Los Castrones: Zegama. 29/05/2011

2ª prueba puntuable pa la Copa del Mundu 2011 Skyrunner World Series Race

42,195 km

2736 m+

5h04'12''

Falar de Zegama nel mundu de les carreres de montaña ye falar de "La Carrera", nun ye la más llarga, nin la más dura, nin la más técnica (aunque nun ye ningún paséu, eso por descontáu), pero algo hay que fai qu'haya puñalaes tolos años pa conseguir unu de los 450 dorsales pa correr. Esi algo nun hay duda que ye ver a tou un pueblu absolutamente volcáu cola prueba, ye'l día de fiesta por excelencia, les imáxenes que se pueden ver en cualquier vídeo de cualquier edición (buscái en youtube o vimeo y veréis de lo que falo) con esa montonera de xente animando a los corredores como si fuese la etapa de montaña reina del Tour, fai que unu se respigue al velo y que diga: "polo menos una vez na vida hay que dir a correr a Zegama".

Conseguir un dorsal ye muy complicáu, la organización reserva 125 places pa los meyores tiempos de les dos ediciones anteriores (una especie de selectividá, de tiempu de corte) y pa los que hayan termináu en toles ediciones, otres 100 pa compromisos por ser prueba puntuable pa la Copa del Mundu (selecciones, etc) y el restu, 225 dorsales, salen a sortéu entre tola xente que se preinscriba (esti añu 3219 chiflaos!!!!). Yá ye'l segundu añu que nun tengo suerte nel sortéu, pero l'haber ganáu la Copa d'Asturies 2010 de carreres de montaña abrióme la puerta pa poder participar nesta edición, polo tantu vamos con un pocu de presión pa facelo lo meyor posible y a poder ser intentar facer un tiempu que permita asegurar la plaza pa los dos años siguientes.

Arrancamos el sábadu p'allá, paso per Arenes de Cabrales a recoyer a Íñigo y a Juan Mier, Íñigo nun va poder correr a cuenta una lumbalxia que tien desde'l xueves, pero vien igual, nun quier perdese la fiesta. Llegamos a Zegama y vemos un ambientazu impresionante, ta tou preparáu pa mañana pa la carrera y ta llenu xente. Tomamos algo col restu d'asturianos y a cenar y pa la cama.

Mier, Kilian Jornet, Íñigo y yo

Suena'l despertador a les 6:20, desayunamos y pa la salida, hai que dir tempranu pa nun tener problema p'aparcar. Decido salir casi colo puestu, una riñoneruca con un par de xeles, una barrita, dos onces de chocolate negru y el cortavientos qu'hay que llevar obligatoriamente, nun llevo'l botellu con agua y sales que suelo llevar porque vi qu'había un montón d'avituallamientos (17), gran cagada y amás merecía porque les previsiones daben muchu calor...

Dase la salida a les 9:00 en puntu y después de dar una vuelta pel pueblu enfilamos la primer subida, encuéntrome muy bien y procuro nun cebame col ritmu, nun hay qu'olvidase que tamos corriendo colos meyores corredores del mundu, asina que tranquilidá. En Otzaurte (km 7), después d'unos kilometrinos de pista, primer subida importante d'adrenalina, "Ambiente Zegama" 100%, ta la xenta animando como lloca, lleven la llista dorsales que sal nel periódicu p'animar a tol mundu pol nome (Aúpa Jordi, aúpa Asturies!!!, esto va repetise durante absolutamente tola carrera), colo que na subida fuerte qu'hay namás cruzar la carretera, cuando quiero dame cuenta toi subiendo corriendo a tou trapu y adelantando al grupín que llevo delante, increíble. Nel avituallamientu d'Ultzama (km 8,7) bebo algo y na baxada de después per un prau que a estes hores tovía ta rosáu pego una llombada y ortígome enteru, evaluación rápida de daños (cagonsumadre, como pica!!!!) y al ver que nun fue nada p'alante. Pel km 10 paso en 52'28'', otru par d'avituallamientos y enfoco la subida al Aratz, vengo como una moto pero de repente (sobre'l km 15) empiezo a acalambrame enteru pela cara interna de los cuádriceps, pelos xemelos y un calambre rarísimu que fai que me queden los pies en garra, cada vez que tropiezo o resbalo súbeseme tou (y así hasta meta...). Llego a la cumbre del Aratz como puedo en 1h48' y pa que-vos deis cuenta del estáu en que llevaba les pates, tardé 18'33'' en facer los 3 km de baxada hasta'l avituallamientu de Sancti Spiritu (km 20), al que llego en 2h07' xunto cola primera muyer (Ohiana Kortázar). Cuando toi a puntu de salir llega Copete, toi mosqueáu porque nun llegó ni Santi ni Fuego ni Mejido, tuvo que pasá-yos algo. Enfoco la subida y ta tola xente animado como lloca, llevo les pates igual que tablones pero arranco a tou trapu p'arriba, el ruidu ye ensordecedor y casi nun hay ni sitiu pa poder pasar. Daste cuenta qu'esta xente de verdá valora lo sacrificáu que ye entrenar pa poder tar na llinea de salida d'una carrera d'esti tipu y llegar a meta, independientemente del puestu o del tiempu, tienen otra cultura de lo que ye'l deporte y saben que nun somos profesionales d'esto ningunu de los que tamos equí, que sacamos tiempu y ganes d'onde sea pa entrenar y polo tantu animen igual al primeru que al últimu (casi casi como per equí, onde nel meyor de los casos somos los mangantesquemeyortabentrabayandoquematandolviciu, "buenu polo menos mientres se dediquen a eso nun-yos da por coses peores"...).

La cuesta después del avituallamientu de Sancti Spiritu

Toca facer la mítica subida al Aizkorri, paez que p'arriba puedo apretar y hasta corro algo en algún tramu, de repente nun escalón un pocu más altu de la cuenta, al llevantar la pierna derecha, dame un latigazu nel cuádriceps y quedo cola pata trabada que nin p'alante nin p'atrás, estiro un pocu como puedo (pa nun trabar per otru llau...) y sigo con muchu cuidáu de nun dar pasaos llargos nin tropezar, ¡¡menudu arte!!. La táctica que sigo ye la siguiente: cuando veo que empieza un calambre aguanto'l dolor y sigo moviendo'l músculu sin parar, pa que pocu a pocu vaya soltando (en casu de parar del tou, traba de golpe y entós tengo qu'estirar, col riesgu de que me de otru calambre n'otru sitiu...), si veo que caminando vienen los calambres, corro, si veo que ye corriendo, camino, y si vienen de cualquier manera faga lo que faga, aprieto los dientes, echo un par de cagamentos y sigo...

Llegando al Aizkorri

Llego al Aizkorri en 2h40', agora vien una cresta caliza bastante técnica, ye'l mio terrenu, pero con esti arte pates ye lo que menos me convien, manda güevos que colo que siempre reniego de les pistes toi deseando garrar una. Consigo llegar al Aitxurri en 2h59' y empieza la baxada bautizada polos corredores como Hostiagorri (yá podéis imaxinar que ye cualquier cosa menos llana), con esti calor ta seca y nun tien peligru, como ye de dar pasinos mui cortos pa nun embalase consigo baxala con bastante dignidá y sin perder muchu tiempu. Queden unos 4km de prau más o menos en llanu, pasando per Arbelar, Oltze y Urbia, onde empieza la última subida del día pa llegar al Andraitz, onde llego en 3h53'.

Subida al Andraitz

Fice muy bien esta subida y al llegar arriba "solu" me queden 12 km de baxada hasta meta, que con estos calambres van a ser un auténticu supliciu. Tol mundu diciendo "aúpa, ya lo tienes chupao que es todo p'abajo" y yo pensando pa mí "si ho, vaya lo que m'espera". Voi baxando tou enterizu, a peazos tengo que caminar, paro una vez a estirar los xemelos que quieren subir per enriba la rodilla, adelanto a unu que va caminado que cuando más alante camino yo pásame él y así unes cuantes veces; paso l'avituallamientu de Itzubiaga y al salir del de Moano gárrame Copete, facemos unos 4km xuntos charrando colo que paez que pasen más rápidu pero tengo que dexalu tirar porque nun puedo dir al so pasu sin acalambrame enteru. Llegando a Zegama garramos un tramín de hormigón y otru d'asfaltu, lo que faltaba p'acabar de rematar...pero por fin llega la meta, 5h04'12'' y puestu 89, nun ye'l tiempu que contaba facer pero pa la escabechina que hubo a cuenta'l calor y pa lo mal que me salió la carrera tampocu fue un tiempu tan malu.

Entrando en meta con tola xente animando

De los asturianos namás conseguimos llegar Copete, Mier, Seve, Eva y yo, asina qu'esta edición paez que tuvo maldita pa nosotros, pero buenu, a mí la verdá ye que prestóme muchísimu aunque sufrí lo indecible pa poder terminar. Pa otra vez yá aprendí la llección, nun carrera llarga y sobre tou nun día de calor, tengo que llevar agua y sales pa evitar calambres, nun se puede echar pela borda tol entrenamientu y el buen estáu de forma que llevaba por una pijada d'estes, porque aunque les piernes nun diben, de fuelle y de fuerces diba sobráu como nunca.
Después de la ducha, la expedición de cabraliegos que vinieron a ver la carrera encárgase de que repongamos fuerces a base de chorizos a la sidra, quesu Gamonéu, sidra y hasta traxeron gaita y tambor!!!, colo qu'echamos alguna piecina con Pedro, l'hermanu de Mier.

Avituallamientu cabraliegu