Los Castrones: V Carrera de montaña Sierra Elvira, Atarfe, Granada. 01/05/2011.

Primera prueba puntuable pa la Copa d'España FEDME 2011

28,5km

1800m+

2h41'38''

El vienres a eso de les 14:00, después de trabayar pela mañana y comer a toa prisa, salimos en coche dirección Granada. El plan ye conducir hasta una hora prudente (21-22) p'adelantar viaxe y poder llegar a Granada pela mañana non muy tarde y poder facer un pocu de turismu. Al final llegamos a Linares, pueblu natal de Rafael y onde morrió Manolete, amás d'onde taba la fábrica Santana Motor, d'onde salieron los míticos Land Rover y varios modelos de Suzuki y que cerró en febreru d'esti añu (manda güevos de lo que se acaba enterando unu a cuenta de dir a correr...), a cenar y facer noche. Pela mañana salimos pa Granada, vueltina turística, visita obligada a la Alhambra y a última hora de la tarde arrimámonos hasta Atarfe a pol dorsal.

Sierra Elvira desde la Alhambra, col barriu del Albaicín en primer planu.

El día D desayunu llixeru (un plátanu, un kiwi, una manzana, un yogur, 4 rebanaes de pan turráu untaes con tomate y aceite d'oliva, fuet, un café con lleche con una rosquillona y un zumín de naranxa, nun vaya ser que me de la fame...) y pa la salida, ambientín de carrera (musica ratonera al altu la lleva, fedor a reflex, xente buscando desesperadamente un sitiu pa soltar llastre a última hora...), un pocu de trote salchicheru pa calentar un pocu y a saludar a tola xente conocía. D'Asturies somos cuatro, Martín Álvarez Espinar y Jorge Rivero del Piloña Deporte, Pedro Rodríguez Cuenca del Running Team Lafuma y el menda del Vízcares.

A les 9:30 salimos, como siempre métome na cabeza de la carrera, aunque esta vez nun voy ser yo el que tire, dame a mí que la cosa va un pocu más lanzada de la cuenta. Fórmase un grupín de 6-7 corredores y yo voy faciendo un pocu la goma aunque sin soltame del tou. Empezamos picando un pocu p'abaxu, un pocu de llanu y un repechín que a estes velocidaes manca y vuelta a picar p'abaxu. Llega el km 2 y al mirar el reló casi me salten los güeyos, 6'12''!!!!, pienso que tien que tar mal marcáu, pero al pasar pel km3 veo que'l ritmu sigue siendo paecíu, nun se si llegaremos muy allá a esti pasu....De repente empezamos la primer subidina del día, un kilometrín per un caminucu que va faciendo zetes y que se puede correr casi tou aunque hay traminos de caminar, encuéntrome bien y nun pierdo de vista al grupín d'alante.

Al llegar arriba y empezar una baxaduca corta adelanto a dos

Primer avituallamientu nel km 4 que paso de llargu y empieza'l mio calvariu particular de 10km de pistes entre olivos, sube y baxa pero tou de correr como energúmenos, comienza a pasame tou dios y nun soy capaz de siguir a nadie, nun se como son capaces de zapatear d'esa manera; empiezo a comeme la cabeza: pa ser la carrera tan dura como dicíen menuda mierda pienso yo, a ver si hay suerte y la subidina de casi 500m que me paeció ver nel perfil nel km 19 ye de caminar, porque como sea de subir corriendo llévolo claru...Martín va delante pero véolu, nel avituallamientu del km 10 (garro un puñáu de pases y bebo un vasín d'agua) gárrame Pedro y después de dir un cachu con él déxame atrás.

Saliendo (rumiando pases) del avituallamientu del 10 con Pedro

Nel 15 ta'l siguiente avituallamientu, otru puñaín de pases, un vasu d'isotónicu y otru grupín de 4-5 que me garra, lo que faltaba...pero damos una curva y de repente un peazu subida al Piorno cola que nun contaba pero que agora que me acuerdo nel perfil prometía, 350m de subida que nun creía que diba ser tan pindia, ye de subir caminando, bien, caliéntome y p'arriba como un animalín, adelanto a unu, distancio a los d'atrás y acércome muchu, muchísimu a los d'alante, ah coyones!!!, yá me paecía a mí que tantu correr nun podía ser... al llegar arriba empieza un baxada muy rápida na que nun arriesgo (toy pensando nel viaxe de vuelta, 9h y picu conduciendo y como que nun me apetez triscar un tobillu...), vuelven a distanciase un pocu los d'alante y pásenme 2 pero intento mantener la calma, a ver si llega d'una puñetera vez la subida del 19...

Llego abaxu y tovía hay otru km en mediu llanu picando p'arriba hasta'l siguiente avituallamientu, vuelve a pegáseme per detrás otra vez un grupín, nun hay manera de correr tranquilu güei!!!, en pasando l'avituallamientu por fin empieza la subida al Colláu del Morrón, veo a Martín y a Pedro relativamente a tiru y empiezo a da-y fierru a muerte.

Llegando al Colláu del Morrón, tirando de lumbares, cuádriceps, manos y hasta de les oreyes!!!

Adelanto a media docena y distancio a los d'atrás menos a unu, que ta igual que yo, esperando la subida dura de la mitá final de carrera pa intentar recuperar puestos, voy pletóricu aunque se que queda poca subida, como la baxada de después sea tan rápida como les d'antes nun me va servir de nada garrar esta pulmonada subiendo...

Al llegar al Colláu del Morrón Laura dizme que Martín y Pedro van muy cerca y que voy muy bien, continúo la subida al Morrón de Enmedio qu'encima ye entre peñes y más técnica, colo que vuelvo a motivame otru pocu más y sigo garrando xente.

Llegando al Morrón de Enmedio

Al empezar a baxar pásenme un par d'ellos como tiros, arriesgando bastante y un pocu fuera de bolos, a estes altures de carrera y col ritmu al que tamos corriendo los reflexos van un pocu xustos, asina que sigo a lo míu. Gárrame el rapaz que dicía antes que nun yera a distancialu muchu subiendo, paramos nel avituallamientu del 22 a tomar un vasu d'agua y facemos tola baxada/flanquéu hasta'l 23 xuntos, esti tramu ye'l más técnicu con diferencia de tola carrera, hay que andar entre escobes per un senderucu bastante malu nel que como muchu puedes correr como Chiquito, les baxaes son tan pindies que hay que garrase al matu pa poder frenar y nun permiten embalase más de la cuenta a nun ser que quieras dar una buena llombada, hasta tres pegó el compañeru (Raúl, del Hockey Alcalá), pero ye duru, pregunto-y que si ta bien y dizme que sí, tamos baxando bastante fuerte pero seguros, a estes altures nun se puede arriesgar, que h.oder un tobillu ye un momentu. El grupín d'alante ta prácticamente a tiru, garro a Martín, dizme que lo dexa, tien calambres nos xemelos, seguimos dándolo tou y de repente nel km 23 agradable sorpresa, empieza otru peazu subida al Morrón de la Punta d'unos 200m de desnivel y muy pindia, la xente d'alante vese que va cocía y dígo-y a Raúl qu'ésta ye la nuestra. Pongo l'interruptor de mou Castrón en posición de da-y hasta que fienda y pasamos a otra media docena abundante (entre ellos Pedro) que nun da créditu al venos subir como cazas, distánciolu unos metros pero nun se suelta ni pa dios. Al baxar de nuevu al Colláu del Morrón ponse delante y baxamos xuntos hasta'l km 25, onde vuelve a ser terrenu más llanu y corrible. Últimu avituallamientu que paso de llargu pa nun echar tiempu y Raúl que se me esacapa pocu a pocu, bueno, vamos bien equí, pienso, al pocu gárrame y pásame otru, y otru más que se acerca, h.oder, ni al final van dexame tranquilu!!!, a esti paez que-y mantengo la distancia, yá llegamos a meta, miro p'atrás y veo que ta lejos, relájome un pocu pa disfrutar de la entrada a meta con tola xente animando y de repente veo qu'empieza a esprintar, cagonsugüela, menuda pulmonada que garré na recta final, y pa encima pasóme!!!!, seré castrón!!!!

Al final puestu 14 con 4 corredores delante nel mesmu minutu, pa contar quedar sobre'l 20/30 y ser tan de correr nun tuvo nada mal, encontreme muy bien, pero onde ye de correr la xente anda muchísimu, ye lo que hay, menos mal que hubo eses tres cuestes dures de caminar na parte final de la carrera...
Muy buena carrera de Pedro (23º, 2h45'47'', primer veteranu) y de Jorge Rivero (32º, 2h48'49''), organización impecable, buen ambiente y mucha xente animando, cosa d'agradecer.

Paleodieta castrona pa reponer fuerces (chuletón de güé de 800gr a la brasa y vino de la tierra)