Eje pedalier HollowTech II

L'otru día púsime a desarmar l'eje pedalier pa llimpialu y engrasalu, porque cuando garraba la bici depués d'un tiempu, al dar p'atrás pa engrasar la cadena taba un pocu engarrotáu. La cosa ye qu'alcordeme de facer fotos pa publicalo cuando ya lu tenía desarmáu, paezme que ye una cosa interesante y vamos facer otra entrada nel foro pa MECÁNICA.

FERRAMIENTES:

Llave d'eje pedalier HollowTech II, nel su defectu un "pico de loro".

Llave Torx (T27)

Llave Allen 5 mm.

Martillu de goma

Grasa

Gasoil y pincel

Tiempu: 30 min.

Pasos:

1º Quitamos el tornillu más esterior de la biela (allen de 5 mm.)

2º Aflojamos el tornillu interior de la biela (allen de 5 mm.)

3º Llevantamos la pestaña de la biela

4º Estraemos la tapa de plástico que protexe de porquería l'eje

5º Sacamos la biela

6º Aflojamos el rodamientu del eje pedalier izquierdu (L). Ye rosca dereches (normal), pon una flecha con TIGHTENING (apriete)

7º Golpe al eje cola maza y sacamos l'eje colos platos y la biela derecha

8º Sacamos el rodamientu derechu, según indica la flecha con TIGHTENING (apriete), ye rosca izquierdes (al revés de lo normal)

9º Sacamos el tubu qu'evita qu'entre la porquería de los tubos del cuadru a los rodamientos.

10º Desarmamos los platos (llave Torx 27)

11º Llimpiámoslo tou

12º Engrasámoslo tou

13º El montaxe ye lo mesmo pero a la inversa

Les fotos del montaxe

Tou desarmáu enriba la mesa

Detalle de la pestaña qu'hai que llevantar a la biela (pasu 3º)

Rodamientos, cola flecha qu'indica'l sentíu d'apriete y el tubu qu'evita qu'entre porquería a los mesmos, la verdá ye que taben llimpios pero un non tenía nada de grasa y otru mui pocu

El tubu tien nos estremos unes juntes tóriques que facen la estanqueidá colos rodamientos, ye interesante cambiales si tán gastaes. La parte esterior del tubu tenía muncha arenilla, pero los rodamientos taben llimpios y rodaben bien ensin nenguna holgura.

Interior mui puercu d'una mezcla de barru, arena y grasa

Rodamientos llimpios y engrasos

Platos y eje llimpios, pa sacar el medianu hai que sacar primero'l pequeñu

Colocamos el rodamientu derechu (R) rosca izquierdes (apriete en sentíu antihorariu), metemos el tubu  de estanqueidá, colocamos el rodamientu izquierdu (L), (apriete en sentíu horariu), y introducimos l'eje colos platos engrasáu, pa finalizar damos unos golpes a la biela p'aseguranos qu'entró completamente y apretamos el rodamientu izquierdu (L), (apriete en sentíu horariu).

Acople de la biela nel eje

 Apretar los tornillos allen y listu. La verdá ye que va más suave al pedaleo y no se m'engarrotó más
PD: la bici ta un pocu puerca pero tenía dos opciones: dir a lavala o facer el mantenimientu y apetecíame más mecaniar jejeje. Pa la prósima fago fotos desde'l principiu con cada pasu, pa que quede más descriptiva la operación...