Los Castrones: Ultra Trail Castrón en Piloña (II). Descripción tramu Sotu Dueñes-Infiestu.

31 Km

1500 m+

1400 m-

3h23' (corriendo) /10h caminando (contando paraes, comida y desbroces varios...)

Track

Mapa

Perfil

Esti tramu fícelu un par de veces, una con Laura caminando (y desbrozando...) y otra corriendo pa calcular tiempos. Pa facelu caminando, si nun táis de caminar muchu, puede partise en dos etapes, una hasta La Llama (15 Km y 1000m+) y otra de La Llama a Infiestu (16 Km y 500m+). Ye la parte digamos más civilizada, con más caminos, pistes y carreteruques y pasando per zones habitaes. L'únicu tramu de monte monte ye desde La Invernal a Espineres, que con niebla ye totalmente desaconseyable a nun ser que lo conozcamos mui bien.

Onde la curvona de Sotu Dueñes garramos la carretera que va pa Cúa, Sorribes y Castiellu.

Pasamos per debaxu de la N-634.

Primer cruce a la izquierda pa cruzar el puente y subir a Cúa

En pasando Cúa garramos una pista que baxa a la derecha dirección a La Escosura.

Al llegar a esta "construcción" de bloque, namás pasala tenemos que garrar un camín a la derecha que va al principiu como p'atrás.

Esi camín tuvimos desbrozándolu Laura y yo a golpe de guiada, col resultáu d'unes bones angüeñes nes manes al cuartu d'hora de posanos del coche...Cuando fice la foto nun taba, pero normalmente hai un pastor alemán amarráu cola cadena xusta pa poder pasar arrimáu a la casa de la izquierda col perru lladrándote a menos d'una cuarta...

Siguimos per esi camín y salimos a un camín d'hormigón que va dar a la carretera que sube de Cúa a Cerecea per Sabilde; n'El Barrial, onde encontramos la carretera, tiramos pa la izquierda dirección a Cerecea

Onde'l cruce de Robléu subimos pal cementeriu y la ilesia

Pista p'arriba, después de pasar un depósitu d'agua sigimos subiendo pa la izquierda...

...hasta llegar a la carretera Braniella, siguimos subiendo (a la derecha) y en pasando les primeres cases tenemos una curvona cerrada hacia la derecha y xustu después tenemos que garrar una pista que sal pa la izquierda.

Hai un llavaderu en ruines onde podemos garra agua a la parte abaxu del camín; como podéis ver esti tramu ye'l paraísu del felechu y les cabarres...¡¡¡y del xabalín!!!; esi día, al pocu de sacar esta semeya y empezar a escampar dímonos cuenta que tábamos metíos xustu en mediu d'una cacería, colos correspondientes perros y tiros y suspensión temporal de la mesma desde que se dió cuenta'l guarda que tábamos ellí hasta que salimos de la zona de batida...

Vemos la cabaña de La Invernal que dexaremos a la parte d'abaxu aunque vamos pasar bastante cerca, un tramu de cuesta tomáu pola cotolla (ta mui pero que mui malu) y salimos al antiguu camín que sube entre los árboles de la izquierda. Namás pasar el cantu onde los árboles diremos arrimaos a les peñes que van quedar a la nuesa derecha, per un tramu bastante llamarguizu (per ehí ta la fonte de Santinés) hasta dir a dar col camín que sube desde Paraes (Sardea) a Tardamoñes per La Estrencha. Tenemos que subir casi hasta arriba'l tou y después dir pa la izquierda hacia Saracu, onde hai un fresnu mui grande y característicu con unes cabañes mediu cayendo al pie d'él (l'últimu puestu de tiru de la cacería taba ehí, asina que hasta que nun lu sobrepasamos nun saqué la cámara de fotos...esta foto saquéla otru día)

El fresnu vistu después de sobrepasalu. A la izquierda de la foto vese'l colláu de Tardamoñes y nosotros vendríamos subiendo en diagonal per La Estrencha de derecha a izquierda pela parte d'abaxu del fresnu.

Una vez que tamos en Saracu, onde'l fresnu, pasamos pegaos a la cabaña que ta en pie dexándola a la nuesa derecha, cruzamos un xerru calizu con pinta de tener algo de camín y salimos a una camperuca que va subiendo entre espineres un pocu hacia la izquierda

En cuantu llegamos a la parte arriba d'esa camperuca, hai otra que va un pocu más hacia la derecha, tenemos que subir a buscar la espinera entornada que se ve a la derecha

Vista desde arriba d'esta segunda campera y adivínase la copa del fresnu un pocu más abaxu a la izquierda

La espinera que tenemos que dir a buscar...

...y el caminucu que pasa al pie d'ella y que nos lleva a la muezca que ta unos pocos metros más arriba.

Namás pasar esa muezca baxamos per una camperina estrecha (llámase Espadañéu) y bordeamos un pequeñu foyu.

La camperina (Espadañéu) qu'acabamos de pasar, a la derecha taría la muezca

Namás bordear el primer foyu, dexándolu a la nuesa izquierda, tenemos que bordear otru que va quedar a la derecha pa salir al cantu...

...desde onde empezamos a baxar hacia Espineres (al fondu a la izquierda)

N'Espineres (tenemos otra fuente) garramos la pista y pa La Llama, hai unes cuantes curves nes que podemos facer unos atayucos bastante evidentes.

Subida de La Llama a La Coroñina. Nel Altu La Llama garramos la carretera que baxa pa Pintueles y a los 150-200 m. desviámonos a la derecha (ver foto siguiente). Dexamos una cabaña arreglada a la izquierda y después tenemos un corral a la derecha con unos cubos d'abeyes (pasái despaciu y sin facer ruiu), onde tuvimos quitando ortigues un bon peazu. En pasando esti corral tenemos dos opciones, a los 50 metros garrar un camín mediu tomáu que sal hacia atrás a la derecha y que nos sube al cantu o siguir otru pocu más allá y onde veamos un arbolón a la derecha tirar p'arriba de frente pel mediu del felechal a buscar el cantu. Una vez nel cantu, subimos hasta arriba, onde sal una pista descendente hacia la nuesa izquierda que será la que siguiremos.

Cruce na carretera Pintueles

En baxando de La Coroñina pela pista, después de pasar un portelleru tenemos un cruce, pa la izquierda salimos a Fuentes, y siguiendo de frente vamos hasta Robléu.

Baxando a Robléu.

En Robléu garramos 30m de carretera dirección Anayo (a la derecha) y desviámonos a la derecha.

A los pocos metros de garrar la caleya pasamos al llau d'una hornacina vacía.

Salimos a Anayo y garrando la carretera de Torazu vamos pela primera pista que sal a la izquierda.

Volvemos otra vez a encontranos cola carretera de Torazu y tiramos pa la izquierda per una pista d'hormigón dirección Piedrabeya.

Abandonamos el hormigón pa dir en busca del Picu Viyao.

Rodeamos el Picu Viyao, equí tendríamoslu a la izquierda y un pocu p'atrás yá.

Al llegar a La Formiga dexamos la pista pa siguir per un caminucu mui guapu que va llevanos a El Brecín.

N'El Brecín baxamos per asfaltu hasta'l cruce de la carretera que sube de Pintueles a Incós

Salimos al cruce de la carretera de La Llama y garramos dirección a Infiestu.

Después de 200 m. llegamos al albergue de Pintueles (les antigües escueles), onde tenemos que garrar el cruce pa Cadanes

Esi camín paez que tien qu'atayar pa dir pa Cayón, pero muerre nunos praos. Un pocu más allá (unos 500 m.) sal una caneya ascendente hacia la derecha pela que sí podemos atayar.

En Cadanes, después de pasar la ilesia, garramos la pista que sube a Cayón.

La pista pasa al llau d'una capilla y después d'unes bones rampes d'hormigón sal a otra pista asfaltada que vien del campu tiro, namás garrala tenemos que siguir subiendo pa la izquierda pa a los 50 m. llegar a esti cruce. Si baxásemos pa la izquierda diríamos a Valles.

Vamos de frente y en llanu un peazu...

...pa garrar la pista de tierra que va en llanu pero picando p'abaxu hacia la izquierda. Pa la derecha subiríamos al area recreativa de Cayón y si siguimos subiendo, al Picu Fariu.

A los 500 m. garramos esti camín a la izquierda, pasando un portelleru onde la foto y otru más abaxu después del cual el camín va xirando hacia la derecha.

Salimos a les cases de La Cabañina y baxando vamos a Biedes y más p'abaxu Infiestu (de Biedes a Infiestu podemos baxar pela carretera dando algo de vuelta o por un par d'atayos hormigonaos, unu a los 50 metros del chigre a la izquierda y otru un pocu antes d'una fuente seca a unos 400m del chigre que baxa tamién hacia la izquierda)