Los Castrones: V Carreira Canón do Sil, Parada do Sil, Ourense. 04/09/2011.

4ª y última prueba puntuable pa la Copa d'España FEDME 2011

33,2km

2200m+

3h22'38''

Esta vez tocó dir pa Parada do Sil a facer la última prueba de la Copa d'España, son cuatro carreres (Sierra Elvira en Granada, Artenara en Gran Canaria, Aramotz en Bizkaia y ésta) y cuenten les tres meyores puntuaciones según un sistema de coeficientes de dificultá un tantu "peculiar". Esti coeficiente varía según los kilómetros y los metros de desnivel de cada carrera, a más kilómetros y a más desnivel, más puntos. En Aramotz, a última hora, tuvieren que variar el recorríu por problemes de permisos, quedó la carrera más dura pero mantuvieren la puntuación inicial porque dicíen que la xente había planificáu la temporada colos coeficientes que la federación había publicáu a principios d'añu y entós dexábenlo como taba (ye una opción xustificada aunque tamién podía xusitificase perfectamente la contraria, el aplicar el coeficiente real de lo que se corre). Equí la páxina de la carrera publicó dende un primer momentu un coefiente de 74, mientres que la Fedme, nun se sabe mui bien porqué, dixo que yera un 62. Na charla técnica del sábadu explíquennos (los de la Fedme) que ye un 74 después de comprobar los datos pero que como habíen dichu (la Fedme) dende'l principiu que yera un 62, pues que lo dexaben asina (ta bien meter la pata y nun dar el brazu a torcer...). Esti sistema de coeficientes a mí nun me convence muchu si ye pa carreres de condiciones paecíes (como nesti casu, toes sobre 30 km, más o menos unos 1500/2000 metros de denivel positivu y sin grandes dificultaes técniques), pero si hai que facelo asina, polo menos que se faga bien. Eso sí, tou aquel que quiera facer una reclamación, por escritu, nel plazu de 7 díes y previu pagu de 60€...

A mí a Gran Canaria nun se me arregló dir (por feches y porque'l presupuestu pa dir hasta allá yá se disparaba un güevu y parte de la yema del otru...), yera xunto con ésta la que más puntuaba, asina que había qu'intentar facelo bien.

Salimos a les 9:00, ta orbayando, la salida pica p'arriba durante unos 500 m, nun paez que vayamos excesivamente rápidu pero fórmase un grupín d'unos 10-12 onde voi metíu, enseguida garramos un caminucu y empieza la fiesta, una baxada per un caminucu empedráu pel bosque d'unos 4 km mui entretenía y mui guapa. Toos en fila d'unu y aunque vamos bastante rápidu nadie baxa despendoláu, esto acaba d'empezar y tovía queda muchu.

Antes del primer avituallamientu tenemos un tramín mediu en llanu mediu picando p'arriba onde garro a Javier Pacios y veo a un de la selección madrileña a tiru.

Namás salir del primer avituallamientu

En pasando l'avituallamientu empieza la subida, primero ye corrible y después ye bastante pindiu, garro al madrileñu y pásanos otru como un tiru. Vamos per un bosque y de repente garramos un tramu de subir prácticamente a cuatro pates onde ayudo al madrileñu a salvar un pasu emburriándolu coles dos manes desde abaxu y después aprovecho pa pegar un tironucu, adelantalu y garrar unos metros de ventaxa. Pocu después la pendiente yá nun ye tan fuerte pero sigue siendo de caminar, veo a unos cuantos delante bastante cerca. Llegamos al altu, un pocu de baxada, una pistuca en llanu y otru avituallamientu, como algo y sigo, un repechín cortu y una baxada de 4 km mui pindia al principiu pa dir al siguiente avituallamientu, que coincide col primeru. Pásenme Pacios y el madrileñu como llocos, yo voi con algo más de cuidáu, ta moyáu aunque a pesar d'ello el terrenu garra mui bien, pero hai mucha piedra suelta camuflada entre la fueya.

Llegando al tercer avituallamientu

Toca subir unos 900 m en 8 km, hai un pocu de tou, pista, algún tramín cortu d'asfaltu y sobre tou camín empedráu entre praos, pica tou p'arriba con una pendiente que ta xustu per debaxu d'obligar a caminar, asina que trote cansín ensin parar. Por más qu'intentu apretar nun veo al madrileñu, y la subida faise un pocu pesada porque amás voi solu tol tiempu. Cuando voi pela segunda mitá de la subida gárrame Joseba, vien mui fuerte y aunque lu sigo un peazu, pocu a pocu escápaseme, incluso cuando llega'l repechu final que ye d'andar. Arriba'l tou ta otru avituallamientu onde tamién como algo. La xente que ta nél animen como llocos, menudu méritu que tienen, porque pasar tola mañana ehí a pie firme colo desagradable que ta'l día ye dignu d'amirar. Agora toca facer otra baxada d'unos 8 km, la primer parte y la última son mui pindies, lo del mediu ye más corrible. El primer avituallamientu de la baxada pásolu de llargu, nel segundu bebo un pocu y antes de llegar al siguiente pásenme los hermanos Mudarra de la seleción andaluza que vienen baxando fuerte.

Nun repechucu cortu de repente unu d'ellos, Antonio, para a estirar, acaba de pegái un tirón; póngome yo delante otra vez, paso de llargu l'avituallamientu y enfocamos l'últimu y pendiente tramu de baxada, óigolu detrás pero debe dir coles piernes al borde del calambre y nun me adelanta. Hai un cañu d'un castañu metiéndose nel camín que nun me molesto en apartar cola mano, ¡¡la madre que lu parió!!, tien algún qu'otru oriciu camufláu entre la fueya y faime un masaxe guapu en tol pescuezu, aviso a Antonio pero yá oigo: "¡¡Hostiaaa!!", señal de que l'avisu nun llegó a tiempu...

Queda la última subida, hai que dalo tou, senderucu estrechu que va ganando altura a base de vueltes y más vueltes, Antonio sufre y yo tamién, paez que se queda pero vuelve a garrame, venga p'arriba sin parar, llegamos al últimu avituallamientu y pasamos de llargu, la pendiente ye un pocu más suave y Antoniu pega un cambiu de ritmu al que respondo inmediatamente y vuelvo a poneme a tirar, seguimos otru peazu, tamos viendo una granxa pero'l pueblu nun lu acabamos de ver aunque ta mui cerca. Otru cambiu de ritmu y yá nun soi quien a siguilu, sácame unos pocos metros pero nun soi quien a recuperalos. Xustu al llegar al pueblu veo a unu mediu caminando y por tou lo que vale, ye'l que me adelantó namás pasar el primer avituallamientu pero por muchu qu'apriete nun queda distancia pa poder garralu.

Llegando a meta

Entro en meta el 16º, pocu después entra Pedro y non muchu más tarde Jorge. Tuvi un día d'esos tontos, nun tuve sensación nin de dir bien nin de dir mal, nun tuve apenes refencies al dir solu y al haber niebla y nun ver nin p'alante nin p'atrás. De toles formes, comparando los tiempos colos d'otros años (la primer edición y la cuarta nun cuenten porque fueron algo más cortes) salióme una buena carrera y llegué bastante enteru. Na clasificación final de la Copa al final quedé el 18º, tampocu tuvo tan mal pa nun correr en Canarias que puntuaba fuerte y pa la carrera de "trámite" que fice en Aramotz. Pedro ganó en veteranos y quedó'l 15º na clasificación absoluta y Jorge'l 20º, asina que tres asturianos que fuímos "de particular" entre los 20 primeros peleando contra selecciones autonómiques potentes (Andalucía, Aragón, Madrid, Euskadi, Cataluña, Baleares, Valencia, Galicia...) con federaciones que se desviven polos sos corredores...

Jorge y yo con Pedro, Campeón d'España na categoría de veteranos

Estirando, que sinón a ver quien ye'l guapu que se mete en coche 4 hores conduciendo pa volver pa casa...

Ducha, entrega de premios, comida d'hermandá (siempre se agradez) y pa casina.
La temporada de correr yá va llegando al final (empezó en marzu, asina que unu yá ta un pocu cansáu) y sólu queda (nel mio casu) la Maratón Xtreme Lagos de Covadonga y una castronada de les buenes pal segundu fin de semana d'ochobre, asina que queda l'últimu emburrionín y pa Feries a celebralo y a descansar un pocu, pero nun demasiáu qu'empezará (a ver si nieva esti añu algo curiosu...) la temporada d'esquí...

Perfil