol crestéu de Breza a Arniciu de nueche, cosa mala. Si salía de La Llama, lo primeru hasta Infiestu d'orientación ye mui fácil y diba amaneceme antes de llegar a Arniciu, pero quedaría pal final del tou la subida de 1000 m a Espineres... Saliendo de Sotu, garro la subida a Espineres lo primeru (aunque de La Invernal a Espineres nun ye lo más fácil pa orientase de nueche, pero téngolo bastante pateáu), el tramu d'Espineres a Infiestu ye fácil y amanecería más o menos a la altura de Breza, pero fiju que llegaría de día a La Chamoca, onde hai un flanquéu un pocu delicáu pa facer a oscures. Esta opción tamién tien la ventaxa que los últimos km son prácticamente tou p'abaxu y a la mala si oscurez, carretera d'El Picu p'abaxu y acabáu'l problema de la orientación na posible segunda nueche...
El facelo en sentíu antihorariu tien la lóxica de facer les cuestes más llargues (Espineres-Infiestu y Moandi-Sotu) y más corribles en sentíu favorable pa ganar el máximu de tiempu posible.

A continuación va un resumen de la ruta, buscando siempre la elegancia del trazáu y una xustificación lo más montañera posible, sin ceñise estrictamente a los límites administrativos del conceyu (que nun dexen de ser cuatro rayes sobre un papel), polo que veréis qu'unes veces la ruta pasa per otros conceyos y otres nun llega a agotar el propiu conceyu. Más alantre, n'otres entraes, diré explicando detalladamente tola ruta colos tracks, cruces y los pasos clave, pa tou aquel que quiera facela entera, a peazos, caminando, corriendo...

Salida de Sotu Dueñes pa subir per Cúa, La Escosura, L'Acebal, Cerecea, Braniella, La Invernal, La Estrencha y Tardamoñes a Espineres.


D'Espineres a L'Altu La Llama, La Coroñina, Robléu, Anayo, bordeando'l Picu Viyao a La Formiga, El Brecín, Pintueles, Cadanes, Cayón, La Cabañina, Biedes, Infiestu, El Canalón, La Llana, El Palaciu, Xerra Ques, Collada de Maza y Picos Verdes.

De Picos Verdes a El Carbayal, La Llama, Aneres, Breza y La Chamoca.

De La Chamoca a La Carba, La Busllar y Collada d'Arniciu.

De La Collada d'Arniciu a Los Negros...
 

...Llagu Ovia, Ovia...

...Traslasenda...

...Cuetón de Les Travieses y Peña Crespa.

Baxada a Pandemules y subida a Maoñu.

Traslafuente, Culebrina...

...Xerra d'Aves, Colláu Los Llaos, Piedrafita, Llagos Ciegos y Cuniu.

De Cuniu a Tameces.

Baxada de Tameces a Moandi y subida a Fontecha.

De Fontecha a El Picu y subida a La Cuesta Bodes.

Baxada a Caldevilla, Villar y de nuevu Sotu Dueñes.








4 comentarios:

  1. Muchos frutos secos va a tener que pelate tu ma pa que acabes la ruta!! si no te echa de casa antes que ye otra posibilidad....jajjaja

    ResponderEliminar
  2. mucha suerte!!, haremos seguimientu! LCP

    ResponderEliminar
  3. menuda castronada, Jordi; espero que alguien te acompañe y no tengas que ir solu .... acuerdate que puedes contar conmigo pa avituallamientos o lo que se te ocurra :)

    ResponderEliminar