domingo, 8 de mayo de 2011

Chamonix-Zermatt ( 5 de 6, 21/04/2011)


Nesta quinta y última etapa de montaña, si tou salía dentro de lo previstu, deberíamos llegar al pueblu de Zermatt. Ye un etapón, d'entre unes 10-12 h, 34 km, 1200 m+ (a nosotros saldríennos casi 1500 a cuenta de subir a la Tête de Valpelline) y unos 2900 m de descensu!!!!
Eso supón tar desayunando a les 5:30 y a les 6-6:15 funcionando, algunu quedó de madrugar hasta les narices... Como siempre, salimos los últimos del refuxu, nel que pa variar tampocu tuvimos agua ni pa lavar los dientes (lo únicu agua embotelláu a preciu d'oro), polo menos pela mañana dannos té calentín pa llenar el cámel, detalle que s'agradez. La primer subida del día vamos facela pel glaciar del Mt. Collon a unos -10º en dirección pal Col de L'Evêque, llegando arriba sal el sol y la temperatura vuélvese muchu más agradable. Baxamos hasta'l Col Collon y bordeando La Vierge pel norte vamos a dar al Glaciar Altu d'Arolla, onde entamamos la segunda subida al Col du Mt Braoulé. Na parte final tenemos que quitar los esquís, echalos al llombu y subir con crampones y piolet, hay un guía que sube encordáu a 5 clientes y quedamos acojonaos al ver que tien los santísimos coyones de subir col piolet...na mochila!!!! (por muy guía que sea, como-y caiga unu a ver cómo lu para, baxen los cinco hasta abaxu'l tou y posiblemente lleven per delante a otros 4 o 5...).
Otra baxadina hasta l'Haut Glacier de Tsa de Tsan, onde al ver que vamos muy bien de tiempu paramos a comer un bocáu tranquilamente antes d'enfocar la tercera y última subida del día al Col de Valpelline. Equí yá fai muchu calor pero subimos como tiros, llegar a esti colláu y ver apaecer xustu enfrente al Cervino y al Dent d'Hérens ye una d'eses sensaciones que fai que te respigues, tanta inmensidá y tanta belleza ye inexplicable, hay que tar ellí pa poder saber lo que ye.
Al dir bien de tiempu y ver la pala tan guapa que tenemos a la derecha, dexamos les mochiles en colláu y subimos a la Tête de Valpelline (3802m), desde onde paez que podemos tocar el Dent d'Hérens, ye un picu guapísimu, inxustamente eclipsáu pol Cervino, desde equí podemos contemplar l'enorme glaciar colgáu de la cara oeste, impresionante. Na pala de baxada pa volver al colláu  disfrutamos como llocos, la nieve ta perfecta y el dir sin mochila fai que disfrutemos tovía más, esto sí que ye esquiar!!!!
Garramos los trastos y a siguir baxando pel glaciar Stockji pa nun flanquéu hacia la derecha dir a parar al Zmut, a unos 2600 la nieve escasea y tenemos que dir ratoneando entre peñes tolo que podemos p'acabar quitando los esquís y siguir caminando hasta l'hotel Stafealp, al llau d'una de les pistes d'esquí de la estación de Zermatt. Como vemos que la pista ta abierta, paramos a tomar una merecía cerveza y tamos rellambiéndonos de pensar na baxada hasta Zermatt que vamos facer peles pistes d'esquí de la estación. Cuando arrancamos p'abaxu vemos que la pista ta prácticamente sin nieve, esquiamos 300 m y tenemos que dir caminado otru tantu pa poder empatar con otru tramu onde poder esquíar otru pocu...vaya chascu, por fin llegamos a Furri dende onde vemos Zermatt a tiru piedra. Equí nun queden más que cuatro retalucos de nieve, polo que vamos hasta'l teleféricu de la estación a ver si tovía podemos baxar sin tener que caminar, ta la taquilla cerrada pero un paisanu muy amable diznos que subamos, que no problem.
-Cenquiu veri mach
-Vaya majo y vaya enrolláu que ye pa dexanos montar nel güevu esti pola cara
-Bah, ye que ve que venimos de facer la Chamonix-Zermatt y deben tener el detalle porque saben que la xente llega cansada...
Namás posanos en Zermatt yá nos taba esperando otru, contando pa ver que tuviésemos toos y faciéndonos pasar pela taquilla, equí nun dan puntada sin filu...
Pal hotel, ducha (¡por fin!), cena y a tomar unes cervezuques pa celebrar 5 díes de tiempu espectacular, paisaxes impresionantes y llegar sin contratiempos y sin mancase, la meyor forma d'acabar la temporada d'esquí.


Track Equí.


Panorámica


Perfil y datos

Al ser la etapa del día anterior llevadera supónse que tamos descansaos, y al ser l'últimu día deberíamos tar aclimataos yá a l'altura perfectamente, aunque los pies d'algunu cada día ten menos aclimataos a les botes...
¡¡¡Vaya llaceria!!!


Saliendo del refuxu

Como lo primeru ye una carrilera qu'a estes hores ta xelada, salimos con crampones

Siguimos colos crampones hasta baxar d'un colladucu y llegar al glaciar de Mt. Collon

Calzando los esquís

La primer subida del día marcada con puntinos
 El Pigne d'Arolla coles dos posibles baxaes a Vignettes, el día anterior unos baxamos per un llau y otros pel otru

Berto llegando al colláu col Petit Mt Collon detrás y el Pigne d'Arolla a la derecha


Punta d'Oren este

Primer baxada

Vamos a bordear el piquín del mediu de la foto (La Vierge) pela izquierda


Nel Haute Glacier d'Arolla, cola subida al Col du Mt Braoulé delante

Vista p'atrás, el Mt Collon

La subidina al final paez que se pon pindia, crampones, piolet y cuidadín...




La baxada que ficimos pa llegar equí

Tête de Chavannes, Tête Blanche y la subida al Col de Valpelline pel Haut Glacier de Tsa de Tsan. Onde la rayina colorada ficimos una paraduca pa comer daqué.


Estos de Potes que bravos son, Toño col suministru de cecina y chorizu, namás-y falta l'oruxu

Subiendo como tiros al Col de Valpelline, fai un calor insoportable

Col de Valpelline, el Cervino presidiendo

La pala de subida (¡¡Y de baxada!!) a la Tête de Valpelline

Book fotográficu castrón na cumbre de la Tête de Valpelline col Cervino a la izquierda y el Dent d'Hérens en primer planu


 Juan

Furu

Luis

Iván

Ricardo

Alberto

Jordi

Disfrutando de la nieve perfecta y de dir sin mochila


¡¡¡¡¡YÍÍÍÍÍÍH.AAAAAAAAAAAA!!!!!

Grietes impresionantes después de garrar la mochila y empezar a baxar del Col de Valpelline

Un vídeo




Al fondu de tou esi valle ta Zermatt

Cervino

Dent d'Hérens


La Tête de Valpelline

Vaya cara de felicidá después d'esti peazu descensu, Tête de Valpelline a la izquierda, Tête Blanche a la derecha, en mediu'l Col de Valpelline, y del mediu hacia la izquierda tola baxada qu'acabamos de facer

Acábase la nieve y los esquís pa la mochila



Una cañina nel Stafelalp, con silles forraes con pelleya de castrón y tou

¡¡Vaya vistes que tien la terraza!!

Baxando pela pista a Zermatt, después de la cerveza paez que nos quedaba pequeña jejejje

Y sí, aunque paezca mentira esto ye una pista de la estación d'esquí de Zermatt ¡¡Y teníenla abierta!!




 En Furri yá nun queda ni gota nieve

Per equí deberíamos baxar esquiando

Y después de llegar, duchase y cenar, hay que celebralo, ¿non?


De momentu'l fedor a castrón desapaeció



Restu d'etapes equí: 1, 2, 3, 4 y 6

No hay comentarios:

Publicar un comentario