sábado, 24 de septiembre de 2011

Ultra Trail Castrón en Piloña (III). Descripción Tramu Infiestu-Arniciu.

35,3 Km
2300 m+
1500 m-
5h32' (corriendo)

Track

Mapa

Perfil



Gracies a los avances de la tecnoloxía y a lo burru que ye unu con toos esos aparatos esti tramu fícelu 2 veces; el track de la primera vez tovía nun se onde su madre anda metíu, por más que rebuscamos Jorge y yo dentro del gps nun apaeció, asina qu'a repetir pa poder grabar el track; a grandes males, grandes remedios...será por kilómetros!!!
Como podéis ver a pocu que comparéis los datos del tramu anterior (3h23' pa 31 km y 1500 m+) colos d'esti (5h32' pa 35 Km y 2300 m+), la cosa empieza a ponese interesante (más de 2h pa sólu 4 Km y 800m+ más...).
Pa facelo caminando, lo más normal sería partilo en dos, en Breza tenemos fuente y una camperuca mui guapa pa llantar la tienda, o podemos baxar pela pista hasta El Condáu y que vayan a buscanos y al día siguiente volver a retomalo ehí. Tamién podríamos facer esa maniobra recortando la primer parte y alargando la segunda quedando en La Llama, desde onde podemos baxar a Biforcos o dir hasta Les Praeres.

Vamos cola descripción: n'Infiestu garramos la carretera de La Marea/Campu Casu pa a los 700m garrar hacia la derecha la que sube a Ques. Namás pasar el km 1 d'esta última carretera, nel barriu de La Llana, sal un cruce p'atrás y pala derecha, que ye el de la foto d'abaxu.

Dexamos atrás un par de cases a cada llau del camín (na de la izquierda hai un perrísimu d'impresión, menos mal que ta bien cerráu...) y siguimos pa la izquierda. Na siguiente casa (que va quedanos a la derecha) hai otru par de perros salchicheros bastante impertinentes pero inofensivos (hasta'l momentu...).

Llegando al barriu d'El Palaciu garramos la pista ascendente pa la derecha.

Pasamos al llau d'un depósitu d'agua (quédanos a la izquierda) y tiramos pa la derecha.

Onde acaba l'hormigón (por fin!!!) vamos pa la izquierda, vamos pasar per debaxu d'unos pinos doblaos encima'l camín a cuenta del aire, el que sea un pocu altu tendrá qu'agachase...

Siguimos subiendo pel camín/pista principal hasta llegar a esta camperuca tan guapa onde xiramos pa la nuesa izquierda pa dir a buscar la pista que recorre tola Xerra Ques pela parta d'arriba, cambiando delles veces de vertiente.

Aproximadamente a los 7-8 Km d'Infiestu empezamos a baxar hacia la Collada de Maza, onde hai una balsa d'agua que dexaremos a la izquierda pa siguir en dirección a unes cabañes. En coloráu ta marcáu per onde pasé siguiendo tol Crestón de La Trapa hasta Picos Verdes. N'azul tenéis otra opción, garrar esa pista que va en llanu hasta onde acaba y ehí subir p'arriba a Incosa pa después subir a Picos Verdes.

A partir d'equí'l camín ponse pindiu y xira pa la derecha.

Siguimos esi caminucu hasta cruzanos cola pista que-vos dicía va un par de fotos.

En saliendo al cantu, a unos 30m de la pista, xiramos pa la izquierda y cresteamos tou hasta Picos Verdes.

Vista p'atrás en mitá de la cresta. A la derecha vese la Collada Maza y al fondu del tou El Sueve.

Tola cresta que falta pa llegar a Picos Verdes. A la iquierda vese Incosa y la pista.

Vista desde arriba del fin de la pista y d'Incosa, hai un caminucu que sube entre les escobes.

Picos Verdes o Picu La Múa.

Toca baxar siguiendo esi cordalín hasta El Carbayal y después a La Llama. Vese tola subida que tenemos a continuación: La Llama, Sabadiellu, El Colladiellu, Aneres y Breza.

En La Llama (pa la izquierda diríamos a Biforcos y Puente Miera y pa la derecha a Les Praeres y Nava) siguimos de frente 20 m y garramos esa pista que va pa la derecha.

Un pocu antes de la cabaña onde muerre esta pista, antes de cruzar la riega, subimos pa la izquierda como podamos a buscar una camperuca (Sabadiellu) onde arranca esta riega, buscamos na parte superior de la campera un caminucu mediu tomáu que va pa la izquierda hasta la campera d'El Colladiellu y ehí siguimos un caminucu que sal onde un fresnu grande dirección Aneres (veislo 2 fotos más atrás y tamién 2 fotos más alante)

Una vez que tamos en Aneres, tou p'arriba siguiendo la campera.

El camín que sube d'El Colladiellu a Aneres y más al fondu a la derecha Picos Verdes.

Mas o menos a la mitá d'Aneres hai una baxaduca pa cruzar una riega, una vez que la crucéis, dir lo más a la izquierda que podáis, siguiendo'l cantu exterior de la campera pa evitar les llamargues qu'hai pel mediu.

Una vez en Breza (el colláu d'arriba'l tou), subimos a la izquierda al cantu y cuando llegemos al final, onde'l picu, baxamos pa la vertiente piloñesa pa rápidamente hacia la derecha buscar el pasu que se ve na foto siguiente (la foto ta sacada mirando p'atrás después de pasar esti tramu)

Vamos buscando'l meyor camín lo más llanu que podemos...

La Chamoca a tiru piedra.

Al llegar a La Chamoca, subimos hasta onde empieza'l bosque pa facer un flanquéu per onde podamos (cualquier paecíu con un camín ye pura coincidencia...cuidadín...) lo más en llanu posible dexando'l picu a la derecha.

Vista p'atrás desde La Carba. La Chamoca a la izquierda col flanquéu a media altura pel mediu'l bosque.

Mirando p'alante desde La Carba. Equí nun se-vos ocurra intentar atayar pela izquierda, yá se que se ve muchu más cortu, más llanu y nun paez mui malu, pero hai una reserva internacional de cotolla que'l primer día que fuí apetecíame llorar viéndome metíu ehí enmediu en malluques cortes...(esaxeráu, mira que llevo años metiéndome en sitios malos, pero como eso creo que nunca...)

Un bon peazu más alante mirando p'atrás. Equí hai que dir siguiendo llombes sin más...

...buenu, sin más sin más...sube, baxa, sube, baxa...

L'últimu piquín (El Cabezu) pa dir baxando en busca de La Busllar (a la izquierda)

Na llomba antes de La Busllar vamos cruzar una pista más o menos perpendicular a la llomba, namás pasala sal una caneyuca hacia la vertiente piloñesa (izquierda) que bordeando pela parte d'arriba los praos que se ven debaxu de La Busllar va llevanos hasta Arniciu.

Arniciu, fin d'etapa. Enfrente la subida al cantu pa dir a Los Negros (un pocu pa la derecha). Equí'l camín pasa al llau d'un bebederu con dos caños, col calor que facía casi lu seco...











No hay comentarios:

Publicar un comentario