Los Castrones: V Maratón Xtreme Lagos de Covadonga. 25/09/2011.

42 Km

2900 m+

2800 m-

4h22'20''

Amaneciendo col Sueve al fondu.

Otru añu más pa esta espectacular carrera na qu'estos 3 ó 4 últimos años cierro la temporada competitiva. Después de mediu añu de carreres (la primera'l 20 de marzu...) hai gana d'afloxar un pocu'l pistón y de salir al monte a caminar, correr, andar en bici, esquiar o lo que sea pero con más tranquilidá, lo que nun quita pa meter l'últimu emburrión d'entrenos en plan pa esta cita cola ilusión de rematar con dignidá una bona y variada temporada.

En principiu nun tenía mui claru si dir a correla a tope o tranquilamente, cola chifladura de dar la vuelta a Piloña nel día prevista pa 15 díes después d'esta maratón, taba metiendo tiraes mui llargues y machacándome bastante, tenía mieu de nun recuperar bien y de nun tener ritmu pa la carrera, pero'l cuerpu asimilaba bien la burrada de kilómetros de monte que taba metiendo, nun tenía molesties y acababa los entrenos enteru y recuperaba pal día siguiente perfectamente; pa encima faciendo series paecía que volvía a recuperar algo de chispa; pues nada, ¡¡¡a dar madera tou lo que se pueda!!!

Madrugón y pa la salida, esta vez d'Infiestu fuimos Ricardo, Sebas y yo. Tán un montón de gallos de los buenos: Santi, Fuego, David de La Cuesta, Txus Romón, Fran, Zígor Iturrieta... más otru montón d'ellos qu'aunque nun tengan tantu nome hai que tenelos siempre en cuenta... Pero habíamos decidíu dar madera y yá desde la salida póngome a tirar a muerte y a ver lo que sal, el que quiera ganar que lo sude... Subiendo a Priena veo que saco un pocu de ventaxa a un grupín de tres (Fran, Txus y Zígor) que van tamién con un pocu de ventaxa respectu al pelotón.

Llego arriba en 23'27'' y nel crestéu pa dir pa La Güesera van garrándome. Txus tira del grupu onde ye p'arriba de correr, a Zígor cuando ye p'abaxu nun hai dios que lu siga, Fran va ehí metíu pero sin enseñar les cartes y yo tiro fuerte cuando hai cuestes dures de les de caminar. Después d'un foyeru Fran da la vuelta a rebuscar entre'l barru'l playeru qu'acaba perder, sigue habiendo un montón de barru aunque esti añu fai bon tiempu. Llego a La Güesera'l primeru en 50'45'' entre un montón de voces d'ánimu: "venga, que vas el primeru", cosa que s'agradez, pero se que colos tres que llevo en remolque nun puedo faceme ilusiones...

Saliendo del avituallamientu de La Güesera

Sebas

Ricardo

En Comeya volvemos a reagrupanos, un pocu de cachondéu colos charcos, subimos pel Escaleru a Buferrera y subiendo les escaleruques de Buferrera o yo nun voi bien o acaben de pegar un tirón... Llego l'últimu al avituallamientu del Ercina en 1h21'55'' y sorprendentemente salgo d'él el primeru, al pocu pásame Txus col semblante seriu y yá me doi cuenta que s'acaba la comedia, Fran y Zígor salen detrás d'él y yo descuélgome un pocu. Onde'l Bricial oigo unes voces, son los castrones de Rubén, Berto y Luis que tán corriendo'l raid y paez qu'anden un pocu desorientaos jejeje, intercambiu d'impresiones y ¡¡mierda!!, que se me van los d'alante. Sáquenme un bon peacín y na subida a La Porra recórto-yos algo, llego arriba en 1h44'02'' y dícenme Iván y Laura (tuvieren siguiendo y animando tola carrera, gracies) que me saquen unos 50''.

Llegando a La Porra

Sé que na baxada va ponese a tirar Zígor como un llocu y nun voi a ser quien a garralos. Amás baxando solu nun voi dir tan rápidu comu si fuese a rueda d'ellos. Como se suel dicir "fue bonito mientras duró", taba claru que'l mio sitiu nun yera esi, pero prestó dir con estos tres grandísimos corredores hasta tan allá, a partir d'agora tenía que facer la mio carrera. Per detrás paez que vienen a 1'30'', asina qu'a intentar mantener esa distancia na baxada hasta Cuadonga. Yá llegando a Cuadonga (2h31'53'') gárrenme Paco (canariu) y Emilio Llamedo, que vienen baxando fuerte.

Arrancamos p'arriba y al pocu pásame primero Sergio (de Béjar) y después David de La Cuesta. A Emilio y a Sergio voi manteniéndo-yos la distancia, pero a Paco yá casi nun lu veo más y David sácanos un bon peazu. Nel avituallamientu de Pozobal tán como siempre los padres d'Amador Priede que tolos años me reciben cola mesma simpatía, sabe mal tener que despedise tan rápidu pero nun ta la cosa pa parase muchu. Después de pistear un pocu llega la famosa subida del aductor (ye raru que nun traben al ponese a caminar p'arriba despues de venir corriendo tantu tiempu...). Veo a Emilio mirando p'abaxu intentando estirar, acaba de quedar agarrotáu pero pocu a pocu va recuperando, póngome a tirar y vamos xuntos hasta l'avituallamientu d'antes del repetidor de Següencu onde ta Pablo Criado (3^u nel Tor des Geants, 330 Km y 24000 m+ en casi 90h...menudu animal, norabona!!!) animando.

Avituallamientu de Següencu

Na subida veo a Emilio que se queda y voi recortando terrén a Sergio, al que garro después de llegar al repetidor (en 3h52'19'') y d'un tramu de baxada. Va tirando Sergio tola baxada y depués de saltar el talud de la carretera vemos a David a 1 ó 2', pero aunque Amador (esti añu d'espectador) diz que lu tenemos a tiru sé que nun lu vamos a garrar. Repechucu en Nieda onde encontramos a un montón de xente del raid emburriando les bicis y última baxada hasta meta, onde ta Valentín animando. Entramos Sergio y yo 6^uy 7^u (5^uy 6^u senior) baxando con holgura de les 4h30' y per debaxu del tiempu del vencedor del añu pasáu, pa que vos fagáis una idea del nivel qu'había esti añu...

Qué raru que nun te faciendo'l pijo...

Sebas y Ricardo entren en 5h17' y 5h38', faciendo un carrerón los dos, Sebas que nun la corrió nunca y Ricardo baxando'l tiempu del añu pasáu en ¡¡¡más de media hora!!!

Mención especial pa Fran, que ganó reventando'l reló con unes increíbles 3h55', metiendo 10' a Txus y 15' a Zígor, y pa Santi, que tuvo que dexalo por lesión, a recuperase rápidu. Nerea con 5h20' y Eva con 5h23' ficieren un tiempu buenísimu y Ana Cristina consiguió baxar de les 6h, recortando tamién bastante tiempu respectu del añu pasáu.

Personalmente poques veces acabé tan contentu col resultáu y disfruté tantu d'una carrera, encontréme mui bien y vi tolo qu'había entrenáu reflexáu nes bones sensaciones que tuve. Aparte acompañó'l día y la organización tuvo impecable, gracies por tolo que trabayasteis y por tolo qu'animasteis.

Misión cumplía...