Castrones: Jorge'l de Valles y Jordi.
Recorríu: Urdón (75 m)-La Hermida-Bejes-Fornos del Dobrillu-Vau de Los Llobos- Vega d'Ándara-Fuente de La Escalera-Colláu de San Carlos-Picu San Carlos (2214 m)-Les Enclaves-Vega d'Ándara-Casetón d'Ándara-H.itu Escarandi-Tresvisu-Balcón de Pilatos-Urdón
Km: 46
Desnivel positivu acumuláu: 2900 m
Tiempu rodando: 5 h
Velocidá media rodando: 9,2 km/h
Tiempu total 8h 23'
Les dos probes bicis nel Picu San Carlos
Aparcamos la "fregoneta" onde la central d'Urdón y coincidimos con Pablo Criado, otru chaval y una moza que tán preparándose pa subir corriendo a Tresvisu pel Balcón de Pilatos, comentamos que contamos acabar el día faciendo esi tramu p'abaxu: "ah, pero, ¿puede baxase per ehí en bici?", ver veremos pienso yo, pero Jorge quier probar la so montura de doble suspensión baxando per ehí y yo, que vengo d'acopláu, nun voi negame...Les dos probes bicis nel Picu San Carlos
Una roturuca de fibres nun xemelu tienme "condenáu" a andar en bici unes tres semanes (correr ni en broma), sondéu telefónicu a ver quién tien plan ciclista pal domingu (lo de quedar en casa nun ta contempláu en ningún supuestu y menos col tiempu tan buenu que ta faciendo) y quedo con Jorge a les 7:00 pa dir pal macizu d'Ándara a pasar el día.
El día promete
Salimos un pocu en llanu hasta La Hermida, onde garramos la carretera que sube a Bejes pa nun parar de subir hasta'l Picu San Carlos, 22 km de subida sin descansu y más de 2000 m de desnivel tán esperándonos, col calor que fai a estes hores dame a mí que vamos cocer...
Primeres rampes de la carretera de Bejes
Llegando a Bejes, a la izquierda vese la pista que tenemos que subir
, Nes primeres rampes de la pista
Vamos garrando altura y dexando Bejes atrás
Pel fayadal del Monte La Llama
El Macondiú
Tresvisu detrás nuestru a la izquierda
Pocu a pocu llegamos a Bejes, acábase l'asfaltu y garramos la pista, paradina nos Fornos del Dobrillu a garrar agua nuna fuente a la parte abaxu la pista, siguimos hasta la fuente del Vau de Los Llobos y después de siguir subiendo sin parar por fin llegamos a la Vega d'Ándara, pequeña baxaduca y llegamos a la fuente de La Escalera, comemos algo y p'arriba otra vez, el plan ye subir al colláu San Carlos y subir andando hasta'l picu, pero empieza Jorge a porfiar qu'hai que subir la bici hasta arriba, que menudu descensu freeride que tien el picu, que si la doble, que si la de mi madre... total, mangámonos los dos coles respectives bicis arriba'l tou y a ver cómo nos arreglamos pa baxar d'equí sin escornexanos...
Llegando al Colláu San Carlos col Macondiú al fondu
Vistes desde'l Colláu San Carlos: Picu San Carlos
La Junciana y La Rasa de la Inagotable
Posando col Samelar detrás
Canal de San Carlos y Mayada Trulledes
Pa mentalizase pa la baxada comemos (de morrer, morrer fartucu...) y folgamos un bon peazu disfrutando de les vistes y de la temperatura tan agradable que fai, a pesar del sol y del calor que pasamos abaxu, equí al tar bastante altos corre un pocu de brisuca y el calor nun ye tan esaxeráu.
La Silla del Caballu Cimeru, la Pica'l H.ierru y La Rasa
Les Verdianes, el Colláu de la Llaguna y el Picu de Les Agudines
Cambio la gorra pol cascu y p'abaxu, la primer parte nun contábamos poder baxala, pero a necios, burros y castrones pocos nos ganen, conseguimos baxalo con bastante dignidá y empezamos a crecenos, na subida vimos un pedreru que baxa hacia'l camín de Les Enclaves (per onde suel baxase esquiando n'inviernu) y, claro, p'allá de cabeza a ver cómo ye eso de baxar un pedreru en bici...
El pedreru de marres
A base d'echar el culo bien p'atrás hasta casi tocar la rueda trasera, apretar los dientes y baxar de frente (como intentes xirar un pocu la bici marcha de llau), después d'algún amagau de caer y de posar algún qu'otru pie, llegamos al caminucu, piedra caliza gorda, cortante y suelta, pero polo menos la pendiente ye más asequible, asina que sin más novedá llegamos al Colláu d'Ándara, onde miramos p'atrás pa ver la barrabasada qu'acabamos de facer.
La subida marcada en verde y la baxada en coloráu
Pela derecha ye per onde subimos pela mañana y al fondu a la izquierda ta Tresvisu
Camín del Casetón cola pista que sube desde Bejes detrás
Tiramos p'abaxu pal Casetón onde contábamos tomar algo, pero nun ta'l guarda y baxamos pal H.itu Escarandi pa garrar la carretera que baxa a Tresvisu, ye increíble'l calor que desprende'l asfaltu, menos mal que vamos p'abaxu...
Cervezuca con limón nel chigre Tresvisu y a pola última baxada del día, la primer parte ye muy difícil, el camín tien mucha piedra suelta mui gorda, pero como va per una cuesta de pación nun tien mayor peligru, si caes vas al prau, asina que baxamos sin muchos miramientos y bastante alegres. El siguiente tramu ye de piedra suelta más fina combinada con escalones de roca y con un patiu brutal, na piedra suelta nun sabes hasta onde va empozar la rueda delantera y faise mui complicáu controlar la bici, aunque'l camín ye anchu nun hai sitiu pal error (la caída fuera d'él ye mortal) y nun vamos trazando pela meyor trayectoria, sinón pela más arrimada a la paré. Con esti percal, algún tramu puntual facémoslu cola bici de ramal (que vinimos a pasalo bien, non a facer el últimu descensu...), pero conseguimos baxalo prácticamente tou enriba la bici.
El de Valles en plena acción
Llegamos otra vez al puntu de partida, sin novedá y con una ruta más que completa en bolsu, día y paisaxes espectaculares, una subida tremenda y una baxada d'infartu, con tramos extremadamente técnicos y al límite de lo cicletable, aunque'l límite yá se sabe que lu pon cada unu, si nun se ve la cosa clara, pie a tierra y bici de ramal.
Bañín refrescante en ríu pa redondear el día y pa casina con una sonrisa d'oreya a oreya.
Panorámica
Perfil
Y como non, otra superproducción de los estudios de Valles:
Mui guapa ruta, norabona
ResponderEliminarmuy buena, habeis tenido que disfrutar como cabrones.
ResponderEliminarOjalá que hagais muchas.